رواية مهمات سرية الجزء الأول الفصل العاشر

رواية مهمات سرية الجزء الأول الفصل العاشر

    رواية مهمات سرية الجزء الأول الفصل العاشر


    رواية مهمات سرية الفصل العاشر الجزء الأول


    رواية باللهجة: الليبية

    رواية من روايات صفحة روايات لوزة ليبية

    هيا بنا لقراءة الفصل سوياً.

    رامي - لاب توب شنو ... جبتوه معاكم والاه ؟؟؟
    الياس - وعلاش بنجيبه ؟
    رامي - هكي نحساب .... لانه ااا ... اااا
    الياس - لانه شنو
    رامي - ااا ....
    قرن حواجبه الياس وحس من ملامح رامي ان فيه شئ غلط... علي كان يشرب ف قهوة اتشنج وقعد يشبح لرامي يستنى فيه ينطق الكلمات فهم ان فيه كارثة وراء تبعتره ف كلماته ...
    الياس بغضب - اتكلم !
    رامي - ال الاب توب متاعي ..
    *وقف الياس على طول وشفشف شعره وقلب الكرسي اللي كان مقعمز عليه .... واتقدم ل رامي وشده بيديه الزوز من سوريته وقاله - وانا علاش قتلك اشري لاب توب اجديد اه ... اتكلم علاش .... ماه بش انخليه غادي ... ماتفهمش انت والا شنو ....
    *رامي ساكت ويشوف للوطا متفادي نظرات الياس ليه *
    علي - غير هدي بالك يالياس
    *شد الياس رقبة رامي بيد واحدة وقاله - انت عارف شن درت توا ؟؟
    اه ... عارف والا انعرفك ... ياسي رامي الكابو مش حيخليك ف حالك يا يقتلك ياحيقتلك وفوق منها قبل مايقتلك حيعذبك من وراك ومن انت ومع مني تخدم وشن يحزها عاد
    رامي - المشكلة اني .... اني كاتب مذكرة ف الاب توب ... مش مدكر مسحتها او لا
    علي - شن كاتب شن كاتب
    رامي - قصة قصيرة على فرقة الانقاذ
    مسح ع راسه الياس وضحك بهستيرية -هههههه هههههههههه وووه اتخيلوا بعد هالعذاب السنين ف التأسيس والجري والطراد ومتحمل التبهديل من حسن وخوه وايجي البي رامي يكشف روحه ويكشفني ههههه اتخيل ياعلي ! قالك قصة ع فرقة الانقاذ هههههههههه وااااااك
    ☆‏متناقضين لدرجة ضعفنا يطلع على شكل قوة، ومشاعِرنا الحلوة على شكل قسوُة، حتى حزننا يطلع بشكِل ضحكة ☆
    *علي حس ان الياس فصل رسمي ... مش من عادته يضحك ويدوي بطريقة هادي ... اتشنج رامي ف مكانه ووجهه احمر .... محمد يراقب
    علي - استهدى بالله الا مافي حل
    الياس يكشخ ويشاور بيده - اي حل تدوي عليييه اي حل نار جهنم وانفحت علينا عليم الله شن يدير فينا السي حسن ....
    رامي - ب
    الياس - حتى كلمة 👌! واصلتني منك لهنا👃 يارامي وتنطمر اهنا تبات ف هالصالة لين يتم الموضوع ...
    *سكت رامي واكتفى انه هز راسه اوكي *
    الياس - علي اعطيني تلفونك
    علي - هاك اه
    *خداه واتصل ب هيثم .... ايوه هيثم .... اتخلي كل خاجة ف ايدك واتجي اهنا باقصى سرعة عندك ... ايه ضروري ... جيب معاك عدة تركيب الانذار والحاجات متعك
    هيثم - تم ف طريقي ليك 👍سلام
    <><><>
    {انا لازم نهرب من اهنا لازم .... بس لكن هالشكل مسكر الباب الفيلا... كيف بنطلع من اهنا ....هوا مجرم اكيدة فيه ف دراه سلاح او اي شي يفيدني .... تره خلي نبربش ..... سحيييقة مسكر دولابه .... امممم تره القجورة .... اياح معقولة مش مخلي سلاح نخوفه بيه وناخد المفتاح .... اهاااا حلو حلو حتى بخاخ الاغماء هذا كويس ... نبخله منه ونخنب المفتاح ونهرب غير ايجي بس هالمجرم }
    <><><>
    حسن - اشحنه شن تستنى
    ضاوي - يبي شحن سوني واللي عندنا توشيبا
    حسن - مصععععبببب يامصعععب
    مصعب - نعم يالافندي
    حسن - تمشي دعس اتجيبلي شحن لاب سوني فيسع
    مصعب - فيه هلبا انواع يالافندي اعطيني لاب توب ونشريلك عليه
    حسن - نعطي جدك لحناك
    مصعب - به كيف بنشري
    ضاوي - زود صور منفذ الشحن متع الاب ووريه لصاحب المحل وتم
    مصعب - اوك
    <><><>
    الياس - اسمعني كويس ياعلي .... لما يجي هيثم اهنا خليه يمشي يتسلل لشقة رامي هوا والعدة متعه بش حتى كان طبوه يقول انه مطلوب منه يركب جهاز انذار .. وخليه ياخد المهم من الشقة كان مزال عنده هاردسكات او صور او اي شي يخصه ...
    علي - اوك
    الياس - يستر الله وخلاص ... ان شاء الله مافتحاش الجهاز ..
    علي - ان شاء الله
    *طلع الياس سلاحه من خسره وعبى المخزن رصاص .... ورجعه ف حزامه ... وحط بوخوصة ف شخشير .... *
    علي - رد بالك على روحك
    الياس - يستر الله ..
    *تلفت لرامي وقاله - ابهرني ششن مازال فوسطه لاب توبك
    رامي بقهر .... - ف فيه صوري و وصورتي انا و سعد
    الياس - براااافوووو حتى سعد مليح تو يشدوه من المستشفى ... اجلطني وقولي حتى صورتي موجودة ف لاب توبك الموقر
    رامي - لا لا وصورة ااا
    الياس - ايه ؟؟؟؟
    رامي - صورة صاحبتي ...
    الياس - 😳
    <><><>
    ابتسام - خاطري نسافر ياهنادي
    هنادي - الهي ف المحاضرة الدكتور يشوفنا
    ابتسام - امس حلمت بصاحب رامي ...
    هنادي - هداكا اللي حفظتي رقمه
    ابتسام - ايه
    هنادي - شابحتيه انتي
    ابتسام - ابدا ماعمري شفته
    <><><>
    الياس - صور صاحبتك ! امخلي صورة بنت ف جهازك ؟ احنا شباب وكان شدونا مايديروش فينا خير يبالك بنت !
    رامي - لكن مسحتهم حتى صور اللي متاعي مسحتهم
    محمد - فيه برامج استعادة ....اترجع الصور وكل البيانات حتى مقاطع الفيديو
    الياس - الصبر وخلاص الصبرررر خيرك يارامي وين راسك بالله عليك علاش طلبت لاب توب جديد انا اه ؟؟ والمشكلة فلوس وخديت شن درت بيهم ؟؟ منقص عليك ف الفلوس بش تجيب لاب توبك وتاخد الفلوس ؟؟ يااخي اتكلمت وقلت تاقصيني رلني فتختلك الخزنة وقتلك ارفع قداش ماتبي
    رامي انفعل وقال - مش هكي يالياس مش هكي ..... سحب عليا واحد ف الطريق ... قالي طلع اللي عندك ... مديتهمله من غير مانفكر ... ولاب متاعي كان ف سيارة .... مسحت البيانات وجبتهولك ... توقعت انك بتنقل بيه وبتجيبه
    الياس - توقعت ! قتلكم معش تتوقعوا ف الخدمة الحرفة وووه بتجلطوني خلي نمشي انا للكابو خلي يقتلني والا يحبسني
    علي - غير اصبر خلينا انفكروا
    الياس - لالا ماعندي مانفكر ...كل لحظة انعطلها اهنا تخلي حسن يشك فيا اكثر ....
    <><><>
    حسن - هيا يامصعب البلي تعالا فيسع .....
    ضاوي - الخوف مش من مصعب ... الخوف من الحلوف لياس
    حسن - تو ايجي ...
    ضاوي - تعرف .... مفروض ناخدوا بصمات الجهاز والاه بالك يطلع حق منا وفينا
    حسن - فكرة حتى هادي ... ونخلوا كل الموجوظين يبصموا ونجيبوا خبير بصمات
    ضاوي - وبهكي كان منا وفينا حينكشف وحنوصلوا لجهاز
    حسن - اتفكر مليح انت ...
    اعطيني حبتين اسبرين راسي لايدة عليه الصفرا
    ضاوي - استنى الشوشة يتصل .... الو يسعد يومك كله ياطيب ... شن الامور ....لا والله عال العال .... ادلل يابي ادلل ... مرحبتين بيك ....تم تم مايكون خاطرك الا طيب ... ماشي الحال ... امنور بوجودك ياخوي ... ماشي الحال سلامات ...
    حسن - شنو منو
    ضاوي - الشوشة قالي السبوع الجاي بنجيكم وبنتفاهم معاكم ف موضوع
    حسن - ماقالش موضوع شنو
    ضاوي - لا ابدا
    حسن - ان شاء الله خير
    إلياس - مسا لخير
    حسن - قول مسا الزفت مسا
    ال@#$//
    إلياس - غير شن فيه بس
    حسن - ثعمز قعمز ...
    إلياس - وهادي تقعميزة
    حسن - ف الجديد ايصبح اصبخ تعال اهنا
    إلياس - مش ديما فيه خدمة يخطموا ايام نبدى غير م وجهي ف وجه مصعب والجماعة
    حسن - وان يكن .... اهو اتصير حالات طارئة فجاة ... شن بنلحق نطلع ندهم والا نتصل بحضرتك ياافندي ونقولك تعال
    إلياس - عندك حق خلاص كل يوم انجي
    *واهنا خدي حسن سيجارة فاخرة وولعها وواسى خصلات شعره الطوال وشاورله بيده وهوا ماسك السيجارة وقال - بسيف عليك بتجي ... لحد الان مبعد كل الشكوك عليك ... ومانبيش نشك فيك ..... لكن قسمآ يالياس تطلع انت اللي ...
    قاطعه الياس وقاله - هي هي هي شن نطلع انا ومش عارف شن هوا ؟ اعطيني سبب واحد ايخليني انخونك ياكابو ....
    * نفث دخانه ويشوف للياس العين ف العين
    (شنو ياودي حسه زبطني )
    حسن - اوكي ...
    الياس - احكيلي شن فيه
    *حسن حكي كل التفاصيل ل الياس
    الياس - ايواه ايواه ايواه ....
    حسن - ريت الفالح او ...
    الياس - تي معلم اللي دار هكي
    حسن - لكن صدقني حيطيح ف الفخ ضاوي فكرلي ان ناخدو ب
    ضاوي - هئ احم
    *تلفت حسن لضاوي .... ضاوي دارله علامة متع اسكت *
    اليلس - شن بتاخد
    حسن - ايه ولا حاجة نستنى ف مصعب بس...
    (شن كان بيقول وضاوي اشرله بش يسكت ؟؟؟ مخططين لحاجة واضح ..والمشكلة كان بنزيد بنصر ونسئل حيشك فيا ضاوي يعتبر اذكى من حسن ويلقطها عالطاير ... وبرضوا مانقدرش نسئل ع مكان الاب .... مية ف المية حيقولي شن دخلك .... استر يارب ... نظرة ضاوي ماتريحش بكل )
    *قعد للحظات سارح ... وساد الصمت المكان ... وخش مصعب قطع هالصمت
    مصعب - اهو حصلت يالافندي
    حسن - طيب فيك جيت
    مصعب - من محل لمحل بش حصلته .... شج لياس وينك يامان معش تبان
    الياس - معدلة ياباروو ...
    حسن - هات الشحن هات ....
    مصعب - هاك اه
    *خدي حسن الشحن وبسرعة فتح الخزنة وطلع الاب وحطه عالطاولة وركبله الشحن .... وفتحه .... عطل ف الفتح
    ضاوي - بما انه عطل ف الفتح معناها قديم
    حسن - وبما انه قديم معناها فيه حاجات
    الياس - وبما انه فيه حاجات معناها حنحصلوا ع صاحبه
    (ااااخ اااخ كان ماكملتش هالجملة معاهم ... يتلفتولي هما الزوز)
    مصعب - وكان حصلنا ع صاحبه بنشردوه
    حسن - نقتله ونقتل عيلته كلها
    *حس الياس هالكلمات ف وسط وسط خاطره ... مايحبش حاجة تخرج عن السيطرة ... ايحب اي حاجة ايديرها اتكون تامة وبدون عواقب *
    حسن - طيب فيه فتح .... مدلي الماوس ضاوي
    مصعب - وانت من امتى تشتغل بالماوس يالافندي
    حسن - ماهو على هلطر البص...
    ضاوي - هئئئ حممممممممممم
    حسن - مزال تسئلني ع حاجة يتمصعب نوريك ضم فمك واسكت
    مصعب - ماشي يافندي
    (امبكري قال ب ... وتوا البص ... شن يقصد .... بصباص ... باص .... بصارة .... بصمة ... ايه ..ايه ايدور ف بصمات عالاب توب ... والله يالكابو مافيش حد فاهمك اكثر مني .... والباين ان الحقير ضاوي هوا اللي اقترح عليه ههههه عليهم الطوير ينادي .... مسحته الاب توب بقماش هوا والفلاش يحسابوني نلعب ف سوقهم )
    حسن - مافيشي شي ياضاوي
    ضاوي - تره هات فيه لقطة اخفاء الملفات ....
    حسن - زود ديرها
    (مشكلتي الكبيرة ضاوي ... كان تتخلص منه حسن ايولي ف الجيب .... لكن كيف بنتخلص منه ... انا قتل مانقتلش لكن الا مانلقى حل)
    ضاوي - مافي شي
    مصعب - مرة سمعت ان فيه برامج باك تو لايف ... ايعيد كل الحاجات الموجوظة عالجهاز
    حسن - حق او ؟
    مصعب - اي
    حسن - به كيف زود ديره
    مصعب - والله مانعرف الحق شفته ف برنامج على قناة ننشر جرفك والا نشير جارفك حاجة زي هكي
    الياس - ناتشيورال جيرافيك
    مصعب - ايواه هيا
    حسن - به كيف الراي تو نرفعوه لمحل صيانة ؟
    مصعب - اي بالك يعرف متع صيانة
    (يس وبهكي نقدر نمشي لصاحب المحل ونلخبطه وناخد الجهاز حتى ولو بقوة السلاح وانا متلتم )
    ضاوي - انت مازال بطلعه الجهاز برا ؟؟ ريحنا خير مايريح ونفقدوا طرف خيط ... فوق من هكي نبوا اللي فبالي بالك ...
    *يقصد عالبصمات*
    (لعنة الله عليك ياضاوي ... لالا انت امظلم مش ضاوي حرام فيك الاسم)
    الياس - به شن رايكم انجيبلكم مهندس صيانة كويس ومضمون
    حسن - مضمون مضمون ؟
    الياس - مضمون وشاطر بكل يطلعلك الاول والثاني
    حسن - خلاص به ... مليح بكل جيبه
    الياس - توا والا بعدين
    حسن - توا برا جيبه
    ضاوي - اتصل بيه و ايجي
    ( ضاوي مصر اليوم انه ينرفزني ... شن الحصلة هدا رقم محمد ماعنديش )
    الياس - مداير حادث المدة اللي فاتت وتلفونه رايح منه ..
    حسن - مش مشكلة جيبه .... برا امشي شن تستنى
    الياس - اوك ... سلامات ...
    <><><>
    رامي - والله ماقصدي ياعلي ... ماتوقعتش هكي ايصير
    محمد - يستر الله وخلاص
    علي - اااخ ياصاحبي ان شاء الله ربي يحفظه وماينكشفش ...
    هيثم - ساويكم
    الكل - وعليكم السلام
    هيثم - شن فيه شغلني البوس ..
    علي - تو نشرحولك بعدين ... خود هذا مفتاح شقة رامي .... قوله يارامي وين حاط حاجاتك المهمة
    هيثم - فهموني قبل مانمشي
    علي - هذا ياسيدي *حكاله شن صار*
    هيثم - فلقتنا يارامي
    رامي - مش ناقض ولا كبمة بجديات سمعت وبهدلني لياس لين قلت ياسر
    هيثم - به ماعلينا وين حاط حاجتك
    رامي - ف دولاب ... فيه صندوق .. فيه كل اوراقي وفيه هارد ديسك فوسطه كل شي يخصني ..
    هيثم - اوك حتمشي توا وان شاء الله مايطبوش عليا
    علي - يستر الله ....
    هيثم - هي سلامات
    حط رامي راسه بين يديه وقال - ورطتكم كلكم ... لياس وتوا هيثم ... انحس ف روحي فاشل
    محمد - ماتقولش هكي يارامي اتصير لغلطات احيانا
    علي - ماتقساش على روحك برادر و ان شاء الله خير .... اهو ليلس يتصل
    رامي بتوتر - رد رد
    علي - ايواه ...
    الياس - محمد قاعد عندك
    علي - ايه
    الياس - قوله برا لعمارة المقابلة لمركز روايات لوزة
    علي - علاش
    الياس - بناخده معاي لجماعة الكابو ...
    علي - ئه علاش
    الياس - مش وقت شرح
    علي - اوكي اوكي ... سلام
    رامي - شنو طمني
    علي - قالي بناخد محمد بناخده لجماعة الكابو ... وماقالش السبب
    محمد - انا ؟؟؟
    علي - ايه
    رامي - وحتى محمد خش ف الطبيخة ... وووه عليا والله قريب نسحب ع روحي ونفكم مني ... تعبت من كل شي
    محمد - وسع بالك ياصحيبي معليشي تعرفني اندير اي حاجة ع خاطرك انت اكثر من خوي
    ☆ عيش مع إللي يشتري الفرحة معك مايتخلى عنك ولا يمل ولا يثقل عليك ☆
    رامي - والله ماني مسامح روحي كان صارتلكم حاجة سوا انت والا لياس والا هيثم
    محمد - استهدى بالله يابرو ... هي نتلاقوا بعدين ان شاء الله
    *طلع محمد وين ماقاله الياس وخش وقف ف العمارة يستنى فيه لؤن جي وزعميته خش للعمارة ركبله بعدين طلع هوا وياع خداه وهذا كله خوفا من ان ضاوي بعث وراه شخص يراقبه ... *
    الياس - اسمعني الله يربحك ... حسن يبي شخص متع كمبيوتر بش ايرجعله جميع الموجود ف جهاز رامي ... فأنت كان عندك برنامج ايرجع ويمسح وقتي عندك
    محمد - لا عندي ايرجع وبعدين مسح يدوي
    الياس - به دير رايك المهم ادير حاجة حذف نهائي
    محمد - عندي برنامج يخلي الجهاز غير قادر على الاستعادة بأي شكل من الاشكال
    الياس - خلاص ديره ... وقوله انه مدايريله برنامج منع استعادة
    محمد - اوكين تم ..
    <><><>
    مصعب - لافندي جاني تلفون توا من واحد صاحب وقالي بيدهموا عالافندي متعك
    حسن - منو هادو
    ضاوي - منووو
    مصعب - مش عارف ماقاليش اسم
    حسن - خلي الشباب كلهم ع استعداد .... الو ... هنقر ...
    الياس - اهو جاي انا ومعاي الولد
    حسن - وزعه وزعه وتعال ... فيه من بيهد علينا
    الياس - اوكي جاي ف طريق .
    محمد - شن فيه
    الياس - انزل محمد وخود تاكسي
    فيه من بيهد ع حسن
    محمد - اوك Boss تيك كير ..
    *ماهتمش الياس بكلمات محمد الاخيرة ... كل فكره مشدود حول كيف بيطلع رامي من هالموقف... رجع الياس للكابو ولقي الكل متأهب ومستعد ... مدله مصعب كلاشن
    الياس - اعطيني ال pk معش نحبهم كلاشنات
    مصعب - اوكين .... وهذا بي كيه ياسي .... وهادو رصاصات متعه
    الياس - منو بيهد ؟
    مصعب - مانيش عارف .... اهو وليد ايصفر الباين جووو ...
    حسن - هنقررررر هنقرررىر
    الياس - ايه ايه سمعت اهو ف المخزن ناخد ف سلاح
    حسن - فيسع اطلع لمكانك ....
    الياس - اهو طالع
    (يستر الله بستره ... ان شاء الله مانقتل حد وتجيهم رصاصة طايشة ... والا تجيني رصاصة طايشة )
    *واهنا طلع الياس ف الوسعاية ... وخدي ساتر وراء السور وبجنبه مصعب ... وكل شباب ف تركينة ... وبعض منهم ع 14.5 ...
    صارت رماية بين المجموعتين ... وامتدت هالمعركة من العشية لبعد المغرب .... مات فيها من مات ... وانصاب فيها من انصاب .... هدا من غير Rbg اللي هشم اغلب مكان حسن .. فجأة ... لاحظ ان كل مرة شخص يطيح وينصاب ... وينصاب ... قعد يشوف فيهم جماعته كيف ايطيحوا واحد وراء الثاني ...معش فهم شي .... قام راسه يدور ف قو البنايات ... لقي قناص
    الياس - قناااااص قناص بناية 31
    ومع الكلمات هادي جت رصاصة ل الياس من القناص واتصاوب بيها ...
    #شن رايكم ف يتبع توا ههههه اكيدة مش وقتها بكل #
    <><><>
    مي - اااااه ووووووووه لالالالاا ليااااس قدامك .... استغفر الله العلي العظيم ..... استغفر الله العظيم
    جت عيشة تجري ل مي اللي كامت راقدة فوق الكنبة اىىي ف الصالة و وقتلها - خيرك شن فيه سمله سمعتك اتصيحي
    مي - مش عارفة ... ك كنت نحلم توا شفت ان كنت ماشية ف سيارة مع الذيب و رابطلي يديا ... وفجاة ....جي شخص قدامه و ضربه بسلاح ..الرصاصة جت ف راسه ...
    وانقلبت بينا السيارة ... راسي كله و وراسي كله دم ....
    عيشة - اتعوذي من الشيطان كابوس هدا .... قتلك ماترقديش ف العشية مش باهي نوم بعد العصر
    مي - بس احلامي تتحقق ...
    عيشة - شن خفتي عليه
    مي - اخر همي الياس ...انا نفكر ف روحي ....لان
    *دمعت عين مي وهيا حاطة ايدها ع فمها .... - لان حلمت بحمدي ف الليلة اللي قبل مايموت فيها ... يعني بنلحقه يمة والاه ... بنلحقه هكي ..
    عيشة طبطبت ع كتف بنتها وقتلها - بعيد السو عليك .... بعيد السو عليك ... بالك لياس ...صارتله حاجة الله اعلم
    <><><>
    فاصل اعلاني 😁 ~~ انت زهئقت من المخداية اللي عندك😧؟ بتعملك وجع رئبة😭 ... ومش مريحة خالص😛 ... الحل عندنا 👌اشتري مخداية من مصنع لوزة للخدديات مريحة وسلسة وتخليك تنام واتفوت الشغل والمحزرات والمزاكرة😌 ومش بس كدة دي بتنشر رايحة قميلة اوي ف الاوضة كل ساعتين .... لطلب يرجى الاتصال على سبعطاشر خمسطاشر تمنمية راحتك اتهمنا يابشا 😄👍
    <><><>
    الياس - احيييييييه .... @#$&/$
    مصعب - خيرك انصبت ؟
    الياس - ايييه
    مصعب - خش للمقر
    الياس - حفت ساعد يدي اليسار ... على شوي جت ف صدري ...وليد ... ولييييد اضرب فوق فوق بناية 31
    وليد - اوكين
    ركز الياس ف سلاح القناص بعيونه الثاقبة وشاف جنبه وقام الرصاصة وقعد يشوفلها وسرح ويفكر بصوت عالي وقال - بولت اكشن دزقنيتد رايفل عيار 7.62 .. امريكي الصنع .... سلاح قنص بكاتم صوت 😬
    تلفتله مصعب بسرعة ووجه معبي ملامح تعجب - شنهووو زبطت السلاح من رصاصة 😳
    الياس - الهى الهى راه تجيك رصاصة طايشة
    * اتمكن وليد من ضرب القناص اللي فوق البناية ب 14.5 و بعد معركة طاحنة استمرت لبعد المغرب .... انسحبت المجموعة .... وهددت حسن بالمايك انهم حيرجعوا تاني ف يوم ما ..... الصحيح منهم انقل المضرر للمستشفى .... والياس ماباش يمشي يخيط الجرح تبعه .... اكتفى انه مزق تيشرت تبعه ودار بيه ضمادة
    حسن - شن توقعاتك من هجم علينا
    ضاوي - مش عارف ... وحاير بجد
    حسن - زعما الشوشة
    ضاوي - كان الشوشة معقولة بيتصل بيقول بنجيكم بعدين ايهد ؟؟ اكيد مش هوا
    حسن - شن قولك ياهنقر
    لياس - مش عارف ...زعما اللفعة ؟؟
    مصعب - امبكري لياس لما ضرباته رصاصة
    لياس بيغطي ع دوة مصعب - شن تتوقع يالافندي
    ضاوي - كمل يامصعب
    مصعب - عرف نوع السلاح القناص من الرصاصة بس
    (حسبي الله عليك يامصعبوووه الزفت)
    ضاوي - اووبا وشن نوعه ...
    مصعب - بوليتا شكون نقد رولف
    ضاوي - 😳 من بوليتا ومن رولف هدا 😳
    حسن - هههههه شن اسمه يالياس
    الياس - بوليت اكشن دزقنيتد رايفول
    مصعب - اييييواه هوا هدا سطربه تسطريب ومعاه بلد الصنع و عيار متعه اتقول خبير اسلحة
    ضاوي تلفت ل الياس - ومنين تعرفه انت الاسلحة هادي
    الياس اتخزرط وسكت لثواني ... مش اي شخص يقدر يزبط نوع السلاح ومن رصاصة الا شخص متدرب تدريب خاص.... وخصوصا انه معروف بين جماعة الكابو انه شخص عواطلي ورديف *
    الياس - شوية ثقافة من هون لهون هههه يعني تقرير على قناة في نتشيورال جيرافيك
    ضاوي - اهااا قلتلي ....
    مصعب - مش هوين ياهنقر تاريتك
    الياس بيغطي ع دوة مصعب وقال - لكن ثقوا وتأكدوا اللي هد علينا اليوم تاااجر سلاح مش اي حد يجيب سلاح هذا ...
    حسن - تاجر سلاح ....
    الياس - اي
    *خدي المدكرة حسن وفتحها ويقرا من تجار السلاح ...
    هما تلاتة اسامي ... اللفعة .. الكاسكو ... البنانوطي
    ضاوي - بنانوطي ....
    حسن - شن خلاك تعرف
    ضاوي - في بداية العام لما سطينا ع مخزنه بعت رسالة وقال يوم ما كابو يوما ما ...
    حسن - صحة ليك ياهنقر صحة ليك
    *عد ضاوي لبرهة من الزمن ينظر نظرات ريبة وشك ل الياس مش مقتنع ان هالرديف يعرف اسم اسلحة وبدقة بالغة ... تجاهل الياس نظرات ضاوي وقعد يهدرز مع حسن
    حسن - انا حنبات اليوم اهنا ... وغدوة ان شاء الله جيب صاحبك و حنتصل بقريبي يخدم ف الجنائية خبير بصمات
    ضاوي - ههههئ حممممم
    حسن - تقدروا اتروحوا توا حتى السهرة ف الشك يصير منها .... نخلوعا لغدوة
    الياس - اوك سلامات
    *طلع الياس وركب سيارته ... ركب شفرته الثانية وبمجرد ركبها جاه اتصال من علي
    علي - هاياراجل شغلتني عليك من بكري نبكبك قريب هديت على الكابو
    الياس - رد بالك ان شاء الله نغيب يومين تلاتة ماتحطش فبالك هالفكرة
    علي - به قولي شن صار ..قالي محمد هادين عليكم وهكي
    الياس - لالا الامور طيبة ... تو نرزوا غدوة
    علي - به شنو بتجي ؟؟ بننقذوا عمتد الليلة
    الياس - تاعب ومرهق ياعلي ومتصاوب ومش حاى قادر نوقف على حيلي والا انقولك اهو جاي وخلاص
    حس علي بنبرة التعب واضحة على الياس فقاله - سلامات عليك خلاص مش مشكلة ارتاح اليوم لخاطفين عاطيين يومين مهلة لمالي المخطوف
    الياس - اوك خلاص غدوة ام شاء الله ...ماشي الحال سلامات ...
    *ولع سيارته ورجع للفيلا وكانت الساعة قريب 12:30 ....فتح الفيلا وخش يكر ف رجليه كران يشعر بالتعب ... خش للمطبخ لقي سندوتشات مفروم موتيتهم عيشة كلاهم وشرب عصير وركب لداره ... ارتمى عالسرير وغمض عيونه وحط يده غطى ع عيونه وايفكر
    (نظرات ضاوي غريبة انحس فيه شك فيا .... كله من مصعب الكلب ... خليني منه ضاوي مشكلتي ف رامي توا ... نخاف انهم يجيبوا شخص غير اللي انا بنجيبه حيه ع ام اللقطة والله نتوقع ضاوي ايد ... ايد ديرها ... ) بعد عدة لحظات خدي النوم الياس ...
    *خشت مي بتسلل وفي يدها البخاخ قربت منه وفشششششش بخت البخاخ واهنا ماانتبهتش مي ان فتحت البخاخ موجهة لوجها ادروخت مي ونثانتر رداد من البخاخ ل الياس اي ان هما الزوز استنشقوا من البخاخ ... وطاح البخاخ من يد مي عالسرير ....وعيونها اتشقلبوا وارتمت بجنب الياس
    * بعد ساعة اتكركبت مي بجنبه ووصلت لحضنه وصارو قراب ع بعض بشكل لا يوصف ...
    الياس ~~اهواه الاب توب ... خلي ناخده فيسع بسرعة قبل مايشوفني حد ....
    *وف خلال ماهوا يعاند يبي يفتح الخزنة .... جاه صوت من وراه ~ كنت حاس انك ورا هذا كله يالياس
    * تلفت الياس لمصدر الصوت وكان الضي معتم ع وجهه وجاي غلى اغلب انحاء جسمه ... حاط يده ف جيبه ويده الثانية فيها دخان وينفث فيه بقوة .... اتقدم الياس ... ودف عالجنب وشد الاب توب ف غمره شده شدة قوووية وطلع يجري من المقرررر يجري بكل ما اوتي من قوة .... وضاوي يجري وراه
    * قامت مي راسها وف عيونها دمووع ... لقت امها قبالتها فتحتله يديها وقتلها ~ بنتي ... حبيبتي ... انا نادمة اني ماصدقتكش ... انتي ماعمرك كدبتي عليا ف حاجة ... تعالي يامي
    *فزت مي لحضن امها وهيا تجججري واضبطت امها بقوووة وامها تضبط فيا بقوووة
    مي ~ اشتقتلك يمة لما تحضنيني هكي بكل حنان الحمدلله انك صدقتيني الحمدلله
    #طبعا الزوز يحلموا وحتعرفوا علاش 😁 👇 #
    *فاقت عيشة من نومها مع ساعة 4 ف نص الليل ....وناضت بتخش للحمام ... خطمت من جنب دار الياس كان الباب مفتوح... توقعت ان الياس مازال ماروحش وان بنتها بروحها ف الدار وتستنى فيه ... طلت على الدار لقت مي والياس حاضنين بعض بكل مااوتوا من قوة حضن لا صار ولا استوى امتع تكبيد وحب ورياف لاصقين وكأنهم تؤم سيامي .... وكأنهم عشاق كا قيس وليلى .. روميو وجولييت ...
    ....ضحكت ف سرها عيشة وسكرت عليهم الدار...
    مع تسكيرة الباب فاق الياس ومي ف نفس اللحظة ولقوا نفسهم حاضنين بعض ومكرشين ف بعض وكل تفصولة من تفاصيل الوجه مقابلة للأخر💋👄 نتيجة الحلم اللي كانوا يحلموا فيه كل واحد منهم
    الياس - 😳
    مي - 😳😳
    الياس - 😳😳😳
    مي - 😳😳😳😳😱😱😱
    لوزة - 😍😍😍😗 غير زيدوا شوي مارينا شي ههههه 👏💃 😂شن ردة فعلهم من بعض وهما ف هيك موقف ... هذا اللي حنعرفوه ف الحلقة القادمة.


    يتبع....

    جميع الحقوق محفوظة للمؤلفة لوزة من صفحة روايات لوزة ليبية

    لمتابعة صفحة المؤلفة علي الفيس بوك : من هنا
    ,
    @مرسلة بواسطة
    كاتب ومحرر اخبار اعمل في موقع روايات كوريه متنوعه .

    إرسال تعليق