رواية هموم رجل الفصل الخامس

رواية هموم رجل الفصل الخامس
    رواية هموم رجل الفصل الخامس
    رواية هموم رجل الفصل الخامس


    //// ام ابراهيم قاعدة عند ابراهيم وامورها تمام الي حد من جي يوم بعد شهر كان ابراهيم كيف مرواح من العمل 
    ابراهيم،،،،،السلام عليكم 
    امه،،،،وعليكم السلام ورحمة لله وليدي جيت 
    ابراهيم،،،،جيت يا غالية 
    امه،،،،هي خش غير حوايجك الغدي واتي 
    ابراهيم،،،،،تهاني راقدة
    امه،،،،ايه راقدة خليها بالك مزال تبي ترقد انت غير واتعالا باهي اصلا نبيك في موضوع 
    ابراهيم،،،،،باهي يما هي 
    /////خش ابراهيم الي الدار ولقي تهاني راقدة اضايق لان امه هي يلي اطيب مش مرته بس خلاها راقدة وطلع اتغدا هوا وامه وبعد ما كملو غداهم 
    ابراهيم،،،،،ايو يما قولي انشاء لله خير شن تبيني 
    امه،،،،ولله يا ولدي متحشة وانشاء لله يلي انقوله ميضركش بس 
    ابراهيم،،،،،ان شا ء لله خير ولله انخلعت شن في يما 
    امه،،،،،،توا انا قداش ليا قاعدة عندك 
    ابراهيم،،،،،،شهر وعشرة ايام علاش 
    امه،،،،،اها باهي انت مش حاس بي مرتك 
    ابراهيم،،،،خيرها ان شاء لله خير يما شن فيها مريضة 
    امه،،،،،لالا مش مريضة بس انا بنقولك 
    ابراهيم،،،،،يما لو بتقوليلي علي خاطر هي ترقد حتي انا مضايقجني الموضوع هذا بس لله غالب هي عاشت في حوش كله شغالات وكانت مدلعة هلبة منبيهاش اتحس ان اتغيرت حياتها 
    امه،،،،،لالا انا منحكيش علي النوضان والضمان 
    ابراهيم،،،،،امالا علي شني 
    امه،،،،،،مش عارفة مرتك اتنوض الصبح وانا نقعد نسمع فيها تقعد شادة التلفون بي ساعة وتوشوش ولما انت اتجي اتخش لي الحمام تقعد فيه قريب ساعة وتلفونها معاها ممكن انت مش حاس بس انا مركزة عليها 
    /////ابراهيم جاياته نوع من الصدمة وايشوف لي امه وخلاص 
    امه،،،،،وطلوعها هلبة يا ولدي راه هلبة هلبة وانت مسايرها 
    ابراهيم،،،،،يما شن قصدك 
    امه،،،،،ولله يا ولدي انا مانقدر نظلم حد لكن انت فتح عيونك 
    ابراهيم،،،،لالا يما اكيد اتكلم في صحباتها واحيانا اتكلم فيهم جنبي انا واثق فيها يما 
    امه،،،،،ابراهيم انت اتحب تهاني حب اعمي وليدي حبها مقتلكش لا بس اقنط شوية 
    ابراهيم،،،،،باهي حاضر 
    ////ناض ابراهيم وخش الي داره ولقي تهاني راقدة قعدت ايشوفلها وقلبه محروقة ومش قادر يتكلم بس هوا ميبيش ايدخل الشك لي روحه ويقنع في نفسه انها اتكلم في امها وصحباتها 
    ابراهيم،،،،،،وذن تلفونها خلي انشوفه وخلاص 
    /////لقي التلفون جنب تهاني فتحه وفتشه وملقي فيه شي زاااادت الحيرة بس قال ايه اصلا مرتي بنت ناس وعيلة مستحيل اديرها ردلها تلفونها بس في شي كان خانقه ومش قادر يتكلم وقعد متكي علي سرره ويتفرج عليها وايقول زعما امي يلي شاكة فيه صح زعما انا رجل الي هدرجة مضحوك عليا لالالالا يا راجل المراء كويسة وانا نظلم فيها استغفر لله استغفر لله 
    /////استمر التفكير مع ابراهيم لين تهاني ناضت 
    تهاني،،،،،روحت صباح الخير 
    ابراهيم،،،،،صباح النور كيف حالك 
    تهاني،،،،الحمد لله تمام الساعة كم توا 
    ابراهيم،،،،الساعة 4:30 
    تهاني،،،،،اووو رقدت هلبة 
    ابراهيم،،،،باهي بري نوضي اتغدي وانا بنرقد شوية 
    تهاني،،،،،ابراهيم حبيبي ممكن طلب 
    ابراهيم،،،،،اتفضلي 
    تهاني،،،،،نبي نلع اليوم 
    ابراهيم،،،،،علاش وين بتطلعي 
    تهاني،،،،،بنمشي الي صاحبتي عرسها قريب وبنمشي انهدرز عليها 
    ابراهيم،،،،،باهي بري 
    تهاني،،،،،انت احسن واحد في الدنيا كلها 
    ابراهيم،،،،،شكرا سكري الضي 
    تهاني،،،،،حاضر 
    ////طلعت تهاني وابراهيم قعد يسترجع في الطلعات يلي طلعتهم تهاني وتذكر انها ما عمره ما شك فيها وحس نفسها انه ظلمها هلبة 
    ////بس في نفس الوقت شي ايقوله زيد جرب شي ثاني ف قرر انه يأخد منها تلفونها 
    ////قعد في سريره الي حد ما جت الساعة 6:00 وتهاني كانت كيف اتوتي في روحها ناض ابراهيم لبس حوايجه وحط تلفون امه في جيبه ومشي الي تهاني 
    ابراهيم،،،،،تهاني حبيتي نبي تلفونك 
    تهاني،،،،علاش 
    ابراهيم،،،،ماهو امتاعي فسد اعطيني فونك ممكن 
    تهاني،،،،،باهي خلاص خوده هاك 
    ابراهيم،،،،شكرا خلاص متعطليش باهي 
    تهاني،،،،،،لالا فوت خلاص توا نمشي غدوة لان التلفون مش عندي ومرات اتصير اي شي في الطريق 
    ابراهيم،،،،اها ايه صح خلاص بري غدوة وخلاص 
    تهاني،،،،،،ايه صح ماشي 
    ابراهيم،،،،،يما تبي شي 
    امه،،،،لالا صحيت سلامتك 
    ابراهيم،،،،،وانتي تهاني تبي شي 
    تهاني،،،،سلامتك شكرا 
    ابراهيم،،،،عفوا 
    ////طلع ابراهيم وحط التلفون في جيبه وداره عام وقعد يستني في اتصال مسج اي شي ما وصلش شي لا صحبات تهاني وامها وكلهم رد عليهم ولقاهم بنات طبعا هوا كأن متأكد ان مفيش تلفون ثاني في الحوش لان فون امه وتهاني رفعهم معاه 
    ////قعد برا الي الساعة عشرة ونص والتلفون عادي جدا 
    ابراهيم،،،،ولله حتي انا متفهمني نظلم في مرتي بي شي زي هذا ولله ما نتحشم كأني نتحشم راني منشكش فيها ابدا وبعدين امي فهمت غلط تهاني اتحب اتكلم صحباتها وممكن متبيش حد يسمعها خلي انرواح وانشاء لله اتسامحني يااارب
    //////وصل ابراهيم الي الحوش ولقي انه وتهاني امقعمزين ايهزدرزو خش وقعد ايهدرز معاهم وبعدين رقدت امه وخش هوا وتهاني الي دارهم 
    ابراهيم،،،،،تهاني كيف حالك 
    تهاني،،،،هههه الحمد لله علاش تسأل علي حالي ماهو كنت جنبك 
    ابراهيم،،،،،ههههه انتمم عليك 
    تهاني،،،،هههه شني صلحت تلفونك 
    ابراهيم،،،،،ايه هاك تلفونك صحيتي 
    تهاني،،،،،من اتصل 
    ابراهيم،،،،،امك وصحباتك وقتلهم توا تتصل بيك 
    تهاني،،،،اها توا نتصل بيهم الصبح توا ما عنديش نية ندوي 
    ابراهيم،،،،،تهاني 
    تهاني،،،،،نعم 
    ابراهيم،،،،،متقوليليش تطلعي كل يوم وين تمشي 
    تهاني،،،،،نمشي الي حوشنا ابراهيم خيرك مش انقولك 
    ابراهيم،،،،لالا قصدي صح اتقوليلي انك بتأخدي حوايج مع امك او مرت خوك بس نبي نعرف من اما محلات تشري فيهم 
    تهاني،،،،،الاكثر الاكثر قرقارش وبن عاشور ومش مخلية مكانه نهائيا
    ابرعهيم،،،،اهااا كويس 
    تهاني،،،،شني بترقد 
    ابراهيم،،،،ايه خلاص وانتي
    تهاني،،،،،لالا انا نايضة الساعة اربعة مش جايني النوم نهائيا خلي نمشي الي الصالون انكلم ماما والبنات 
    ابرهيم ،،،،مصارش من الصبح
    تهاني،،،،انت بترقد وانا بنكسد خلي انكلمهم وخلاص 
    ابراهيم،،،،ماشي بري 
    ////طلعت تهاني من الدار وابراهيم قعد شوية وبعدين ناض وقعد يسمع في تهاني تتكلم في الصالون قعد مركز اكثر من نص ساعة 
    ////بس اكتشف انها اتكلم في صا حبتها. واتهدرزلها علي قفطان شراتها وهذيكا تحكيلها علي عرسها 
    ابراهيم،،،،اوووف علينا مش قلت انا مش شاك فيها توا شن نوضني من مكاني انا وبعدين اهو البنت اتكلم في صاحبتها غير انا مشكاااك يااااربي سامحني سامحيني يا تهاني لو تندري عديا شاك فيك اووووف لالا اعوذ بالله من الشيطان الرجيم لالا
    /////ولا ابراهيم الي داره وقعد ايفكر لين خداه النوم ورقد 
    الصبح 
    طوووووط طووووط 
    ابراهيم،،،،،،الووو مني 
    خالد،،،،،انا يا ابراهيم كيف الحال 
    ابراهيم،،،،للحمد لله تمام انشاء لله خيرا علي الصبح شن في
    خالد،،،،،العريس 
    ابراهيم،،،،ههههههههه خيره 
    خالد،،،،،قول ترا شن يبي 
    ابراهيم،،،،،شني قول 
    خالد،،،،،، يبي امي اتولي 
    ابراهيم،،،،لالا علاش 
    خالد ،،،،،،،عذر اقبح من ذنب 
    ابراهيم،،،،،،قولي علاش 
    خالد،،،،،،،علي خاطر عروسته الجديدة تطيبيها مش حلو زي تطيب امي 
    ابراهيم،،،،،قصذك بجد هكي يتكلم 
    خالد،،،،،ايه بجد وقالي بعدين بيجيك هذا علاش انا كلمتك 
    ابراهيم،،،،،وانت شن قلتله 
    خالد،،،،،ك العادة اتعاركت انا وياه وقتله امي. لا قالي امالا كان امك متروحش بنطلقك شيباني النحس هذا يعرف حتي ايطلق 
    ابراهيم،،،،،،وااااااك قلقت انا شن عذا مش اتزوج شن مزال يبي فيها 
    خالد،،،،،،اسمع هوا توا العشية ايجيك ويبي ايرد امي ماشي وانا توا انجي معاك 
    ابراهيم،،،،،بتجي اتكلم كويس لانه في حوشي منبيش من ايرد عليه الدوة 
    خالد،،،،،،،باهي باهي حاضر منردش عليه 
    ابراهيم،،،،خلاص انا نستني فيه 
    خالد،،،،،باهي امالا نتلاقو العشية 
    ابراهيم،،،،،سلام 
    /////سكر ابراهيم وحذف التلفون علي طول يده وهوا متعفلق علي العملة يلي يبيها بوه وشن بيقول الي امه وبعدين ابراهيم ميبيش المشاكل قدام الجيران ناض خش الحمام وتوضأ وصلي الصبح لقي امه موتيتله القطور صبح عليها وقعمز فطر معاها وهدرز بس مقدرش ايقوللها علي بوه لان ميبيش ايعكرلها جوها علي الصبح 
    ///////////كمل فطوره واتجه الي العمل متاعه ولي سوء حظه وصل الي عمله وفي مشروع كان ابراهيم مجهزه لقاها لاعبيله فيه قعد ايخبط في المكتب وايعيط كيف والمفروض انه ايسلمه اليوم يلي بعده بس خاذمينه غلط فلهاذا هوا مش ح يحضر الاجتماع والشي هذا كان ح يعلي ابراهيم في مركزه قعد ايخبط في الشركة وايعيط علي يلي لعبوله في وولع السيارة وطلع قعد ايدور وايدور الدنيا اتخلطت عليه 
    //////////من جهة مرته يلي امه شاكة فيها بس هوا ملقاش اي شي عندها بس ايقول ما فيش دخان من غير نار ومن جهة بوه يلي بيجي وبيدير العار قدام الجيران وشن بيكون موقف امه وابراهيم ميقدرش ايرد عليه لانه بوها ولانه في حوشه وثالث شي كان المشروع يلي يحلم انه ايوصله بس للاسف مصارش منه مشي ودرس قدام البحر وقعد ايفكر ومش عارف في اي مشكلة ايفكر بي الظبط 
    /////////// اخر شي مشي ودرس قدام جامع ونزل صلي ودعاء ورمي همومه الي ربي سبحان وتعالي وقعد في الجامع الي قريب يأذن العصر وجنسي نفسه وهوا يدعي ويقرا في قران شاف الساعة لقاها وقت لان العصر قريب يأذن وبوه ممكن ايطب في وقت 
    /////رواح الي الحوش 
    ابراهيم،،،،السلام عليكم 
    امه،،،،،واخيرا جيت وعليكم السلام وينك اشغلتني عليك 
    ابراهيم،،،،ايه يما اليوم عمل وانسيت مكلمتكش 
    امه،،،،،اها باهي هي خلي انحطلك تتغدأ 
    ابراهيم،،،،،تهاني قاعدة راقدة 
    امه،،،،ايه قاعدة 
    ابراهيم،،،،ايييه عليا خلي انخش انغير حوايجي 
    ////خش ابراهيم ايغير في حوايجه وهوا مهمووووووووووووم ويستني في اللحظة يلي بوه ايطب فيها 
    /////طلع اتغدا وهوا يتغدا سمع الباب ايطقطق 
    ////مشت الشغالة فتحت الباب ولقاته محمد بوه ابراهيم 
    محمد،،،،،،السلام عليكم 
    ابراهيم،،،،،وعليكم السلام اتفضل بوس 
    خيرية،،،،،ايييه هذا شن جيبه 
    محمد،،،،،،شن مش عاجباتك جيتي 
    خيرية،،،،،،الصراحة ايه مش اتزوجت لاش جاي 
    محمد،،،،،جاي مش انردك الي حوشك 
    خيرية،،،،،غير اعبي انساني 
    محمد،،،،،شني غير نعبئ انتي مرتي رعه 
    ابراهيم،،،،،شني بوي طلقتها مرتك الجديدة 
    محمد،،،،،لالا علاش بنطلقها قاعدة ونبي امك حتي هي اتولي ويقعدو الاثنين زي الاخوات 
    خيرية،،،،،اخوااااات ولله هبل الراجل هذا 
    محمد،،،،،اسمعي انا قاعد انكلم فيك بي احترام راه 
    خيرية،،،،،،اسمع معادش في احترام ما بيناتنا راه انساني 
    محمد،،،،،لالا مش ناسيك هي لمي حوايجك بلا دلع نساوين زايد وهيا
    خيرية،،،،لالا منبيش انا قاعدة هنا 
    محمد،،،،،انا قلت هي 
    خيرية،،،،،وانا قلت لا 
    -/////وهنا شرين الباب والشغالة فتحت وخش خالد ولقاهم في حوار حاد 
    خالد،،،،،بوي جيت علاش 
    محمد،،،،،مش امس قلتلك بي انرواح بي امك 
    خالد،،،،باهي هي متبيش اترواح ولا خلاص فوتها 
    محمد،،،،،هي مرتي واكلمة كلمتي انا الراجل هي لمي حوايجك وقدامي 
    خيرية،،،،انا من هنا منبيش طالعة واعلي ما في خيلك اركبه 
    ////وهنا محمد خرج عن طوعه وجي الي خيرية بيضربها وشدوه ابراهيم وخالد 
    خالد،،،،،اسمع امي معادش اتم. عليها ايدك ايوا 
    ////وهنا محمد عطي الي خالد كف ماهو كف 
    ابراهيم،،،،بوي صلي ع النبي اهدأ اهدأ مش كل شي بي الضزجرب هلاص احنا كبرنا توا 
    محمد،،،،،،،انقوللكم حاجة خيرية انتي طالق طالق طالق باهي واشبعي بي ولدك وانت يا خالد لم حوايجك واطلع من الحوش باهي الحوش حوشي ومنبيكش تسكن فيه 
    خال ،،،،الحوش هذا انا دافع فيه واحترمناك لان بوها وكتبناه بي اسمك 
    محمد،،،،،وانا ضحكت عليكم باهي هي انت وياه انرواح توا منلقاكش في الحوش وجهك معادش نبي انشوفه باهي انتم كلكم معادش نبيكم 
    ////طلع محمد وابراهيم وخيرية وخالد مصدومين وايشوفو الي بعض 
    ابراهيم،،،،متوقعتش بوي بي القساوة هاذي 
    خالد،،،،،طاغي ياويله من ربي هوا قداش مزاله توا ايموت 
    ابراهيم،،،،،خلاص يما خلاص صلي ع النبي واهدئ 
    امه،،،،خلوني بنخش الي الدار وميلحقني حد نبي انقعمز بروحي 
    ابراهيم،،،،باهي يما بري الي دارك 
    /////خشت امه الي الدار وابراهيم وخالد قعدو ايهدرزو 
    خالد،،،،،ريته ريته شيباني النحس هذا في الاخير لزني هذااااا مناقص ريته 
    ابراهيم،،،،توا شن بدير 
    خالد،،،،،بناجر حوش وخلاص حسبي لله ونعم الوكيل فيه حسبي لله ونعم الوكيل فيه 
    ابراهيم،،،،،،خلاص صلي ع النبي وتوا برا جيب اسماء واتعالا اقعد هنا الي حد ما تلقي ايجار 
    خالد،،،،،وين بنقعد يا ابراهيم وانت ملحقتش تتهي بي مرتك 
    ابراهيم،،،،،،اسكن في الملحق الخاريجي هوا دار وحمام اقعد فيهم والغداء نتغدو مع بعض زي قبل معليشي فترة واتفوت باهي 
    خالد،،،،،ماشي خلاص باهي 
    ////طلع خالد ومشي الي حوشه وقعد ايجهز في الحاجات متاعه هو ومرته وخدو حوايجهم وابراهيم قال الي الشغالة انها اتضم الملحق وطلعت ضمتهالهم وجهزتها وجي خالد واسماء قعدو فيها 
    ابراهيم،،،،تهاني سامحيني حبيبتي 
    تهاني،،،،علي شني 
    ابراهيم،،،،،كيف متزوجين واتشوفي في المشاكل والحوش زحمة وهكي فترة واتفوت ان شاء لله باهي 
    تهاني،،،،،باهي عادي مقدراتك 
    ابراهيم،،،،ربي يحفظك ليا وميبعدني عليك ابدإ 
    تهاني،،،،،شكرا ان شاء لله 
    /////فات اسبوع وخالد ساكن في الملحق ولقي شقة ايجار بس بيستلمها بعد اسبوع وجي يوم الجمعة وجت مها الي حوش ابراهيم واتغدؤ مع بعض بس المرة هاذي كان كل واحد مهموم بي شكل امه مهمومة لان راجلها طلقها وخالد مهموم انه طلع من حوشه وابراهيم مهموم علي خاطر عمله كانو كلهم مش فرحانين والكأبة معبية الحوش 
    ////فاتو يومين بعد الجمعة وخيرية قاعدة مثأثرة 
    ابراهيم،،،،يما خيرك 
    امه،،،،،وليدي هذا كله واتقولي خيرك بوك طلقني 
    ابراهيم،،،،،باهي كان طلقك يا امي خلاص انسيه واهو انتي قاعدة هنا ولا مش مستريحة عندي 
    امه،،،،،لا وليدي مستريحة لكن انت عريس وتبي حوشك بروحك طبيعي الي امتي بنقعد عندك انا 
    ابراهيم،،،،،،لا ماهو انا جاي بنقولك 
    امه،،،،،شن بتقول 
    ابراهيم،،،،ريتي الملحق يلي فيه خالد 
    امه،،،،ايه 
    ابراهيم،،،،،هذاكة دار وحمام باهي انا بنزيد عليه مطبخ وانديرلك فيه دارين ثانيات دار ليك ودار الي احمد باهي والدار الموجودة توا بنكبرها وانديرها صالة ويبدأ حوش يا سلام عليه 
    امه،،،،،وليدي هلبة عليك هلبة باهي انا عندي ذهب نعطيهولك وابني بيه باهي 
    ابراهيم،،،،لالا ذهباتك دسيهم عندك وانا لو احتجت توا نأخد منك وعلي موت وحياة انا توا نكتبهولك بي اسمك متندريش 
    امه،،،،بعيد السوء عليك وليدي 
    ابراهيم،،،،يما ولله ما عاد تندري علي الوقت نكتبهولك بي اسمك وبعدين ميتجملش عليك ولا واحد 
    امه،،،،،سلم وليدي ياربي رب يعطيك طولت العمر 
    ابراهيم،،،،اهوا احمد يتصل 
    ابراهيم،،،،الو اهلين 
    احمد،،،،اهلين كيف الحال 
    ابراهيم،،،،،تمام التمام 
    احمد،،،،،انت كنت مسافر 
    ابراهيم ،،،،،لالا مسافرتش علاش تسآل
    احمد،،،،،لالا هكي سؤال غير استغربت متصلتش بيا واعطيتني محاضرة بس
    ابراهيم،،،،،ايه حق كنت لاهي وتوا بنجي انطب عليك ومتفرحش هلبة كلها ثلاثة او اربعة شهور واتجي تسكن معاي 
    احمد،،،،،،علاش
    ابراهيم،،،،،بنبني حوش لي امك هنا جبني وانت طبيعي بتجي تسكن معاها 
    احمد،،،،،باهي حاضر ايصير خير امي جنبك 
    ابراهيم،،،،،ايه هاك خودها
    ////احمد قعد يهدرز هوا وامه 
    //// فاتو يومين عند مها 
    طوووووط طووووط 
    مها،،،،،الو حمودي كيف حالك 
    احمد،،،،اهلا شن الجو باهي 
    مها،،،،،تمام الحمد لله شن خطر عليك تتصل 
    احمد ،،،،،نبيك في موضوع مش مهليني نرقد ليا يومين 
    مها،،،،انشاء لله خير شن في بوك ومرته 
    احمد،،،،لالا توا انجي ونحكيلك خليل وين 
    مها،،،،،كيف بيطلع 
    احمد،،،،باهي انا جايك 
    مها،،،،هي نستني فيك 
    ،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،ويتبع 
    ،،،،،،،حلا،،،،،

    جميع الحقوق محفوظة للمؤلفة حلا 

    لمتابعة صفحة المؤلفة علي الفيس بوك : من هنا
    ,
    @مرسلة بواسطة
    كاتب ومحرر اخبار اعمل في موقع روايات كوريه متنوعه .

    إرسال تعليق