الفصل الثاني من رواية مهمات سرية

الفصل الثاني من رواية مهمات سرية

    الفصل الثاني من رواية مهمات سرية


    لهجة الرواية: ليبية

    رواية من روايات لوزة الليبية
    هيا بنا لقراءة الفصل الثاني:

    *واهنا خدي إلياس الماكلة ومشي بيها لدار اللي فيها مي ... طلع مفاتيحه وبيفتح الباب ... ومي واقفة استعداد وراء الباب ... وبمجرد ماخش قامت يديها مي بالحديد بش بتهبد بيها إلياس ....... تلفت عالسريع وشد الحديدة بيده وقالها - مشاء الله وين متعلمتيه هدا 😑
    *مي حطت يديها ع فمها وتبكي وضايقت ان مخططها فشل ....
    سكر الباب إلياس وحط الماكلة عالطاولة وقعمز ولع دخانه وقالها - وانا انقول البنت مسكينة قاعدة بلا ماكلة وانتي مدايرة جو فندام و بتضربيني ! هههههه ... ياعليك حالة وخلاص إلياس انضرب من بنت ... ههه حي عليك حي هبلتي باين عليك ......
    مي - اففففف والله فديت اقتلني وريحني .... علاش تخلي فيا هكي
    إلياس بنبرة تهكم - لعبة وجت لعندي شن بنقول لا او 😧
    مي بإنفعال - ياحثالة مش لعبة انا
    *وقف الياس بعفاريت عفاريته وشدها من مرفق يدها وقالها - من الحثالة ؟؟
    مي - ايييي ايدي اي ...
    إلياس بصوت عالي - من الحثالة
    مي - ارخيني ... ارخيني خلاص مش انت ياودي اييي يدي بتكسرها
    راهو
    *رخالها يدها وقالها - معش اتقولي حاجات تخليني نطلع عن طوري تبي رباية من اول وجديد انتي
    مي - شن تشبح فيا مش متربية ؟؟ والا اللي انت ادير فيها ايدل ع ربايتك الراقية ؟؟!
    إلياس - 😬 😬 المشكلة انك بنت ... كان هدا راني عفجتك طريحة لا تقرا لا تكتب على كلمتك اهياه 😬
    مي - 😠باه نبي نفهم ... خلاص خديت الشنطة والاه ؟ تقدر اتقول للمافيا متعك انك لقيت الشنطة ملوحة واتفكني واتفك روحك من البلبلة
    إلياس - حي فكرة ...
    *فرحت مي بعض الشئ وردت فيها الروح ... كمل كلامه إلياس -تصدقي ماخطرتش ع بالي هالفكرة الغبية .. اتصوري !
    *ويافرحة ماتمت*
    مي انفعلت واتصيح عليه بصوت عالي - مش حنقول عليك افهم خيرك هكي
    *وقف وحواجبه مقرونات وتقدملها وهيا اتوخر ... وهوا ايقدم وهيا اتوخر وعترت ف كرسي ولازالت اتوخر لين لصقت ف الحيط .... شدها من شفشوفتها وقربها ليه وقالها - مازال تعلي صوتك عليا ياويلك ...
    مي - شعععررررري
    إلياس - تنرفزي فيا راه ...وانا اعصابي ديما فخشمي ... موتي وجنوني حد ايعلي صوته عليا فاااهمة ...
    مي بصوت عالي - اي ارخيلي شعري
    إلياس ايكشح - فاهمةةة؟؟
    مي - اوكي اوكي ...فهمت
    *رخاها وقعد يشوفلها بنظرات غضب ... ووخر وتلفت وطلع من الدار وصرفق الباب وسكر بالمفتاح ...
    و انهارت مي بالبكاء .... مر الوقت رزين كئيب عليها وتستنى امتى امها اتجي او ادورها او اي شي يصير هكي بش تطلع من الجحيم اللي عايشة فيه....
    ركب إلياس لداره ... وسكرها ورص بطمة ف الحيط نزلوا الرواشن وتسكروا بروحهم .....فتح الدولاب والخزنة وبيشوف شن فيه ف الشنطة
    (تره خلي انشوف الشنطة اللي دوخت الجميع .... )
    *شاف الاوراق وبؤبؤ عينه يتحرك بسرعة يقرا ف المكتوب سطر وراء سطر 👀 *
    (ووووباااا عنده الحق حسن يخاف عليها .... ايواه ايواه ايواه )
    <><><>
    ضاوي - به شن فيها الشنطة فهمني
    حسن - احححح وتايق مهمة وسرية ... فلاش فيه هلبا صفقات ليا ولمجموعة روس ف البلاد ..وصور وهكي ... وجهاز
    ضاوي - جهاز شن
    حسن - جهاز تنسط ...
    ضاوي - ماتقولش متع مكالمات !
    حسن - ايه
    ضاوي - والله الا فالح ... لعبها صح حمدي الكلب ... اشبح عند منو طاحت هالشنطة ....
    حسن - ايه ... زعما عوني مات
    ضاوي - ماندري عليه ... بما ان مسعود ماجاش اهنا معناها عوني مااعترف بشي
    حسن - اخخخخ راسي بيتفجر من التفكير
    ضاوي - انت الغالط ياحسن حاجة زي هادي ماتنحطش اهنا ..
    <><><>
    (حاجات خطيرة هادي .... تره الورقة شن مكتوب فيها ....
    >عزيزتي مي ...سامحيني ربما عرضتك للخطر وربما لا ... نتمنى انك اتكوني بخير ... هالشنطة هادي فيها حاجات مهمة ... ومهمة جدا ... وماعنديش شخص نوتق فيه الا انتي لان زي ماانتي عارفة ماعنديش صحاب ... المهم خليها عندك امانة لين تهدى الامور ونبعثلك حد ياخدها منك او انجي انا ناخدها .....وكان ماجيتش بعد اسبوع اعرفي ان صارتلي حاجة ....ولو ماجيتش ان شاء الله تحطيها ف ايد الشخص الصح... انحبك يامي ... انحبك هلبه وخودي هالشعر ليك بما انك اتحبي الاشعار <
    إلياس - اياح يشعرلها حتى الشعر هالمكنسة الحرشة ... باهي اللي طاحت ف ايدي انا ههههه حنقلبها عاليها واطيها .... الكابو يتصل مش وقته بكللل.... ايوه نعم .
    حسن - شن صار ف الموضوع ياهنقر
    إلياس - اما موضوع فيهم البنت والا التاني
    حسن - التاني ...
    إلياس - اليوم ان شاء الله ايكون عندك ...
    حسن - باهي به خلاص انا قاعد تلقاني امتى ماتجي
    إلياس - تم ... سلامات...
    *رجع كل شي ف الشنطة وردهم للخزنة ورد غلاف الدولاب وسكره بالمفتاح ....ونزل ...سمعت خطواته مي نازل من الدروج
    مي - افتحلللي افتحلي .... حرام علييييك افتح ... انخنقت انا اهنا مافيش هوااااء .... اففففتح
    إلياس من ورا الباب - افتحي المكيف تو يرطبلك الجو يامكنسة حرشة
    مي - مكنسة افعينك
    إلياس - والله انجيك راهو 👌
    *سكتت مي حتى كلمة خافت منه ورجعت لنفس مكانها تبكي وتنوح ..
    <><><> 

    #####

    #####الساعة 6 مساء .... مقر فرقة الانقاذ #راكم تتلخبطوا في الاسامي هادي فرقة تانية 👍 #
    علي - وصلتنا معلومات من البوس
    #لا تفهومنا غلط ال Boss ههههه يعني الراس متعهم #
    هيثم - بخصوص ؟
    علي - فيه مجموعة بتخطف اليوم
    هيثم - اممممم
    سعد - وينه هوا معش جي اهنا
    علي - مشغول على حسب ماقالي
    رامي - باهي شنو بندهموا عليهم الخاطفين لما بيخطفوا ونشدوهم والا لا؟
    علي - مش عارف ....ماعطانيش تفاصيل بعتلي رسالة بس
    سعد - والنبي مايخليناش زي المرة اللي فاتت تره.... قالنا ف اخر لحظة و خلانا نتجاروا زي العوعو
    رامي - هههههههههه ايه نتفكر فيها ووقت وصلنا قريب صاوبوني برصاص
    هيثم - غير خلونا من المرة اللي فاتت وكمل ياعلي شن كتبلك ...
    علي - كتبلي مجموعة بيخطفوا دكتور اسمه عوض حسنين فقط ... شن الغرض من الخطف مش معروف .
    هيثم - ان شاء الله خير ...
    سعد - ف كل مرة نشد خاطفين .. نتمنى لو نعبيهم رصاص ... نخليهم منقبين زي الكسكاس
    علي - المشكلة الBoss حيخليك راسك معبي رصاص زي الغربال
    سعد - ههههه ايه اهنا المشكلة
    هيثم - شنو مافيش اخبار على المافيات التانية ماسمعت شي علي
    علي - لالا اليوم لا ....لكن من يومين سمعت ولد ف العشرينات انخطف.. شدوه بهدلوه وقتلوه اشبيب زي الورد وجعني بجديات ....
    رامي - اها اي سمعت بيه
    علي - وعلاش ماقلتش ؟
    رامي - ف الوقت اللي سمعت بيه وبنتصل بالBoss ونقوله لقيت خبر وفاته عالفيس
    علي - لا حول ولا قوة الا بالله ...
    هيثم - الله غالب ... ف الجديد نحاولوا كيف نسمعوا من اول ماينخطف الشخص
    علي - الخدمة كلها معتمدة عالBoss والله لين مرات نتحشم الراجل مداير كل شي ع حسابه ويجيب ف معلومات واحنا مانديرو ف شي غير اننا ندهموا بس
    سعد - حتى هذا كويس مش كل الناس تعرف اتجيب معلومة
    هيثم - كل قدير وقدره اهم شي النية
    علي - اي فعلا .... رامي كان تطلع تاخدنا شوي مواد من مصادرك الخاصة ...
    رامي - اوك عادي
    علي - شوف شن ناقص ف المخزن وبرا دبش ...
    رامي - ع حسابي ؟
    علي - تي لا الBoss مخلي فلوس ف الدرج ... خود منهم
    رامي - اوك تم
    هيثم - ها باهي امتى بندهموا
    علي - توا انا شن كنت انقول هي بش قلت مابعتلي شي غير اسم الراجل ! بصلتك ديما محروقة عالدهم ياهيثم
    هيثم - ولت بالنسبة لي هواية
    سعد - وبالنسبة لي انتقام
    علي - وبنسبالي زي الBoss ... كنا انتقام بعدين ولى الهدف اسمى من هكي .... وضع البلاد ولى مهزلة فولى هدفنا اننا نحاولوا ننقذوها من الغريق
    <><><>
    * ساعة 7:30.. امام مقر الكابو .....
    إلياس - مانبيش اي غلط فاهميني .... 👌
    الكل - تم 👍
    إلياس - اتلتم انت وياه شن تهزوا ف روسكم هكي هكي 🐶
    مصعب - مافيش داعي الكل يخطف وبوجه صحيح وعادي ولا حد ايحوش
    إلياس - فيه اللي يخطف بعباطة لكن انا لا ! كل شي بالمسطرة والقلم
    مصعب - ايغم فيا انا التلتيم ....
    إلياس - 😬😬😬
    مصعب - باهي باهي اهو بنلبسه
    *اتحركوا بسياراتهم ومع الساعة 7:50 وصلوا قدام مصحة الكريستال درسوا سياراتهم ف الزنقة المقابلة وقعدوا يستنوا ..
    <><><>
    احمد - تي شنو يادكتور عوض اليوم طارح بالجني كله شن فيه بتتعرس تاني حسك
    عوض - زعما مزال يشوفولي بعد هالشيبة
    احمد - تي اطلع طول حتى بنات العشرينات اتحصل منهم
    عوض - ههههه امالا خلي نمشي انثي كيف هوا هكي طلعت وسيم وانا ماندريش
    احمد - ههههههه ياودي حسها النية واردة من قبل مانتكلم
    عوض - هههه لالا فضانية بنتي العقبال عندك
    احمد - مشاااااء الله ... الله يبارك به ولاش جاي اليوم ؟
    عوض - يبارك ف عمرك ... والله ماقدرتش نأجل مواعيدي عندي مريض مسكين حالته مستعصية وماتسمحش اني نأجله موعده فاجيت ع خاطره
    احمد - ربي يجبر بخاطرك ويتمم على بنيتك ع خير وتفرح بيها
    عوض - سلمك سلمك ... هي نستاذنك تو ... سلامات ....
    إلياس - اهواه ..يتقدم 😬..
    مصعب - نخطفوه من اهنا والا نلخقوه بسيارة
    إلياس - من اهنا خير .... لانه احتمال ياخد الطريق عالشارع الرئيسي زحمة .....
    مصعب - تمام ع اشارتك ...شن اشارتك انت ؟
    إلياس - تستعبط ياخامر ...
    مصعب - هههه ماه اولك مرة تخطف
    إلياس - Hold ....hooooold...


    . هي انتشروا
    *انفتحوا ابواب السيارات ونزلوا إلياس وجماعته .... واتسطروا قدام الدكتور *
    الدكتور - لا عاااد مش اليوم 😟
    إلياس - معليش دكتورنا المفروض خدينا منك موعد بش نخطفوك ح والاه ☺؟... قيموه فيسع 😬....
    مصعب - هنقر ... فيه صوت رصاص ف شارع الخلفي
    إلياس - فوتهم ....هيا فيسع لسيارات
    عوض - ياناااس
    *ضرب مصعب بحاشية الكلاشن ع راس الدكتور ادروخ قاموه وحطوه ف السيارة وركبوا وسكروا البيبان وطاشوا .... *
    <><><><>
    هيثم - ها شنو وين مافي شي ؟
    علي - شي شي ... قاعد نستنى
    زيي زيك
    <><><> #انكرر راكم تتلخبطوا هيا الرواية معبية قصص 😁#
    منال - الله اتهبلي يانورة ان شاء الله ربي ايتمم على خير
    نورة - يارب ... شنو جو الضيوف
    منال - ايه جو الرحالة كلهم والنساوين حتى هما ...
    نورة - ماجاش حتومي
    منال - لا لكن اكيدة بعدين بيجي وقت بيلبسك الدبلة
    منال - الله قلبي ايدق ... مش مصدقة ان اليوم فضانيتي وبياني
    *خشت عليهم امهم - سوسن فزي للمطبخ شن اديري اهنا
    منال - اي هي غير حطيت موبايلي ف الشحن ولهيت ف الهدرزة مع نورة
    كريمة امهم - اححح بوكم عطل والرجالة كلهم يستنوو
    منال - قاعد ف العيادة ؟؟؟
    كريمة - اي حسه ... نتصل بيه خارج التغطية
    نورة - قلتله ماتمشيش هوا سكر راسه وقال بنمشي عندي حالة ماتستحملش التأجيل
    كريمة - هيا تو ايجي ان شاء الله ...
    خلي نمشي لنساوين خليتهم بروحهم
    منال - هاك يمة تلفونك ايشرين
    كريمة - منو
    منال - ابلة مناني
    كريمة - ياناري اكيدة بتسئلني شن صار ف فضانية بنتك ... هاتي خلي انرد ..... الو ...
    امناني - اهلين كريمة شن حالك
    كريمة - باهية الحمدلله اهو قاعدين نعولو للفضان
    امناني - اه باهي عالبركة ... روح راجلك ؟
    كريمة - لا والله ... نتصل بيه خارج التغطية علاش ؟؟؟؟؟؟؟
    امناني - والله شن بنقولك ....
    كريمة - قولي شن فيه ...
    امناني - امبكرري شوي وانا طالعة من العيادة اللي يخدم فيها راجلك ...
    كريمة - به كملي شغلتيني
    امناني -كيف طالع ياناري من العيادة ويجوه سيارات عالية يتسطروا ضربوه ع راسه وطبوه ورفعوه
    كريمة - انهاااااااااااااااار اسووود ....
    *طاح التلفون من يد كريمة وهيا اتصيح ووه ووه .... بناتها يحسابوا بوهم مات وناضوا يصيحوا و يريشوا معاها .... وخوات كريمة جو لدار وصارت هردميسة والتغت الفضانية والبيان .... وبدت تبكي نورة بدل الدمع دم *
    <><><>
    إلياس - انا ف الطريق يالكابو ... اهو قريب نوصل فيك
    حسن - تو نبعتلك المكان توصيل المخطوف ف رسالة ... واقبض اه اهم حاجة القبض
    إلياس - اكيد ... قداش طالب
    حسن - تو نبعتلك ف رسالة ...
    إلياس - تم يالكابو تم
    حسن - وبعد مااتم ... تعال للسهرية
    إلياس - سهرية شن منو بيتعرس
    حسن - لالا مش عرس ... سهرية ياغزيل بتفقد معانا الليلة 😈
    إلياس - اممباهي تم ......
    مصعب - شن وين قال
    إلياس - مازال .... اهو بعت رسالة .... برا لشارع كدا ...
    مصعب - اوكين ....
    *ولما وصلوا ...
    إلياس - نزله ياوليد ... شده كويس ...
    وليد - لوك
    إلياس - مصعب معاي والباقي خليكم ف مكانكم
    الكل - اوك ...
    *اتصل بالرقم الموجود ف الرسالة اللي بعثهاله الكابو .... ورد
    شاب - ايوه نعم
    إلياس - انا من طرف الكابو
    شاب - اوكي تو يطلعلك واحد من الشباب ....
    *قعد يشوف إلياس يمين يسار ...بعدين انفتح الباب وطلعوا زوز شاب واحد منهم في ايده كيسة ... سلم الكيسة ل الياس وخدي منه الدكتور .....
    شاب - انساه المكان هدا
    إلياس - بينا وبينكك الكيسة هادي... ف حالة ان المبلغ اللي فيه مش ناقص فلس فامش حتشوفنا...
    شاب - فلوسك تامات وبزيادة
    إلياس - اووكي ... يلا سلامات .
    رجع ركب لسيارة الياس ومشي لحسن وزع جماعته ونزل معاه شيشة ...
    حسن - اووووه ليسووو
    الياس - اها شن رابخة اليوم جميع انواع المشاريب 🍻
    حسن - اهياه ماخصوص ليك 🍺🍹 واصليتني مين توركيا
    ضاوي - اياح عيندك شيش من توركيا واتمدنا ف البوخة مين بكري
    الياس - خودها والله ماتغلى عليك
    جايب شيشتي معاي انا واحسن من التوركي
    حسن - تي بارا ياكلب الحاق فيا انا اينود فيك وانت بتع بتع بتعطيها لضاوي
    الياس - ههههه عادي عادي زود يامصعب ديرنا الارقيلة
    مصعب - تي غير خلينا ناخدو جغمة
    الياس - فز زي ماقتلك ...
    مصعب - باهي باهي
    <><><>
    هيثم - تي شن قعدنا هكي وينه البوس عاد بنروح انا
    علي - من بكري نتصل بيه مايردش
    رامي - ابعتله رسالو
    علي - به اهو تو نبعتله ....... كتبتله الجماعة بيروحوا راه. ..
    هيثم - ان شاء الله ايرد
    علي - اهو رد ... كتبنا انطمروا ف مكانتكم لين انجيكم
    سعد - يعطيه طمرا راه يسقدنا
    <><><>
    حسن - هات اليشكارة الفلوس
    إلياس - هاك اهو تامات ياكابوو
    حسن - مهمة خفيفا جاتك ايليوم
    إلياس - ايه طق طوربق اخطفنا ديكتور و هوب قبضنا فلوس ورواحت
    ضاوي - هات الارقيلة هات
    حسن - خود ليسو حيبوب اهما يخلوك تشوف دنيا واردية
    ضاوي - هيئهئهئ والله نشوف ف فيفي عابدو تورقيص
    مصعب - ساعدودك انا اينشوف ف حاجة كاحلا توخطم
    إلياس - ابدي ايشوف في اجنون هاهاهاها
    حسن - ههههههااااااي خود خود ليسووو وشوف
    إلياس - هاااات .... ها وين ماشوفيت شي
    ضاوي - اوصبر لين تعطي مافعول
    حسن - اوووهيي نيستنا ايمتا ايحطو فلاش باش نعرف اليمكاااان
    مصعب - فيلاش كشاف او
    حسن - فيلاش الي فشانطة
    إلياس - خيره الفلاش
    حسن - ايه ماحمي ببرنامج واخده مين امريكا ايحادد موقع اليمكان اللي انفتاح فيه
    ضاوي - وانا نيستنا امتى كتيبة الحوته يتيعاركو مع كتيبة القرش
    حسن - شوفت والا مازال ليسو
    إلياس - هاااا شوفيت شوفيت حاجات اطير زي فاراشات .... اشرب اشرب ياحسونة
    حسن - ااااه نسكر خلوني زايدات همومي ارقصنا ياضاوي
    ضاوي - هي صافق صافق
    إلياس بصوت منخفض -قولي جماعت براديلو بيديرولك كامين حسهم
    حسن - ك ك كيف عرفت
    إلياس - هكي حاسيت ماتعرفش وين مكانهم انت
    حسن - تاقريبا ف منطقة كدا .. لالا ف منطقة كدا كدا ايييواه
    إلياس - وين بزبط
    حسن - بحدى الخبزة هاهاهاها كوشة كوشة
    ضاويي - شن توشوشو
    إلياس - اشرب اشرب ياضويوا هادي النفة مخصوص ليك شمها وادعيلي
    حسن - فقدت انا الدنيا اتلف
    ضاوي - فقد ورقد هئهئهى
    إلياس - هيا بنرواح انا قريب نفقد
    ضاوي - مازال ساهرة ف اولها
    إلياس - لالا نبي نرقد باكري تصبحوا ع خير
    الكل - خير خير ....
    <><><>
    علي - جبت يارامي الحاجات
    رامي - ايه وبذات بخاخات اغماء كترت منهم
    علي - باهي مليح خير مانقعدو نشرو كل شوي وتانية
    رامي - وجبت واقي صدرية لل Boss .... اونه ف اخر مرة رموا عليه واتمزق.....
    علي - ايه شن مازال ماجاش
    هيثم - من بكري نستنوا عيينا حتى من لعب بلايستيشن
    رامي - به وين سعد
    هيثم - خش للحمام ....
    علي - اهو حسه جي الBoss
    هيثم - كيف عرفت
    علي - باب الصالة انفتح .....
    إلياس - السلامووو عليكم ... عارف عطلت عليكم ....
    كيف صار إلياس مع جماعة الكابو للخطف .... وطلع هو نفسه الBoss لجماعة فرقة الانقاذ ! .... اجابة هالسؤال حتعرفووه ف الحلقة القادمة.
    يتبع.......


    جميع الحقوق محفوظة للمؤلفة لوزة التابعة لصفحة روايات لوزة الليبية


    لمتابعة صفحة المؤلفة علي الفيس بوك : من هنا

    ,
    @مرسلة بواسطة
    كاتب ومحرر اخبار اعمل في موقع روايات كوريه متنوعه .

    إرسال تعليق