رواية مهمات سرية الفصل التاسع

رواية مهمات سرية الفصل التاسع

    رواية مهمات سرية الفصل التاسع


    رواية مهمات سرية الفصل التاسع الجزء الأول


    رواية بلهجة: ليبية

    رواية من روايات لوزة الليبية

    هيا بنا معاً لقراءة الفصل معاً.

    محمد - اووووبس
    الياس - خيرك
    محمد - البرنامج اللي درته..........
    الياس - خيره ؟؟؟
    <><>
    *تيرررن ... اشعار على الايباد ...
    التقط حسن الايباد وفتح القفل .... ووقف مدهوش وانفتحوا عيونه علاخيررر
    ضاوي - خيرك
    حسن - مصعببببب مصعببببب
    مصعب - نعم نعم
    حسن - وتي السيارات والجماعة كلهم وقواذف الاربي جي بسرررررعة
    مصعب - هي هي ....
    ضاوي - تي شن فيه
    حسن بنبرة انتصار - اللي خنب الشنطة ...طاح ف الفخ وركب الفلاش ....
    <><><>
    محمد - البرنامج ... ااا ....
    إلياس بتعصب - تي خيره ؟؟؟
    محمد - فشل
    إلياس - حيييي علممممك حيه
    <><><>
    حسن - تجري ياضاوي اجري
    ضاوي - والله باسرع ماعندي
    سكر قبضة يده حسن وعيونه شراراة نار - صبرك بالله بس ياخانب ... والله حنطربقها فوق راسك اطربيق
    <><><>
    *ركب لياس سماعته ف وذنه ورد على اتصال علي - Boss الهدف اتحرك توا ... كيف طلع من مكانه
    إلياس - اوكي وللعلم بس البرنامج فشل رسمي واتحدد مكانا
    علي - اوووووف
    إلياس - تو نهدرزوا بعدين ...
    علي - اوك طمني شن ايصير
    إلياس - تم سلام .......ايوه رامي تم تحديد مكانا ..... خليك عند مفترق الطريق ... اعرفلي اما طريق حيسلك ..
    رامي - اوك تمام ف مكاني قاعد ...
    #كيف صارت هالخطة ... تعالوا نعرفوا ... قبل اكتشاف موقع الياس اي قبل نص ساعة من ان الاشعار ايجي ل ايباد حسن ... #
    محمد ~ ها شنو انشغله البرنامح
    إلياس ~ لا
    علي ~ علاش
    إلياش ~ مانبيش نجازف ونكشف مكان هالصالة ياعلي ... لو فشل البرنامج ثق وتأكد ان الصالة هادي حتولي قاعآ صفصفآ وان علي حينشد وحوشه حينحرق حرق
    علي ~ يالطيف
    إلياس ~ فلهذا .. لازم نديروها بعيد ف منطقة فيافي بش اقلها كان انكشف الكابو يلقى نفسه ف منطقة خالية
    محمد ~ هه مش حينكشف ... انت اتشك ف قدرتي وخبرتي يالياس
    إلياس ~ لكل حصان كبوة ... مهما حسيت روحك خبير اتجي غلطة من حيث لا تدري
    محمد ~ هه ... باهي به 😏
    رامي ~ محمد معش تناقش قلتلك ان من الاول اللي يقوله الBoss اتقول تم ... هوا ادرى بحماعته التانية
    محمد ~ باهي اوكين شن قلنا احنا
    علي ~ هدو هدو ياجماعة مانبوش نتعاركوا ... احنا زابطينك يامحمد خبير وهكي لكن كلنا نغلطوا انا في النهاية احنا بشر
    إلياس ~ عموما ...
    *خدي النقال وحطه عالطاولة وقال
    حنمشوا ف منطقة كدا ...
    *خدي اتنين نكاشات سنون وحطهم كمفترق طريق *
    إلياس ~ المكان حيكون فيه مفترق طريق ... رامي حتكون ف الطريق هادي... ادرك وراء الشجر و تستنى ف حالة انك شفت حسن خش من الطريق اليمين اتكلمني .... ف حالة شفت انه خش من الطريق اليسار اتكلمني ...
    رامي ~ تم
    إلياس ~ علي انت حتمشي لجيهة مكان الكابو وتستنى من اول مايطلع ويتحرك كلمني على طول
    علي ~ تم تم
    إلياس ~ وانت يامحمد حتكون معاي بالاب توب والفلاش
    محمد ~ اوك#
    *في الوقت الحالي *
    آلياس ل محمد - برغم قتلك اصبر لين انزيدوا انباعدوا لكن انت طلعت ماتسمعش ف الكلام و اللي فراسي بنديره وبتتبت نفسك ........
    متع كيف اتشك ف قدرتي وبتتبت انك عكس ماانا قلت
    محمد - مش عارف والله نحسابه الا البرنامج يشتغل
    إلياس - حتى ولو ... كل شي ف الشغل هدا يعتمد عالدقة ....مايعتمدش على الحسبان .... انت بتصرفك هذا كان ممكن اطيرنا وراء الشمس ...
    محمد بنبرة غضب - اوك سامحنا ..
    *تغاضى الياس عن نبرة محمد .... ساد الصمت عدة لحظات
    إلياس - شن نقلت البيانات ؟
    محمد - لا لازم انهكره محمي ب برنامج قوي
    إلياس - باهي حاول فيه بسرعة ..
    <><><><>
    ضاوي - قريب نوصوا ؟؟
    حسن - يعني مزال مسافة ... الهدف قاعد يتحرك ... باين عليه راكب سيارة .... زيد السرعة زيد
    ضاوي - اهو زدنا ...
    <><><>
    محمد - هكرته
    إلياس - انقل اللي فيه بسرعةةة
    محمد - هي هي ... حيعطل شوية فيه كم هائل بيانات
    إلياس - شن فيه بزبط
    محمد - مقسم ملفات 2013. 2014.2015 .
    إلياس - انقلهم كلهم حنحاول انبعد ونجري بأقصى سرعة
    محمد - اوك .
    <><><>
    عيشة - معش تدوي معاي هكي انتي الغالطة وكان بتلومي حد فالومي روحك
    مي - انا اللي مافهمتاش كيف اتصدقيه واتكذبيني كيف
    عيشة - تبيني نكذب عيوني ونصدقك يعني
    مي - ايه ايه ماعمري كذبت عليك ف حاجة انا
    عيشة - بعد اللي شفته خلاص عرفت اني فشلت وماعرفتش انربي
    مي - شفته شفته شفته شن شفتي ياهمي ... انتي متوهمة ... لعبها صح الحقير ... حبسني اهنا يومين طوال عراض وانتي ولا هنا .... فايتتني ولاهية ف شغلك
    عيشة - كنت ف المستشفى يومين بحالهم ... وانتي لاهية اهنا ياللي ماتستحيش ...
    ربطت مي قطعة وشاح على شعرها بكل غيض وقالت - صدقيني مادرت شي ووووه معش عرفت كيف بنقنعك راهو
    قعمزت عيشة قبالتها وقالت - ماوجعتني غير رويحتي بعد مانضت من غيبوبتي ....انفرفش نبي انروح قلت ياناري خليت بنيتي وحيدتي بروحها ف الفندق ..
    مي - لا حول ولا قوة الا بالله .... به اسمعيني بالهدواة وبدون تعصب اوكي .... انا ف هداك اليوم *حكتلها شن صار من لما تلاقت مع حمدي وبعدين جت للفيلا وسمعت شن صار*
    عيشة - امالا ف اما فيلم متفرجة عليه وجاية بتضحكي عليا بيه ....
    مي قعدت تنظر ل امها بنظرة الم ... ونزلت دمعة من عينها وقتلها - يمممما تربحي افهميني
    عيشة - هي بلا وضاعات زايدة مش تحسابيني عيلة بتضحكي عليا
    مي - وووه به تعرفي كيف ... انا حناحاول نهرب منها هالفيلا الغبرة هادي
    عيشة - تهربي عينك ... لياس مسكرها بالترباس من برا وحاط كلب حراسة هكي كبره
    (سحيقة فيك يالياس البلي ان شاء الله اتموت ... )
    عيشة - بري كولي دواك بري ... ماعندنا من بيرفعك للعيادة ... الباب مسكر وراجلك مايروحش توا
    مي - معش تقولي راجلك
    عيشة - 😧
    مي - ومش عارفة علاش حاساتك عاجباتك الفيلا
    عيشة - اهو خير من عيشتي المرمدة متع قبل ..
    مي - عيشتي المرمدة متع قبل اهون عليا من عيشتي مع هالذيب
    عيشة - 😧
    مي - بالله علاش اناقش انا ... ولاش نفتح فيه الموضوع ... وكاني ندوي للهواء لان بمختصر المفيد انا ف نظرك كذابة ... ومهما قلت مش حتصدقي ... وانا مليت وسئمت من تبريرات
    ☆‏لما تعرضك الحياة لمشاكل وضغوطات راح يكبر عقلك بدون ما تدري بنفسك، راح تكون أقوى وأنضج، ممكن تتألم فترة، لكن تأكد ان اللي مايتالم مايتعلم ☆
    <><><>
    الياس - هيا شن صار
    محمد - نقلت النص مزال النص
    الياس - حوالي ؟
    محمد - حوالي ربع ساعة
    الياس - ايوه رامي
    رامي - خدوا المنعطف اليمين
    الياس - اوك خليك ف مكانك ...
    رامي - تم
    الياس - هيا فيسع ديرله حاجة بش يسرع
    محمد - مستغرب فيه انا ... جهاز جديد يفترض سرعته اكبر من هكي
    الياس - حاس انهم قريب يوصلوا ..
    محمد - مامازالش هلبا هي
    <><><>
    ضاوي - مامازلش هلبا هي
    حسن - والله حنطحنه بسنوني طحن حنشرحه بالطرف وهوا حي ... احسن شي انه استقر ف مكانه
    <><><>
    محمد - done 👍
    الباس - كملت
    محمد - يس
    الياس - هات هات الاب توب والفلاش فيسع
    محمد - هاك اه. ...
    *خداه الياس و طلع طرف قماش ومسح الاب توب والفلاش ... وفتح باب السيارة وحطهم ف الوطا ..... ورجع ركب لسيارة وعفس بنزينة جرررري يبي يطلع من بقعة المكان قبل مايوصل فيه الكابو ... وسلك المنعطف اليسار .... لبس كاب ونزله ع عيونه وحط نظارات
    وتقابلوا ف الطريق... واحد سيارة ذهاب من الطريق اليمين و الياس إياب من الطريق اليسار
    ضاوي - فيه حد طالع من الجيهة المقابلة اونه تندرا مسلفرة .... بالك هوا ؟؟
    حسن - لالا مش هوا .... اللي فاتح الفلاش قاعد ف نفس البقعة ماتحركش ...
    *والياس يجري بأقصى سرعة عنده
    الياس - رامي ... اطلع من الجيهة تم كل شي .
    رامي - تم ...
    حسن - @#$/


    &$@ ضحكوووا عليناااااااااااا
    ضاوي - معناها هوا صاحب التندرا اللي كان فاتح الفلاش ف المكان هذا وزابط انه حنسلكوا الطريق اليمين
    *اتعفلق حسن وضرب عجلة السيارة برجله .... بعدين قام الاب توب والفلاش وركب السيارة
    ضاوي - بتسوق انتا
    حسن - ابتركب والا نخليك اهنا
    *ركب ضاوي عالسريع وانطلق حسن ووراه سياراته واسلك الطريق اليسار على امل انه ايلحق صاحب التندرا ...
    خدي الياس طريق تانية بش معش يلقاه الكابو ... واتمكن انه يرجع لوسط البلاد وبعدها دعس لصالة علي
    <><><><>
    حسن - ضيعنااااه ولد الكلب
    ضاوي - قلتلك من البداية حسيت انه هوا انت سكرت راسك
    حسن - كنت انتبع ف الفلاش وبس واهو طلعت ضحكة لقيت الفلاش واللي خنبه لا ...
    ضاوي - رد بالك عليه عاد
    حسن - هالمرة حنحطه ف مكان الجن الازرق مش حيلقاه
    ضاوي - تعرف ...ربما كان بربشنا الاب توب نلقوا فيه حاجة ...
    حسن - تره شوفه ....
    ضاوي - اوك ستنى.......بطارية ميتة واتسكر الجهاز .....
    حسن - انكانه ذكي حياخد لاب توب جديد بش يدير هكي .....وانكانه غبي ولاب توب قديم وفيه حاجات ... فطاح وماحد سمى عليه حنجيبه من تحت تحت طقاطيق الوطا ....
    ضاوي - ومهما كان الشخص اللي خنبه ياحسن فاثق وتأكد انه منا وفينا
    حسن - ايه حسيت حتى انا ..
    ضاوي - لياس وين ؟؟؟؟؟
    <><><>
    علي - ها شن صار ... وين الياس
    محمد - يخشش ف السيارة ف القراج
    علي - سارت الامور تمام ؟؟
    محمد - يعني كويسة نوعا ما
    إلياس - عليووووةةةة
    علي - احبيبي ... ها شن صار
    قهمز الياس عالكرسي وفتح شيشة اميا وشربها كلها وقال - ااااه طلعنا منها باعجوووبة ياعلي وكله من السي محمد
    علي - هدا اول يوم ليه معانا ودار هكي يستر الله من الجاي
    الياس - ايه ...حق امبكري ماناقشتكش لانه الوضع ماكانش متحمل ... وكان اتكلمت كنت حنتنرفز اكثر والوضع حينشحن اكثر .... فلهذا ... يامحمد في الجديد اي حاجة انقولهالك ديرها طول من غير ماتفكر .... مش بمعنى انا انا نؤمرك لا انما راسي ايخطط وايخطط مليح فلهذا امشي عالكلام كانك تبي اتكمل معانا
    محمد - اوكي اوكي تم يابرو ...
    الياس - طبعا معاش مافيش لكن عندي الدرج هذا معبي فلوس كلهم فلوس محصلهم من خدمتي التانية تبي تاخد خود شايفهم فلوس حرام فوتهم
    محمد - والله تشوف ف السيولة وماحدش ايخلص
    الياس - خلاص خود قد مايعجبك علي - غير راك اتكملهم لان نشروا بيهم في مستلزمات الفرقة
    محمد - اطمنوا مش حنكملهم ...
    رامي - السلاااام عليكم
    الكل - وعليكم السلاام
    رامي - شفتهم يتجارو ويدوروا زي المهبلة ف الطرق
    الياس - هههههه تو شوي تاني يتصل هي
    <><><>
    حسن - وين نندري عليه ماجاش اليوم
    ضاوي - مايكون هوا
    حسن - ديما وانت شاك فيه
    ضاوي - هكي مش نازلي من زور حاسه هوا
    حسن - لالا غير لانك ماتحباش بس .... اهو تو نتصل بيه نشوفه وين .......الو
    <><>>
    الياس - ايوه ...
    حسن - وينك اليوم مش امبين
    الياس - الصبح كله نوم وتوا نتمرن ف صالة الحديد ...
    حسن - نوض فز تعالالي ف المقر
    الياس - تم يالافندي مسافة السكة سلام ...... بش قتلكم هههههههه
    علي - ههههههه
    الياس - تو بيقعد يفرفش عالاب توب زي الفار البري
    علي - وكان لقي فيه حاجة هههه خاطري نشوف ملامحه وهوا بيشوف شن ف الاب توب
    رامي - لاب توب شنو ... جبتوه معاكم والاه ؟؟؟
    الياس - وعلاش بنجيبه ؟
    رامي - هكي نحساب .... لانه ااا ... اااا
    الياس - لانه شنو
    رامي - ااا ....
    قرن حواجبه الياس وحس من ملامح رامي ان فيه شئ غلط... علي كان يشرب ف قهوة اتشنج وقعد يشبح لرامي يستنى فيه ينطق الكلمات فهم ان فيه كارثة وراء تبعتره ف كلماته ...
    الياس بغضب - اتكلم !
    رامي - ال الاب توب متاعي ..
    شن موقف الياس من رامي ....وكيف بيتصرف إلياس وبيفك الاب توب من عند الكابو ؟؟ وهل وقت بيحاول هل حينكشف ؟؟؟ ...
    اجابة عن التساؤلات هادي هذا اللي حنعرفوه في الحلقة العاشرة

    يتبع.....


    جميع الحقوق محفوظة للمؤلفة لوزة ليبية من صفحة روايات لوزة ليبية

    لمتابعة صفحة المؤلفة علي الفيس بوك : من هنا
    ,
    @مرسلة بواسطة
    كاتب ومحرر اخبار اعمل في موقع روايات كوريه متنوعه .

    إرسال تعليق