الفصل الرابع من رواية مهمات سرية

الفصل الرابع من رواية مهمات سرية

    الفصل الرابع من رواية مهمات سرية


    رواية مهمات سرية الفصل الرابع الجزء الأول

    لهجة الرواية: ليبية


    رواية من روايات لوزة الليبية

    هيا بنا لقراءة الفصل الرابع معاً

    زينة - خيره حتى رامي طويل وعريض
    ابتسام - لا مش زي إلياس
    زينة - اسمه إلياس ؟؟؟؟؟
    ابتسام - اي
    زينة - الله زي اسم خوي .... استحشته برغم انه عصبي ... وديما كان يهابش فيا وينابش فيا الا اني نتمناه ايروح ... ولو يوم واحد بس انشوفه وبعدها يمشي
    هنادي - قصدك مازال ماروحش
    زينة - لا😟 معش نعرفوا حتى اخباره من سنة 2014
    ابتسام - معةاحترامي ليك هوا ضح خوك لكن كاني ف مكانك والله معاد نفكر فيه وننسى حتى ان عندي اخ من الاساس
    هنادي - اسكتي ابتسام ...
    ابتسام - شن تكتي فيا
    هنادي - شن تبيها تبكي والا كيف ....
    ابتسام - اهو سكتنا هاه ....
    زينة - اخخخخ اخ اخ كان ديما يقولي زينة ماريتيش نحول هههه
    *واختلطت ابتسامة مع دمعة *
    زينة - إلياس ياريتك ترجع بس ...
    ☆فنبحث حولنا فلا نجد الا الذكرى التي هي عزاء لقلوبنا الحزينة☆
    <><><>
    إلياس - ياعلي قلتلك نتصل بيه مايردش مش من عادته .... بالك شدوه امس والا حاجة
    علي - والله وخوشتني ...
    إلياس - بعتت رامي لحوشه وان شاء الله خير ....
    علي - وين انت
    إلياس - ف المحل
    علي - خلاص به كان مالقاشي رامي في الحوش تو نطلع انا اندوره
    إلياس - اوك سلام....... اعطيني هادونا الزوز
    صاحب المحل - اوكي ...
    *خلص الياس وطلع من المحل ورجع للفيلا .... ومشي ل مي ... لقاها راقدة ... حطلها الكيسة وطلع *
    <><><>
    رامي - سعددد ... ياسعد ..... سعدددددد
    سعد - ها ها شن فيه تلعلع عالصبح ماتخليش من يرقد
    رامي - انزل ياراجل
    سعد - باهي اهو نازل ............. ..
    شن فيه صبح يافتاح
    رامي - من بكري نتصلوا بيك
    سعد - كنت مدمدر وتلفون صامت
    رامي - به بعتت رسالة شغلتنا عليك وانت عارف امس شن فيه
    سعد - باهي به ... خلاص برا انت وتو نتلاقوا ف الصالة بعد ساعة
    رامي - اوكين نتلاقوا يابرو
    <><><>
    ابتسام - معليشي زينة ... الا مايجي يوم ويرجعلكم ...
    زينة - ان شاء الله يارب ...اححح يلا ....
    ابتسام - احكينا شن صار ف صاحبك
    زينة - ماصار شي ... قاعدين الحال كما هوا عليه الامر معقد 💔
    هنادي - فوتيه وشوفي غيره
    زينة - خلوني منه تو .. شن رايكم انخشوا كورس انقضوا فيه وقتنا ف العشية
    ابتسام - هبلتي انتي ؟
    هنادي - جامعة ف الصبح وكورس ف العشية مش متخيلة نفسي طالبة علم لهدرجة هههههه
    ابتسام - انا العشية كلها انطس ف النوم ...
    زينة - اهو مكان نتلاقوا فيه وخلاص
    ابتسام - ياودي صعب مافيش سيولة
    هنادي - حتى انا امفلسة يادوب حق الافيكوات
    زينة - امممم باهي خلاص بالك انخش بروحي ...
    هنادي - كورس شنو هو
    زينة - انجلش...
    هنادي - باهي كويس ...
    <><><>
    * فاقت مخلوعة مي... من كابوس شافت إلياس غرقها ف اميا وقتلها ...
    مي - استغفر الله ... امتى ياربي نطلع من اهنا امتى... والله تعبت معش نعرف حتى الساعة كم ... ياريت امي اتجي بصدفة وادورني ياريت ....
    <><><><>
    الساعة 10:45 ص ..
    إلياس - وينك !
    سعد - عارفك بتفصل عليا والله الا راقد روحت الفجر
    إلياس - باهي ابعت رسالة مش هكي !
    سعد - عارف عارف حقك عليا يا سي ....
    إلياس - صار خير ... شن صار
    سعد - امس هدوء والامانة الباين قاعدة ف مكانها ...
    إلياس - شفت حاجة هكي والا هكي
    سعد - لالا المكان فيه حوالي اربعة والا خمسة انفار مش متاكد الحق.... وفيه صياح مرة مرة ...
    إلياس - خلاص تو شوية هكي ونكون عندكم ....ماشي الحال سلام
    <><><>
    حسن - ولتوا ماركبوش الفلاش ياضاوي
    ضاوي - تو يركبوه ... وتو نلقوهم غير انت هديلي اعصابك بس
    حسن - اعصابي فايرات من امس ...
    ضاوي - فوت توا موضوع الشنطة واي حد بيتصل بش يبتزنا بيها حنحصلوا عليه احنا وجماعتنا
    حسن - يستر الله وخلاص
    ضاوي - ها شن فيه خطفات اليوم
    حسن - اليوم بنجيب صفقة سلاح وذخاير
    ضاوي - تي هيا البلاد ناقصة سلاح ؟؟ وقت بتتعاقد ع صفقة حاجة تعاقد على حاجة ناقصة ف البلاد
    حسن - تمشي تمشي مايبور شي تو تنباع
    ضاوي - ولمن بتبيعها
    حسن - مش معروف غير نحصلها بعدين ساهل
    ضاوي - امتى بتوصل
    حسن - غدوة ...
    ضاوي - نمشي انا
    حسن - لالا انت خليك بيجي واحد نبيك تتعاقد معاه على نوعية اجهزة انت تفهم ف الحاجات هادي
    ضاوي - باهي عادي ... باهي شن بتمشي انتا
    حسن - لا... تو انخلي إلياس يستلمها
    جماعة مشرانية ومايمشيش معاهم الا هدا ....
    <><><>
    علي - خلاص تمام ياريس ف القايلة
    إلياس - ان شاء الله يطلعوا يعرفوا معلومات عاللي خطفوا بوي وقتلوه😬 ... خاطري نعرفلهم طريق ... والله لو لقيتهم😬 ... حنغرز الموس ف كل شبر من جسمهم😬 لين يقولوا بالله عليك اقتلنا😬 .... نخليهم يتمنوا الموت 😬
    هيثم - هوا كلنا هدفنا نفسه 😬... إلياس - لكن لما انجي نفكر فيها انقول اهو الشخص ايقدم شئ كويس للبلاد
    علي - اي اقلها اتقل حالات الخطف
    هيثم - عارف الدوة اللي تقولوا😒 فيها ... وبالإضافة لسبب متاعي هذا قاعد الاول😬...
    إلياس - عارف عارف ياهيثم .... ماني اسست هالفرقة لهسببين 😬...
    وتوا نستأذنكم عندي ماندير 😬
    سعد - حتى انا هي نتلاقوا بعدين
    <><><>
    زينة - ستنوا يابنات فيصل يتصل ... تو انجيكم ..... - حبيبي
    فيصل - لا حبيبي ولا واحدة اعطيني جواب توا
    زينة - افهمني ... انا طول عمري نتخيل ان بوي يكون حاضر فضانيتي ةبياني ويتفق وايحل ويربط مع الرجالة .. واهو بوي توفى الله يرحمه
    فيصل - بوك متوفي ليه سنة
    زينة - مانقصدش هكي ... اللي نقصده انه اللي متخيلاته ماصارش منه ... قلت هيا خوي الكبير ايدير فضانيتي..
    فيصل - خوك الكبير فاتكم وماتعرفوش اخباره ... به لامتى انا بنستنى
    زينة - باهي انت كون روحك عالمزبوط ... لقط وابني فوق اماليك
    فيصل - ياسبحان الله ... زينة انتي تعرفيني منتوف ... طايح عليا الحيط ... يادوب انطلع ف حق مصروف الحوش ...
    زينة - به كيف بنتجوزو
    فيصل - تتسهوكي عليا انتي اه تتسهوكي
    زينة - والله مانتسهوك يافيصل ... كان انت نصرف عالحوش باش بنعيشوا انا وياك ... قصدي ف دار والله ماهاضمتها
    فيصل - واتقولك اتحبني ...
    زينة - اي اكيد انحبك ...لكن مش ف دار عاد ! انا بروحي ف حوش اماليا وساكنة ف دار
    فيصل - به به خليك ف حوش اماليك باهي
    زينة - افهمني يافيصل
    فيصل - مانفهمش انا ... اللي نعرفه طالما اتحبيني وانا انحبك نرضي تسكني حتى ف حكة طماطم
    زينة - اخ ياربي ...
    فيصل - هيا تشاو تشاو
    زينة - خيرك هكي ..... اياح سكر حتى الخط .....اخخخ ياربي انا والله انحبه لكن معقولة بنسكن معاه ف دار ! !
    هنادي - خيرك امطرمة شوربك وتدوي بروحك
    ابتسام - حسكم اتعاركتوا
    زينة - قاعدين على نفس الموضوع
    ابتسام - ماتقوليش على بيتجوزك ف دار
    زينة - ايه
    هنادي - قوله برا تيت بعيد ياريته حتى حوشكم فاضي ومافيشي الا امه بس
    ابتسام - ايه ياريته وهوا بخواته التمانية وشوفي روحك انتي معاهم عاد حكة سردينة
    زينة - اححح ...
    ابتسام - الاح هادي ماتبشرش بخير ماتقوليش بتوافقي
    زينة - لا بس ياريته حتى يبني فوق حوش اماليه دارين ومطبخ وحمام راضية ... المهم بروحنا ..
    هنادي - ايه واعرة ف حوش الشيابين خصوصا زي ماقتلك خواته
    ابتسام - ايه عزوزة فيها مافيها لكن حماوات اوووف تسكت واحدة اتنوض التانية وواحدة تضرب وواحدة اتلقي ...
    زينة - قتله لا وخلاص ... برغم والله انحبه ... وماحبيتش غيره
    هنادي - انا من سنتين لحد الان مش عارفة شن حببك فيه ... شخص عبارة عن عقد وكلاكيع ايدره ف ستمئة كبد
    ابتسام - سامحيني الحق فيصل لقطاته اديرلي ف قداد
    زينة - اخ اخ ... الكلام اللي تقولوا فيه قلبي مايعترفش بيه ... الحاجة الوحيدة اللي معترف بيها هيا حب فيصل ...
    هنادي - غبو ماعندي مانقووول..
    ابتسام - انا رامي عنده شقة صغيرونة شراها ماليشي هلبا لكن لحد الان مش قادرة انصارحه .... بجديات نخاف نجرحه الولد بريئ هلباااااا وتفكيره مش زي باقي الشباب
    زينة - كان ف مكانك انوافق
    ابتسام - شن انوافق هادي .... الولد لقيط مش معروف اصله من فصله
    هنادي - معش تدوي عليه هكي حرام عليك .... شن ذنبه هوا ؟؟ هكي نصيبه من الدنيا .... واهو متبني من صغره خلاص ... خوديه
    ابتسام - ايلاااا مانقصني غير ناخده
    زينة - به سيبيه ماتقعديش تضحكي عليه وتسلي منه ف الهداية
    ابتسام - انا متعودة عليه وانعزه هلبا ونحبه مانكدبش عليكم لكن كازواج لا
    زينة - تنرفزي فيا لما تدوي عليه هكي يوجع فيا الولد
    ابتسام - مايوجعك غالي
    هنادي - نوضوا نوضوا المحاضرة قريب تبدى
    <><><>
    ومع القايلة ...
    علي - خيره هذا ؟
    هيثم - زودله ياعلي ليا ساعة انقوله ياإلياس بطل من لعب بسلاح وهوامن بكري تشك تشك
    علي - إلياس ... شن فيه ياراجل
    إلياس - مش خاشتلي راس !
    رامي - شن هيا
    إلياس - اني نخطف ونمشي نفك اسر الشخص المخطوف
    هيثم - وشن جديدة هادي
    علي - اه انا فهمته
    سعد - به فهمنا
    علي - قبل كان شخص تاني غيره يمشي ويخطف وهوا يسمع بالعملية الخطف ويطقس عالمكان ويجي يتفاهم معانا ويمشي بينا نفكوا اسر الشخص
    إلياس - بزبط ... ماعمريش طلعت خطفت وبعدين نرجع نفك اسره بايخة اللقطة ... نظرة عيون الراجل قاعدة بين عيوني لتو ...
    هيثم - معليشي برادر ...معروف انت نيتك شنو ...
    علي - اي ... معليشي ...
    إلياس - ف الجديد حنقول لكابو يبعت مصعب ... يخليني انا للحاجات التانية وخلاص ...وهي نوضوا معاش وقت خلي ندهموا عليهم قبل مايقتلوا الدكتور ...


    ######



    ######*استعدوا هما الخمسة ... كل شخص فيهم لبس زي الفرقة المخصص ليهم *
    إلياس - ماتنسوش بخاخ الاغماء ...
    علي - كل شي تمام ...
    إلياس - اوك البسوا قامجو فوق لبستكم ... وهيا ..... استنوا استنوا ....
    <><><>
    حياة - روحتي زوينة
    زينة - اي يمة ...
    حياة - بنات خالتك اهنا
    زينة - اياح وينهم
    حياة - ف المطبخ اونه
    زينة - خلي نشوفهم ستاحشتهم الكلبات ...... حبوووو و حنوووو
    رحاب - زوييينة ستحتشك يامعفنة
    زينة - حتى انا هلباااا
    حنين - حتى انا استحشتك زوينة
    زينة - وانا اكثر حنوو ....
    حنين - شوفي اه جينا بكري وطيبنا الغدي
    زينة - به كلمتوني راني روحت
    رحاب - والله جيت بنكلمك لكن قلت خليها تكمل محاضراتها
    زينة - باهي مش تقولوا بترحوا العشية راه
    حنين - اطمني بايتين على خاطر عيونك الحلوة بس
    زينة - هه صدقتك 😏 قولي على خاطر ياسينو افندي
    حنبن - هههه لالا
    رحاب - ههههههه اي لا ايه كدابة راه جاية ع خاطر خوك كان هدا ماتشوفيش وجها
    زينة - خزيه حنين ماكنش العشم
    حنين - هههه والله لا جاية ع خاطركم انتو الزوز ويلا بري بدلي وصلي وتعالي خلي نحطوا الغدي خالتي من بكري تستنى
    زينة - اوكي هي
    <><><>
    *وصلوا إلياس وجماعته للمكان المحدد ... درسوا سيارتهم ف مكان مناسب ونزلوا تمشوا شوي لين وصلوا للحوش المطلوب*
    إلياس - سعد خليك ع يمين الباب ... رامي عاليسار .... حنهد الباب علي وهيثم وراي .... عالعتلاتة 1...2...3
    *هد إلياس الباب وخش هوا وجماعته لقوا زوز شباب مدمغين راقدين *
    إلياس اشر ل هيثم وسعد ✌ امشوا اركبوا لدور الفوقي👆 .... 👈رامي خليك اهنا 👇
    علي 👉معاي 👍...
    *طبعا هذا كله ب الايشارات *
    نزلوا الياس وعلي درجتين من الصالة .. لقوا واحد كيف طالع مندفع من الريفودجو ... لبدوا ف التركينة ...قبالة بعض ماان وصل الشبوب ف جيهة الياس ... شده الياس بسرعة من مرفقه وجي وراه و غمله فمه وبخله بخاخ اغماء ف وجهه .... وبمجرد اغمى عليه حطه ف الممر وكمل طريقه للرفودجو ... وقبل مايفتح الباب سمع طل رصاص جاي من فوق ....
    إلياس عبر سماعة بلوثوت - هيثم شن فيه ؟؟؟
    هيثم - اربعة مسلحين فوق سعد انصاب ف فخده ...بس سيطرنا عالوضع ....
    إلياس - سلامات عليك ياسعد ...سل
    * وقبل مايكمل جملته انفتح باب الريفودجو ... شخص طالع ووراه زوز تانيين ... شادين سلاح
    شاب - ارمي سلاحك انتا وياه ...
    احنا تلاتة وانتو زوز بس
    إلياس - هههههه
    شاب - وعلاش تضحك قلت حاجة اضحك انا
    إلياس - لان انتو التلاتة بشخص واحد عندي انا
    شاب - هيهيهيهي اتنكت حسك
    واهنا تلفت الياس وغمز ل علي ... وشد الياس سلاح الشخص اللي قدامه وجبده ليه اللي ورا الشخص طلق رصاصة ... حط الياس الشخص اللي شاده قدامه فجت الرصاصة ف جنبه .... وبخفة ركل برجله ع خشم الثاني وطلع موس وخرزه ف فخده .... فافلت السلاح وطاح منه ...
    *علي ضرب رصاصة ف كتف الشخص اللي قدامه ...
    وتلفتوا لبعض هما الزوز وغمزوا 😉😉
    كتفوهم وسندوهم عالحيط وبعدوا عليهم سلاحهم وخدوا تلفوناتهم ......
    إلياس - خلي نشوف وين المخطوف ....
    *خش الياس من الباب ووراه علي .. ولقوا صالة فاضية فيها كرسيين و اضائتها خفيفة .... *
    علي - كيف صار معقولة يحرسوا ف مكان فاضي ... وينه عوض
    هيثم عبر بلوثوت - قصدكم مافي حد ؟
    إلياس - ايه مكان خالي ....
    *لاحظ الياس قطعة قماش متبتة عالحيط وكأنها ديكور*
    علي - دهمنا عالفاضي
    إلياس - لكن ... تره اصبروا .... بالك شكي فمكانه
    *تقدم ونحى قطعة القماش الطويلة المتدلية واذا بها لقي باب وراها *
    علي - ياسلام عليك القصة كلها ورا هالباب
    هيثم - كويس حصلتوا باب ... اهو جايكم انا
    إلياس - اوك ...لحق تلحيق ...
    *فتحوا الباب ... ومن اول ماانفتح جي واحد قبالتهم عطاه بونية الياس ادروخ ع طول ..... لما كملوا طريقهم داخل لقوا تلاجات كبيرة ..... وقريب اربعة او خمس جتث على الاسرة من لما شافهم علي ...لادت عليه الصفرا و قريب رجع ..... الدكتور عوض وواحد تاني مضروبين لين جسمهم مستزرق .... ودكتور صاحي بينهم واقف عالجتث *
    إلياس - فهمني هذا شنو وشن صاير ؟؟؟؟؟؟؟؟؟
    الدكتور بنبرة فرحة - انت معاهم والا جاي بطلعنا من اهنا
    إلياس - بنطلعكم لكن نبي نفهم
    د بكل نبرة اشى وانهيار - انا دكتور جراحة خاطفيني من شهرين فاتو ... المكان هذا مقرف وقذر .... ايتاجروا ف الاعضاء وامس جابو الدكتورين هادو ..... مابوش يتعاونوا معاهم فضربوهم وعذبوهم زي مادارولي ....
    إلياس - كيف دكتور عاطي قسمويمين انهويحميةالمريض


    ترضخ ليهم .....يفترض حتى على حساب نفسك ماترضاش حتى لو قتلوك
    د - لا لا .... شهر كامل وانا نتحمل ف الضرب والبهدلة والاهانة .... لما مابيتش نتعاون معاهم هددوني يقتلوا ولدي وامي ومرتي ....
    إلياس - لا حول ولا قوة الا بالله ....03 فك الحبال ع ايدين الدكاترة .... وطلعهم لبرا .... تعال حتى انت 05 وفك مع 03
    هيثم - اوك
    رامي - اوك جاي ....
    إلياس - 02 اطلعةمن اهنا واضح دايخ
    علي - هلبا مش قادر نوقف ...
    *والكل دار زي ماقاله الياس .... ولاد ع افراد العصابه نفر نفر وبخلهم بخاخات اغماء الا شخص واحد فيهم .... *

    إلياس - انت الراس متعهم والاه......
    الشاب - كيف عرفت
    إلياس - نزبط ...
    شاب - به شن تبي فيا ! ؟ ومن انت ومن باعتك ؟
    إلياس - انا اللي نسئل بس ... شن اسمك.......قلت اسمك مانقعدش نعاود ف كلامي مرتين !
    الشاب - جمعة
    إلياس -تتبع لمن انت
    جمعة - مانتبع لحد
    * خدي إلياس تلفون جمعة وفتحه وبربش فيه وقاله - منو هدا الراس ... معناها فيه راس اعلى منك
    جمعة - مافيش
    إلياس - اتكلم خيرلك ........ به تو نخليك تتكلم ...
    *طلعله موس صغيرون وغرزه ف كتفه وبدي يحرك فيه والشاب يتوجع*
    إلياس - اتكلم
    جمعة - اييييي باهي باهي هيا منظمة كبيرة راهو ومش حتعرفهم
    إلياس - دوة هادي قديمة اعطيني حاجة جديدة عليا
    جمعة - مانعرفمش هلبا
    إلياس - اعطيني اس ا م ي
    جمعة - اييييي خلاص خلاص تو نقولك شخص اسمه البراديلو هوا الممول الرئيسي لهالحاجات ... سفاح يخطف ويقتل مرات لاسباب شخصية ومرات عالفلوس والمكان هدا دايره لزي ماانت شايف
    إلياس - من امتى يدير هكي قداش ليه سنة
    جمعة - خاش عالشغل جديد
    *رص الياس بصبعه على مكان رصاصة ف كتف جمعة
    وقاله - اعطيني ت ا ر ي خ
    جمعة - ايي اييي كتفي ف ف فبداية العام هدا
    إلياس - وين باقي اوكاره البراديلو هدا
    جمعة - مانعرفش ......ايييي كتفييي والله مانعرفهم افهم ....
    *عطي بونية الياس لجمعة ادروخ منها وبخ بخاخ عليه ...وطلع من الحوش اللي هوا فيه ولقي جماعته تستنى فيه
    هيثم - اهو خديت تلفون واحد منهم
    إلياس - به اتصل شن تستنى ...
    هيثم - السلام عليكم .... كتيبة كدا ... اي نعم فيه مجموعة مسلحة كانت خاطفة عدة اشخاص ....دكاترة ... اي نعم ف مكان كدا كدا ... سلام ..
    إلياس - البسوا قامجوات بسرعة خلي نطلعوا من اهنا .....
    علي - والدكاترة
    إلياس - ارفعهم لاقرب مستشفى ...و بالنسبة لسعد ارفعه مستشفى تانية غير مستشفى اللي بتحط فيها الدكاترة ......هدوء تره مصعب يتصل .... ايواه
    مصعب - وينك
    إلياس - شن فيه
    مصعب - الكابو قالب عليك الدنيا
    إلياس - علاش
    مصغب - من بكري يتصل بيك ويلقى فيك خارج التغطية
    إلياس - به شن فيه
    مصعب - جاه تلفون توا وقالوله ان الدكتور اللي خطفته امس جت فرقة الشياطين وضربوا الجماعة اللي امس سلمنالها الدكتور ...
    إلياس - بالله عليك ... معقولة
    مصعب - ايه وهوا شك فيك اونه كان شاك ف عوني اول امس توا شك فيك انتا
    إلياس - تي كيف ايشك فيا كنت راقد من بكري ف الفيلا
    مثعب - ماندري المهم هوا جايك
    إلياس - وين جايني
    مصعب - لعندك ف فيلا
    إلياس - اها مرحبتين اوكي اوكي .... سلام
    علي - شن فيه ....
    إلياس - اللي هوا شافنا وقت اقتحمنا المكان ...وقالوا للكابو والكابو شك فيا وماشيلي ف الفيلا
    علي - مشكلة
    *نحى الياس القامجو والبدلة وقعد بشورت وكنتيرا ولبس ..... ونحى البوت وقعد حفيان ....و رد القامجو *
    علي - خيرك تشلح ...
    إلياس - برو كلكم ف سيارة واحدة وخلولي السيارة هادي ...
    علي - اوك اوك
    إلياس - انزل فيسع ....
    *نزل علي من السيارة وقال - رد بال...
    *وقبل مايكمل جملته طاش إلياس بسيارة ومشي جري باقصى سرعة وكأنه ف حلبة سباق سيارات *

    <><><>
    *سمعت مي اذان الغصر ياذن فقعدت تبكي وتدعي *
    {يارب ....يارب نتمنى اتصير حاجة خارج عن المألوف ونطلع من هالسجن اللي انا فيه ...يارب اتجي شرطة تقبض عليه ونفتك منه ياربي .. ان شاء الله ايموت يارب ان شاء الله ايمووووت اللهم امين }
    <><><>
    *وإلياس لازال يجري ف الطريق ويفكر ويخبط عالستيرسوا *
    (غبارة ف شكارة .... شك فيا ياخوفي يوصل لجماعتي .... والبنت ف الفيلا حتى هيا والشنطة كدلك .....وكان وصلوا ومالقونيش حتصير مشكلة كبيرة ....ووووه وفوق منها هادي فيلا متع حسن عنده مفتاح الاحتياطي ....الله يستر هذا كله من دعاء عوض عليا هوا واماليه .... سامحني ياعوض والله نيتي صافية ....استر يارب و البنت مش حيديروا فيها خير لو لقوها حيوانات عارفهم )
    *درس الياس السيارة بعيد حتى التسكير ماسكرها ومشي يهرول ف الشارع في نفس اللحظة اللي وصل فيها حسن وجماعته قدام الفيلا بالتحديد ونزلوا كلهم من السيارات

    شن بيصير ف الياس؟؟؟؟وهل الكابو حيلقى مي ويشدها ...هذا اللي حنعرفوه ف الحلقة القادمة


     يتبع .....

    جميع حقوق الملكية محفوظة للمؤلفة لوزة من صفحة روايات لوزة ليبية . 

    لمتابعة صفحة المؤلفة علي الفيس بوك : من هنا
    ,
    @مرسلة بواسطة
    كاتب ومحرر اخبار اعمل في موقع روايات كوريه متنوعه .

    إرسال تعليق