الفصل السادس من رواية مهمات سرية

الفصل السادس من رواية مهمات سرية

    الفصل السادس من رواية مهمات سرية

    رواية مهمات سرية الفصل السادس الجزء الأول



    لهجة الرواية: ليبية

    رواية من روايات لوزة الليبية


    هيا بنا لمتابعة الفصل السادس معاً.


    وقفت عيشة ودفت بنتها وف عينها دمعة الم وتلفتت ل إلياس وقتله - شن درت ف البنت ! شن درت فيها اتكلم ...!
    *ولع دخانه إلياس ونفثه على هيئة حلقات ونظر ل عيشة نظرة ماكرة ... وابتسم ابتسامة صفراء ....
    *تقدمت عيشة ل الياس وتضرب فيه على كتافه وتبكي وتقول - حرام عليك ...كسرتني وانا مدايراتك زي ولدي ونقول عليك باهي وكويس .... منين بنلقاها من هالدنيا اللي مشقيتني ... والا من بنتي اللي جابتلي العار معاك !
    *مي تبكي وترعش - ل ل لا يمة ...افهمي مني ... والله هذا مجرم وهوا اللي حبسني عنده
    عيشة تلفتتلها واشرت بيدها-
    اسكتي
    *وعطتها كف مدرجح 👋... شدت مي خدها وهيا تتألم ماحستش الكف بقدر ماحست ان امها ماصدقاتهاش*

    عيشة - اسكتي ياكدابة ...ياخسارة تربايتي فيك .. وسنين عمري اللي ضيعتها وانا انكبر فيك.... اتطلقت بعد عام من زواجي وشفت الظلم من عيلة بوك ومن عيلتي .... وكان اللي مهون عليا الهم هوا انتي لكن طلعتي هم وعار ياريتني عقمت وماجبتك
    *طاحت مي ع ركابها وتقول - والله يمة مادرت حاجة وحق ربي الا هوا حابسني عنده ... على خاطر مجرم ومتع عصابات خافني نقول عليه
    عيشة - ياسر بلا كدب ياسر ... الله لا يسامحك يامي الله لا يشامحكم انتو الزوز .... ااااه ياحويلتي السودة ....
    *تلفتت ل إلياس تاني وقتله - اتجوزهااااا واستر علينا على الخبزة والملح اللي بينا انت تعرف ماعندناش ظهر
    *نظر إلياس نظرة لمي متع سمعتي *
    اغتاضت مي من نظراته ومن كلام وامها وقال - شن اتقولي يمة والله ماصارت بينا حاجة
    عيشة اتكشخ - اسكتي انتي ✋ ... تربح ...تربح يالياس استر علينا وتجوزها حتى بالسر انا راضية المهم اتكون متزوجة حتى اطلقها بعد فترة المهم ماتكونش هكي لاحقنا العار
    * مي حطت وجها بين يديها وتبكي بصوت عالي ...
    مسح على شعره إلياس وقالها - صعب ...اسف
    مي - يامجرم خزيه عليييك
    عيشة - اس حتى كلمة .... اتجوزها يالياس تربح على خاطري
    إلياس - اممم لكن خلي نسمع رايها ... بالك مش ملزومة بيا انا مجرم على حد قولها
    عيشة - مش ملزومة افعينها مش بكيفها ....
    مي - لا يمة راك ظلمتيني مانبيشي راهو
    عيشة - بسيف عليك ومش بكيفك استري العار متعك
    مي - ارفعيني ...ارفيعني بدكتور واهو نتاكدو وحتعرفي

    (حي هادي ماحسبتلهاش ...قولي لا ياعيشة قولي لا )
    عيشة - مصح وجهك وخلاص مصح وجهك ...ضمي فمك حتى كلمة حمارة يابنت الكلب ....طلعتي زي امالي بوك عافنة خزيه ....اتزوجها يإلياس تربح ......
    إلياس - باهي على خاطرك ياعيشة موافق.... بس بشروطي
    عيشة بلهفة وبدون تفكير - شن شروطك ؟
    إلياس - غدوة نكتب عليها وفي المحكمة ...
    عيشة - به كويس موافقة خير البر عاجله
    مي - حرام عليك يمة حرام عليك
    عيشة -حرمت عليك عيشتك
    إلياس - عرس مافيش ....لا اتقوليلي نبي عرس لبنتي ولا واحدة ...
    عيشة - به باه
    إلياس - وطلوع من باب الفيلا ممنوع
    عيشة - به
    إلياس - تلفونات مافيش ...
    عيشة - به
    إلياس - وهادو شروطي
    عيشة - باهي خلاص غدوة ان شاء الله نتلاقوا ... خلي انروح بيها تو
    إلياس - ههه شن..كنت انقول توا ... طلوع من باب الفيلا لا ... باتي معاها اهنا وغدوة الصبح نمشوا نعقدوا ف المحكمة
    عيشة - باهي به خلاص اتفقنا
    *واهنا وقفت مي معش تحملت الكلام اللي يقولوا فيه فاساخت ....
    مشتلها تجري عيشة ....مي مي ....نوضي عارفاتك تتزعبني ...
    نوووضي .... خلي نجيبلها اميا نرشلها .... مشت للمطبخ عيشة ... ووقف الياس وانحنى وقامها ف غمره .... وقعد يشبحلها للحظات بالبيجامة اللي ختارهالها ..
    حطها عالكنبة ... وواسالها خصلات شعرها نحاهم من جيهة فمها ... جت عيشة بعد الياس شوي ...و بختلها امية وتستنى فيها اتفيق

    عيشة - لواه عليك هكي لواه ... بش كان طلبتها مني خير
    إلياس - مانبيش نحكي ف الموضوع .... تبي غدوة تستري عليها هاوينه ف المحكمة ماتبيش سلامتكم انتو الزوز
    عيشة - به به خلاص .... نوضي يامي
    *فاقت مي بعد دقيقتين ... لقت إلياس مقعمز قبالتها ....شدتها يدها نحت مي يد امها من فوق يدها ووقفت و شبحت ل إلياس بكل حقددد وكره ...
    عيشة - عرفتك تتزعبني
    مي - حسبي الله ونعم الوكيل فيك يالياس ولا عمري حنسامحك.....
    عيشة بتعصب - قداش مرة بنقولك اسكتي انا !
    *سكتت مي ومسحت دموعها وتشوف لباب الفيلا ...اتفكر انها تهرب ...
    لاحظها الياس لوين اتشوف فقالها - عارفك فاش اتفكري ...فلهذا نحيها من بالك ...
    وكيف بتتحرك ناحية الباب وقف وشدها من يدها ...
    إلياس - استانستني هلبا حسك
    مي - والله ماتستحي انت عارف وانا عارفة ان اللي قلته مافيش منه
    إلياس - لا مش عارف شي ...بالك كنتي تحلمي
    *فلتت يدها من يده وشبحتله شبحة بؤس واحتقار تام😒 ... وهوا شافلها نظرة نصر 😏 وكأنهم دايرين عركة عيون 👀👀
    (قلتلك انا مش بكيفك ...😬 )

    {اتفه منك ماريتش 😠}
    (ماتشبحيلش هكي )
    {حتى الكلب يتحشم ايدير اللي درته يا اناني مغرور شخص عديم الاحساس }
    *تلفتت مي وف نفس اللحظة تلفت الياس عليها ... ورجعت لدار اللي كان حابسها فيها وطربقت الباب ...

    عيشة - لا حول ولا قوة الا بالله ... مش مسامحاتك يالياس .... غير كان قلتلي بس انك تبيها وتبي تتجوزها راني عطيتهالك
    إلياس - اياح عاد خلاص اهو بنطببوا الموضوع ! .... انا بنركب ناخد دوش وبنبدل وبنطلع .... بنتك اهنا تقعد فاهمتني ... مش نلقاك امطلعتيها
    عيشة - لالا ماعندي وين بنطلعها
    إليلس - والا نقولك ... احسن شي نسكره الباب بالمفتاح .... ماتخافيش عندها كل شي داخل
    *عيشة حست بحسرة لكنها وافقت على كلامه وسكتت خوفآ من انه يغير رايه ومايتزوجهاش ..خنقتها العبرة وناضت اتركنت ف المطبخ بتبكي... طفى إلياس دخانه ف الطفاية .... ووقف ماشي للباب .... كيف طلع مفاتيحه بيسكر الباب
    فتحت الباب مي وقتله - والله انك خسيس 👈 .... انت شنو ...
    *وتأشر بيديها علامة شنو *
    مي - فهمني شنووو ...ماعندكش حس ...ضمير ؟؟ معقولة تطعني ف شرفي ؟؟؟ وقدام امي
    *ولا زال إلياس ساكت وماسك اعصابه عليها .... خلاها اتنفس مابداخلها من كلام *
    مي - يااخي خاف الله ... اتقي الله ف نفسك ...حرام عليك راهو
    إلياس - زواج حيكون حلال وفي المحكمة مافيشي اي حرام ...
    مي - كيف بتتجوز واحدة ماتبيكش مااطيقكش ماتحبكش
    إلياس - حتى انا نفس الشي لكن مع هذا بنتزوجك
    مي - انا انحب غيرك ... في قلبي شخص غيييرك ... انموت فيه موتان شن بتتجوز جسدي وقلبي وعقلي مع غيرك
    إلياس - ههههه تي غير من بيقربه جسدك يامكنسة حرشة
    مي - انت ذبيب نرجسي مغرور ... والله ماك راجل ولا اتجي راجل اصلا

    #####

    #####
    *اضايق الياس من كلماتها تعتبر مست ف ذاته ومع هذا تمالك اعصابه على قد قد مايقدر وقالها - معليش مش حنرد ع جملتك هادي ... مقدر ان كلامك هذا طالع ف لحظة غضب ..لكن معش تكرريها ..فمافيش رجل يرضى على نفسه هالكلمات ...
    مي - يالبرودك .... يااخي انت من شن مصنوع انت قاسي مايحسش ..... معقولة لهدرجة قلبك ميت ؟
    *ومع الكلمة الاخيرة إلياس فقد اعصابه .... وترددتله الجملة ف راسه من ماضيه.. قلبك ميت ...ميت ميت . ومن كان هادي الطباع اصبح بركان يفور ....
    شدها بيد واحدة من حنكها ويهز فيها يمين يسار وقالها - تعرفي مازال تعاوديها الجملة هادي وديني اتشوفي مني حاجات ماتسرش .... والله والله العالي ف سماه نخلي حياتك كحلة سودة جحيم احمر ... تتمني انك مانولدتيش بكل ..
    شدت حنكها مي وقعدت تشبحله وتبكي .... وهوا يشبحلها بكل غضب ..
    *دفها للخلف ف الدار وجبد الباب طربقه بكل ما اوتيي من قوة وسكر بالمفتاح ..... ارتمت مي عالارض تبكي ... حست بالمرارة والقهر ..

    {معقولة هكي يدير وصلت بيه الوقاحة انه يدير هكي ... والكارثة ان امي صدقاته ....كدبت بنتها وصدقت هالقرد .... ااااه ياقلبي ... حسبي الله ونعم الوكيل فيك .. الله لا يسامحك لا دنيا ولا اخرة ..... }

    *فاتت ساعة ورا ساعة ومي لازالت تسحن وتبكي ... وامها مقعمزة ف الصالة تبكي واتنوح على حظها...

    مر الوقت رزين عليها حاولت ترقد هربا من الالم والقهر و ماقدرتش ....

    ☆‏ليس دائمآ نستطيع ان نهرب من مشاعرنا للنوم... احيانا تكون هالمشاعر موجعه لدرجه ماتخليك تنام ☆
    وصبح الصبح وبعد جهد جهيد خداها النوم بعد صراع طويل من القهر والبكاء والافكار السوداء ....

    <><><>

    *فاق الياس من نومه وحاس بنفسه مرهق ... نحى يرغانه ومشي للحمام بياخد دوش وبيصلي الصبح .... ساعة الا ربع و نزل لصالة تحت *

    عيشة - صباح الخير
    إلياس - صباح النور
    عيشة - وتيتلك الفطور ....
    إلياس - لالا مش خاطري هاتي فنجان قهوة بس
    عيشة - به .......... هي خود هي
    إلياس - صحيتي
    عيشة - شنو امتى بتفتح الباب لمي ....
    إلياس - وعلاش بنفتحه
    عيشة - وعلاش حابسها انت
    إلياس - بنتك ماتبيش تتزوج زواج رسمي ياعيشة .... وكان فتحتلها الباب بتهرب ... والا تبي تقعدي بالفضايح قدام الناس !
    عيشة - لالا ربي مايفضحنا ان شاء الله .... به افتحلها بش حتى تمشي معانا للمحكمة
    إلياس - مافيش داعي بنمشي انا وانتي وزوز من صحابي شهود ....
    عيشة - اااح به به .... خلاص تو نمشي نلبس عبايتي ونوتي روحي مابين شربت قهوتك
    *ماردش إلياس على جملتها الاخيرة ارتشف عدة رشفات من قهوته زي مامتعود يشربها ف بلكونة المطلة على جنانه .... ويفكر ف عدة امور وقطع حبل افكاره اتصال من علي ...
    إلياس - ايوه ...صباح النور يابرو ....لالا ف الفيلا ...اسمع قابلني المحكمة ...تو انفهمك كل شي وجيب معاك بطاقتك ....تو انفهمك بعدين ياعلي ...هي سلام ............ ايوه رامي ...عارفك راقد نوض فيسع بدل وخود بطاقتك الشخصية ونتلاقوا ف المحكمة ... لالا تو نحكيلك بعدين .... ماادوشش اطلع هكي .... تي دوش بعدين ف الصالة .... هي سلام .....تي هيا ياعيشة
    عيشة - اهو واتية هاه خلاص ....
    حط فنجان القهوة وخدي مفاتيحه من عالطاولة وطلع هوا وعيشة
    <><><>
    حنين - وينك امس ياسينو
    ياسين* مواليد 92 *- والله انشغلت ياروحي ...
    حنين 94 - انا جاية وبايتة ع خاطرك قلت بش نلقوا فرصة نهدرزوا وانت شي لساعة 3 وانا نستنى .... وبعدين شغل شنو هذا اللي ف الليل
    ياسين - اه ... قصدي انشغلت نلعبوا ف بلايستيشن انا والشباب
    حنين - حتى نتصل بيك خارج التغطية
    ياشين - معليش ياحلووو..هيا فيسع طيبي القهوة خلي بنطلع ...
    حنين - وين ماشي
    ياسين - عندي ماندير ....
    حنين - باهي به .....
    حياة - وينك ياغزيل ... امس لساعة تلاتة وانا نراجي فيك
    ياسين - نلعب مع الولاد وقلتلك معش تستنيني يمة
    حياة - شن معش نستناك اللطف !
    تقعد تتصرمح ف الشوارع لعقابات الليل ؟؟؟ وياريته حتى الدنيا امان
    ياسين - انقد روحي
    حياة - اتقد طياح سعدك ايدفوك اطيح رايح زي الخلال
    *حست حنين ان المشاحنات ختزيد فاطفت القهوة من عالنار وطلعت من المطبخ *
    ياسين - خلاص عاد فكينا من موشحات تره صبح النهار المبارك
    حياة - اتكلم باهي امك راني
    ياسين - باهي امي عالعين وعالراس لكن بش تقعدي كل شوية نقرز نقرز خيرك عطلت خيرك ماروحتش مش عارف شنو دو دو دو دوة كل صبح
    حياةة - ياهو انت ماتنفعش يااما انا معرفتش انربي واللي كنت خايف منهم امشوا وخلوني
    ياسين - اياح علينا عاد ولينا لدسكة الحزينة
    حياة - خزيه حقاني حسني ماعرفتش انربيك يافررخ.. ورباك الشارع
    ياسين - وووووه وووه ماتمليش من نفس الدوة كل يوم كل يوم .... والا علاش اناقش انا خلي نطلع وخلاص مش ناقص دواش راااااص عالصبح
    حياة - خزيه والله ماك نافع ياولد ...

    <><><><>

    وصل إلياس للمحكمة ... وخلى عيشة مقعمزة على كرسي ف الممر ... ووقف يستنى ف علي و رامي ....بعد عشرة دقايق جي علي
    علي - ها شن فيه ياراجل خزرطتني !
    إلياس - اصبر لين يوصل رامي بش نقوللكم ف مرة واحدة
    علي - ان شاء الله خير وخلاص متورط ف حاجة ؟؟
    إلياس - متورط ف ورطة لا ليها اول ولا اخر .... ورطة سودة نودة 😬 ...
    علي - نهار احرف شن فيه
    إلياس - اهو جي رامي
    رامي - السلام عليكم
    إلياس.علي - وعليكم السلام
    رامي - شن فيه ان شاء الله خير شغلتني ..
    إلياس - بنتزوج
    علي - اب شنو 😳
    رامي - بتتزوووج 😱😱😱
    علي - شن خطر عليك زواج ف يوم وليلة سمله الكريم 😑
    رامي - اتفقت تتزوج مع جنية ف الليل والا شنو 😱
    علي - شن ادير عيشة اهنا علاش اتشاورلك 😳
    رامي - قصدك بتتزوج هالعزوزة 😱😱😱
    علي - خزيه ياصاحبي طلعت اتحب العزايز 😳
    رامي - اييييو اعععع 😵
    إلياس - علاش خيرها اهي موزة
    رامي - بجديات تتكلم؟
    إلياس - ايه وعلاش لا ... لا هو عيب ولا حرام 😌
    علي - لالالا ناقص نوم واضح عليك والا متعاطي حااااجة مع جماعة هديكا ...
    رامي - متعاطي !؟ مش صاحي صح ؟
    إلياس - خير عمكم انتو الزوز من امتى نتعاطى انا !
    علي - لان تصرفك اهواه مش من شخص طبيعي
    رامي - واللي ايحير ان امس كنا معاك وماقلتش😨
    علي - وماجبتش سيرة الموضوع
    إلياس - خلاص انت وياه اقريب اطلعوني عن طوري راه 😬
    علي - خلاص هدي هدي ... خلاص خليه يارامي هوا حر
    رامي - معناها شهود احنا تو
    إلياس - ايه
    علي - هههههه لكن والله محتار بتلبسلك فيلو هالعزوز والا لا
    رامي - تي مكرمشة فيلو شنو اللي بتلبسه ....ياالله قفطان باصمة امبطش والا قفطان برودة 😂😂😂😂
    علي - العشق الممنوع😂😂
    إلياس - 😬 وديني كان ماتبطلش انت وياه من اللي تقولوا فيه مامظل الا عافجكم ع بعضكم 😬😬😬😬
    علي - خلاص دير رايك 😧
    رامي - 🙊🙊🙊🙊

    *اتم إلياس اجرائات الزواج ... وطلع برا القاعة *
    علي - مب...
    قاطعه إلياس وقال - ماتباركليش
    علي - به شن حتى مباركة لا
    إلياس - ايه لا
    علي - باهي قلت تبي بنت عيشة بدل الزيجة السكيتية اهياه على الاقل درنا عرس
    إلياس - انت عارف كويس اني زواجي منها لسبب اللي فبالي بالك ... استنوا شوي الكابو يتصل .....

    *بعد شوي إلياس ع علي و رامي ورد - اينعم ...
    حسن - وينك
    إلياس - شن فيه
    حسن - شن شن فيه هادي
    إلياس - سبحان الله امس قتلي غدوة وبعد غدوة بتهدي اللعب
    حسن - ماصارش زود فيسع عندي حاجات نبيك تمشي اديرها ...
    إلياس - باهي جايك هي ..... باهي مش معطل ...سلام
    (شن يبي هالبلوة هدا ... والله ماخاطري ف الخطف والهم الاحرف )
    *رجع لرامي و علي وقال - رامي بالله عليك وصل عيشة ل الفيلا ....
    رامي - اوكي ...
    إلياس - عيشة اهو تو رامي ايروح بيك ...
    عيشة - مدابيا نخطم عالدكاكين
    إلياس - وشن تبي فيهم
    عيشة قربت شوي من الياس وتوشوش - بناخد شوي مستلزمات ل مي
    *بعد علي ورامي وخلوهم يتكلموا*
    إلياس - ولاش المستلزمات
    عيشة - اللطف عريسا البينت
    (اهريسة على دماغك ودماغها واللحظة اللي جت فيها عندي ف الفيلا .... بنتك مكنسة حرشة ولا تطاق .... ماينفع ف البايد ترقيع قتلك مستلزمات قال .... ماوجعني غير المقدم اللي حطيته )
    عيشة - اسمله خيرك تتعارك مع ذبان وجهك .... لياس !
    إلياس - اوكي اوكي
    عيشة -بتفتحلها الباب اليوم والاه
    إلياس - مش معروف
    عيشة - عاد توا ولت مرتك ... تقدر تفتحه الباب ماعندها وين بتهرب
    إلياس - ساهل ساهل
    عيشة - به اعطيني المفتاح ...
    إلياس - وكان طلعت بنتك
    عيشة - لا مش حنخليها اطمن ماعندنا حد نمشوله ...غير نبيها تواسي حالها 😉...
    (اشي عزوزة الستوت كيف تغمز انا كان غمزت نص وجهي يتعكرش)
    عيشة - وتطلع تهدرز معاي حرام قعدت محبوسة
    إلياس بتنرفز - اوكي ....
    *طلع المفتاح من جيبه ونحى مفتاح دار متع مي ومده ل عيشة شداته عيشة لكن إلياس مازال مارخاش المفتاح وقالها - ومازالت انكرر ردي بالك تخليها تعتب برا باب الفيلا
    عيشة - اطمن اطمن ....
    إلياس - اوكي ........عليشي بنتعبك رامي ... خودها للمحلات هكي عالسريع
    رامي - عادي مافيش مشكلة ...
    إلياس - اوك هي سلام نتلاقوا بعدين ....

    *طلع إلياس من المحكمة و بوجهه ل مكتب حسن ... ولما وصل قبل مايخش يسمع ف ضاوي يتكلم ف التلفون ....
    حسن - لالا انا مايهمنيش يموت من ايموت المهم الموضوع يكون تام ...
    ضاوي - المشكلة ف فرقة الشياطين اهياه تخاف اطب علينا
    حسن - كان طبت نعطوهم قاذف ار بي جي .... تلاتة اربعة وراء بعض
    ضاوي - انموت ونعرف تتبع لمنو ياحسن انموووت موتااان
    حسن - الا مايديروا غلطة وينكشفوا من هما بالتحديد
    حسن - تي وينه لياس هدا عطل .... خلي نضربله
    (باهي اللي دوي قبل مايتصل)
    إلياس - سلااام عليكممم
    حسن - كيف بنتصل بيك
    إلياس - اهو جيت .... تو نبي نفهم امس قتلي اا
    حسن - ايه قتلك وماصارش .... حاجة زي هادي ماتتأجلش
    إلياس - اوك هات ماعندك
    حسن - عندي صفقة سلاح حتوصل اليوم ....
    إلياس - متعاملين معاهم من قبل
    حسن - اول مرة ...
    ضاوي - رد بالك منهم تجار السلاح راه وانت زابط
    إلياس - زابط زابط ... امتى توقيت
    حسن - ساعة 8 ياسي
    إلياس - باهي اوكين .... والمكان وين
    حسن - مازال ماعطانيش المكان ... قالي قبل التسليم بساعة انقولك وين
    إلياس - وكان يطلع كمين
    حسن - ماعتقدش ...
    إلياس - كم طالبين عليك
    حسن - اتنين مليون .... وبعد ماتجيب اتم الصفقة حنعطيك فلوسك كاش
    إلياس - اووكين ... خلاص عالساعة 7 حنكون اهنا ....
    حسن - لالا خليك اهنا ... حاس ان فيه من بيهد علينا ليوم
    ضاوي - علاش سامع حاجة
    حسن - لا بس مش عارف شامها من امس يستر الله وخلاص

    (اياح توا الساعة 1 معقولة الوقت هذا كله بنقعد اهنا خلي نبعت رسالة ل رامي
    >>>ها شنو كملت عيشة من المحلات
    <<<<ايه كملت وحطيتها ف الفيلا ..
    >>>باهي اوكي
    *مسح الرسايل ونحى الشفرة اللي يعرفوها فرقة الانقاذ وخلى الثانية تبع الكابو *
    عالساعة 6 ونص ..... حس إلياس بقلبه مغموم .... وان فيه شئ مش طبيعي ..
    إلياس - حسه ماحد حيدهم يالكابو ... خلي انروح ناخد دوش وناكل حاجة وانجيك
    حسن - باهي مش اتعطل
    إلياس - لالا عالسريع ...
    حسن - اوك برا ....

    *فتح الباب وخش قعمز على كرسي ولوح المفاتيح عالطاولة ونحى سلاحه من خسره وحطه بجنب المفاتيح ....قام رجليه وسندهم عالطاولة واسترخى ... وغمض عيونه .... خداه النوم لمدة نصف ساعة .. اتحرك لجننب ففاق شد رقبته من الخلف حسه متصلبة شوي مسح ع عيونه و شاف لساعة لقاها 7:15 .... وقف واتكسل و ركب لداره خدي دوش وفي خلال ماهو ياخد ف دوش ... حسن يتصل بيه
    ضاوي - هدي بالك ... مصعب قال احتمال لقيتها واهو مشي بيشدها
    حسن - وهوا مصعب وين يعرف شكلها اصلا
    ضاوي - اهو طلع يعرف ....
    حسن - ان شاء الله يشدها .... هالهرابة هادي ..اهو يتصل .... ايوه مصعب .... لقيتهاااا اووو حلو حلو.... برافوو عليك .... تعال اهنا انت وياها ب اقصى سرعة ....
    ضاوي - شن لقاها
    حسن - لقاها .... وهالياس هدا ياويله مني !

    <><><>
    (هيا ياسرني من الدوش خلي نلبس فيسع ونمشي للكابو اكيدة يستنى فيا)
    *طلع من الحمام ولبس عالسريع ومن كثر تفرفيشة نزل ونسي تلفونه فوق ...خدي المفاتيح من فوق الطاولة ....و بصدفة جت عينه ع دار اللي كانت فيها مي ...لقاها مفتوحة على وسعها مشالها لقاها فاضية استغرب ..
    (وين مشت هادي ... زعما ف الحمام)
    قرب من الحمام لقاه مردود ... ويسمع ف امية الدوش مفتوحة ... جاي بيطقطق لكن نزل يده
    (خليها تاخد دوش ع راحتها ... لكن وين عيشة معقولة انا نوصيها ردي بالك وهيا مخليه البيبان مفتوحات هكي تو كان هربت هي) ..
    طلع ع الصالة ونادى - عيشة ... عيشة ..
    (وين مشت هادي ؟ )
    إلياس - عيشة...ياعيشششة


    ةةةة .... عيشةةةة ....تي وينها هادي
    *شاف المطبخ وكل ديار الدور الارضي مالقهاش ...رجع ركب فوق وفتش كل الديار برضوا مالقي شي ....شك في الامر و خش لدار اللي فيها مي ... قرب من الحمام وطقطق على الباب ... واستنى ...طقطق تاني ...وتالت ورابع .....فتح الباب وهوا منزل راسه وعيونه ... قام عيونه هكي بشوي لقي الحمام فاضي واميا الدوش مفتوحة بروحها جن جنونه... وبدي يغلي وايبكبك اتقول بركان ....وعيونه فيهم علامات الغضب يشعلوا ناااااار .... كسر كل شي ف الدار و طلع عالصالة كسر وكركب كل التحف اللي الموجودة .... خدي سلاحه من عالطاولة وحطه ف خسره وبيطلع بش بيدور عليها .. 


    وين مشت مي ؟؟؟ وكيف طلعتها امها هكي برغم اتفقت مع الياس انها مش حطلعها ؟؟؟ والباين انها طاحت ف قبضة الكابو .... كيف بيتصرف الياس ....هذا اللي حنعرفوه ف الحلقة القادمة




    يتبع.... 

    جميع الحقوق محفوظة للمؤلفة لوزة من صفحة روايات لوزة ليبية

    لمتابعة صفحة المؤلفة علي الفيس بوك : من هنا
    ,
    @مرسلة بواسطة
    كاتب ومحرر اخبار اعمل في موقع روايات كوريه متنوعه .

    إرسال تعليق