رواية مهمات سرية الفصل الأول

رواية مهمات سرية الفصل الأول

    رواية مهمات سرية الفصل الأول

    رواية مهمات سرية الجزء الأول الفصل الأول


    لهجة الرواية: ليبية
    هي رواية من روايات لوزة الليبية


    (ان شاء الله مايلحقونيش ياربي... هيا يامي تعالي .... يارب ان شاء الله مايجيني حد .... )

    *واسى نظاراته ويديه يرعشوا ... والعرق يتصبب من جبهته ... طلع كينكس من جيبه طاح منه .... طلع واحد تاني ومسح جبهته ويديه يرعشوا وقلبه ايدق ف 200 *
    (هيا يامي ... تعالي بسرعة .... )

    {تي وينه هدا ... خلي نتصل بيه ... ديما وانا اقل من دقيقة يقطع بو الفقر ....}
    مي - هيا اتشريينة وطيرتها وين انت ...شفتك اهو جاياتك.........

    ......
    اهلين حمدي .... خيره وجهك اصفر
    حمدي - اسمعيني مي ...انا مانوتقش ف ولا شخص الا انتي
    مي - شن فيه خيرك ترعش ووجهك اصفر
    *مي العمر 19 عام *
    حمدي - قصة طويلة ..
    مي - احكيلي
    حمدي - مافيش وقت لو حكيتلك حيجوا ف اي لحظة ...
    مي - من هما خوفتني ياحمدي
    حمدي - خودي ... خودي الشنطة هادي
    مي - شن فوسطها
    حمدي - فوسطها حاجات مهمة مش حنأمن لولا شخص عليهم الا انتي خليها عندك لين نرجعلك
    مي - خوفتني ياحمدي بجد
    حمدي - ماتخافيش انتي ف الامان ... بس انا فيه جماعة اتلحق فيا ليهم من امس ...
    مي - اياح
    حمدي - سامحيني انا جيتي اهنا غلط ف غلط لكن لازم ...حتلقي ورقة توضحلك كل شي
    مي - اوك اوك تم قولي من ايلحق فيك ....
    حمدي - مش وقته بجديات
    مي - باهي حاول تهرب
    حمدي - اي توا حنهرب ... لازم نمشي توا
    مي - رد بالك ع روحك .
    حمدي - ان شاء الله ... خلاص بري فيسع اركبي افيكو وامشي من اهنا بسرعة وبالله عليك مهما ايصير ماتتصليش برقمي اوعديني اوعديني يامي لين نتصل انا
    مي تبكي - اوك اوك ....
    حمدي - امشي توا فيسع
    مي -باي باي

    *وبمجرد مشت خطوتين وقفت سيارات هيلوكس ومسلفرات بالقرب من حمدي .... تلفتت مي شافتله ... وشهقت ودارت روحها مش منتبه ومشت بخطوات واسعة .. ... سمعت الرصاص تلفتت تاني لقت حمدي سايح ف دمه
    ☆مجرد وفاة من نحبهم يشعرنا بتفاهة هذه الدنيا ☆
    *استدركت نفسها مي لما لقت واحد منهن جاي ف جيهتها ... هربت تجري وهوا يجري وراها تخش زنقة وتطلع زنقة .... لين توهاته وركبت ف الافيكو وترعش وتبكي وحالتها حالة ....
    <><><>

    الكابو - كلب ... كيف تخليه يهرب كيف
    عوني - تي مش مني يالكابو لحقته وعطاهم الحاجات لواحدة
    الكابو - زيد هز دماغك شن عطاهم لواحدة هادي !
    عوني - توهتنا الحق من بكري انلود واندور انا وجماعتي
    الكابو - اتصل بالهنقر وخليه يتولى الموضوع
    عوني - تو ندبر انا وجماعتي
    الكابو - عندي اجتماع انا مانبيش نقعد نفكر ف الموشوع اتصل بالكرود وخليه يتصرف
    عوني - اوكي اوكي ... تم ...سلام .....

    <><><>
    (خلي اندس روحي .... والله رجليا مش قادرين يحملوني قتلوا حمدي قدام عيوني.... وف عز النهار ! ... الناس تتفرج وماحد حز عليه ... شن فيها هالشنطة ياحمدي بش لهدرجة يجروا فجرتك ويبوك ... وعلاش متورط مع هيك ناس من الاساس ... اخخخخ ياربي على ليبيا السلام ولينا زي مافيات شيكاغو ربي يستر .... خلي ننزل فيسع ونمشي ل امي ...
    ان شاء الله البلي مهناكش )
    *خلصت مي صاحب الافيكو ونزلت وهيا تمشي وتتلفت ... وتتعثر ف طريقها .... وتبكي وخايفة .... بعد شوي وصلت للفيلا اللي تشتغل فيها امها ... لقت الباب مفتوح خشت ... دورت امها مالقتهاش ... سمعت صوت خطوات رجلين جايين ... وباب الفيلا اتسكر حست انها مش امها ...
    <><><>
    إلياس - تي يابلي متأكد اني قتلته !......خلاص ف الجديد تولى انت مهمة القتل ...... اسمع قاعد شاد اعصابي راه تعرفني لما نتكنطى مانعرف حد راه .... اييبواه شد طريقك وادوي معاي باهي خير ماتصير حتجة تندم عليها طول عمرك ....باهي هيا عندي انتظار ..تشاو
    *إلياس العمر 32 عام *
    (انهار احرف ...انهههاااار احرف طلع قاتل وخاطف .. امي مخدوعة فيه تحسابه باهي وطيب حيه عليا شن ايطلعني من اهنا 😢😢 شن هاليوم ياربي شن هاليوم )

    إلياس - اينعم
    عوني - هايالهنقر د... وينك
    إلياس - خير دعوتك حتى انتا
    عوني - فيه بنت هاربة معاها حاجات خطيرة
    إلياس - حاجات شن !
    عوني - حاجات اتخص الكابو
    إلياس - باهي وين هربت منكم
    عوني - ف جيهة كدا كدا
    إلياس - شن لابسة وشن مواصفاتها
    عوني - لابسة عباية سودة ووشاح بطاطي والا بيج ...
    إلياس - به
    عوني - وطولها 160 بيضاء ... عمرها ف العشرينات
    إلياس - 160 ؟ درية و بداية العشرينات وهربت منكم ياعيل انت وياه
    عوني - فكنا من الغلط ياإلياس تره
    إلياس - وتعلي ف صوتك ع منو انتا
    عوني - انت اتعفلق راه من الاخير
    *لمح إلياس ظل ف مرش الكاترو اللي قبالته ف دار الجلسة *
    عوني - تالو شن اتعفلقت مني والا شنو
    ادم - اه شي شي اتنسم انتا توا
    عوني - ماشي ماشي كان لقيتها اقتلها يالهنقر

    {حييييه ع امي حيييه نهاري اسود ... نهاري اسود ... حي عليا جيت برجليا لحوش هالبلي هما يدوروا فيا وهدا طلع معاهم ... كيف امي تخدم عنده ليها وقت وماحستش بيه كيف خفنا من الغولة طحنا ف سلال القلوب }

    إلياس - اي اكيدة بنقتلها ...هي تشاو
    عوني - تشاوات

    {بيقتلني 😳😢؟ .... ياربي ياربي استر عليا 😢 ان شاء الله يطلع من اهنا😢 بش نطلع حتى انا ونفتك ... ياربي والله بنموت من الخوف}

    *تقدم الياس ووقف قدام الدار ولع سبسي ..قديمة الكلمة عارفة هههه خلونا ف المشهد ... ولع سبسي وحطه ف فمه ونفث منه شوي وقال - شنو ان شاء الله عجباتك الفييلا !

    *انسمطت مي و اتصفرت اتخضرت ماتوقعتش بأي شكل من الاشكال انه شافها *
    الياس - اطلعي من الوراء الباب ... عارفك اهنا ... مش غبي انا ...
    *دفت مي الباب بتسكره عليه... شده الياس بيد واحدة وخش وهوا قارن حواجبه *
    مي بارتباك - ك ...ككك كنت اندور على امي ممماريتهاش وين ؟
    *استند عالحيط بجنب الباب وربع يديه وقالها - صار ادوري ع امك ....اممم
    مي ب توتر - ايه لكن مالقيتهاش الباين انها ططلعت ...
    إلياس بكل برود - به وعلاش تبكي هوا اللي يدور ع امه يبكي
    مي - خ خش ف عيوني تراب بس
    *اقترب منها ونفثه بالقرب من وذنها وقالها - صدقتك ....
    مي - هي حول لو سمحت خليني نطلع ...شكلها امي مش اهنا ...
    * وبتمد يدها لمانيلية الباب .... شدها من مرفقها ورماها عالكنبة ....خافت منه مي ومن نظراته الغريبة مع قرنة حواجبه ....
    مي - كيف تتجرئ ادير هكي كيف
    *اتقدم إلياس مع كلمتها هادي وهيا رجليها معش حملوها بش توقف تأشرله بيدها وتقوله - لالالا بعد عليا بعد ....
    *وصل فيها قدامها مباشرتآ طبس عليها شوي وفك منها الشنطة وقالها - عارف انك كنتي تتسنطي ع مكالمتي .... بالك حتى مكالماتي الزوز 😬
    مي - ماسمعت شي ردلي الشنطة متاعي وخليني نطلع
    الياس قرن حواجبه وقالها - عفستي ف مكان مش ليك..... وسمعتي دوة مفروض ماتسمعيهاش ... واسامي خطيرة وتبيني نخليك تطلعي !
    مي بنبرة حادة - قلتلك ماسمعت شي ماسمعت شي خليني نمشي فحالي...
    *ماعدلش عليها الياس واكتفى ب ابتسامة صفرا*
    مي - على شن تتبسم
    إلياس - تحسابيني ساذج بش نصدقك ؟؟؟ والا انتي يابنت العشرينات بتضحكي عليا انا هه
    مي اتنرفزت و استجمعت قوتها ووقفت وقتله - ايه ايه سمعت كل شي يامجرم ... يامجرررم ياقاتل ... امي تشتغل عندك تحسابك شخص كويس .... وانت مجججرم تمشي وتقتل ف الناس ياويلك من ربي
    إلياس - حتى كان فبالي اني بنخليك بعد كلامك هدا ياودي صعب
    *فك منها شنطة يدها ... وخدي تلفونها*
    ☆ان حكينا ندمنا وان سكتنا قهرر☆

    مي بتعصب - ردلي تلفوووني هااات ....
    يااااناااااس ياناااس ساعدوني
    إلياس - لا تربحي اسكتي والنبي ماديريش دوشة 😮😮
    *استنصرت مي وقعدت اتصيح *
    إلياس - ههههههههه صدقت روحها هادي... صيحي لغدوة ماك سامعك واحد ......الرواشن والبيبان كلهم بي في سي عازل صوت 😉
    *فك الشفرة من نقالها وحطه فجيبه ... وخداها يجر فيها من يدها وهيا تقاوم فيه وتضرب فيه بيدها الثانية وتبكي ...خليني ارخيني يالي ماتخافش ربي ... الله لايسامحك ف الناس اللي قتلتها .... وإليلس مزال يجر فيها ورفعها لدار متوسطة الحجم ... يادوب فيها حمام و بدون روشن بش معش تهرب....و حطها فيها وسكر عليها الباب بالمفتاح تلات طقات*
    مي تخبط عالباب - افتح افتح يامجرم ...

    (منين جتني هالبلوة هادي ... مش وقتها بكل ....و ماعمرهاش عيشة قتلي عندي بنت كبيرة هكي! نحسابها بنتها فرخة متع ابتدائي ..... خلي ندس الحاجات ف الدار فوق ..وبعدين ساهل.. )
    *ركب لداره وتلفونه ايرن ...
    (الكابو يتصل ... مش وقته )

    *وفتح الدولاب ... فك خلفية الدولاب وفتح الخزنة .... حط فيها الشنطة وتلفون البنت ورجع كل شي مكانه... وخدي سلاحه حطه ف خسره ونزل *

    إلياس - ايوه نعم
    الكابو - هنقر ... وينك لتوا .. قداش مكالمة متصل بيك
    إلياس - كنت ف الحمام
    الكابو - كلمك عوني
    إلياس - ايه كلمني
    الكابو - به شن تستنى ياراجل اطلع دور عليها ... اعرفلي اماليها وين يسكنو .... بنت منو كل شي ...
    إلياس - كيف طالع من الحوش انا...
    الكابو - دووورهاااا
    إلياس -ايه ايه اهو ماشي بندورها ...
    الكابو - شوف جماعتك اللي تحتك ودورها ضروري
    إلياس - باهي تم تم يالكابو كون هاني ... سلام ........... الو مصعب لم الجماعة كلها واطلعوا دوروا ....
    مصعب - ع شن
    إلياس - بنت ف العشرينات ... لابسة عباية سودة ووشاح بيج
    مصعب - شنو غيرت عالبنات امالا
    إلياس - غيرت ع جداك بلا دوة فاضية ادير زي ماقتلك
    مصعب - تي باهي وانت فييع تولع .... ف اما منطقة
    إلياس - منطقة كدا وحواليها دوروا كويس ...

    <><><>

    ########

    ########*وبعد محاولات عديدة من مي انها تفتح الباب وتخبط وتصيح استسلمت وارتمت عالارض تبكي *
    {ااااه ياميمتي حيقتلني ومش حنشوفك تاني .... ياريتني روحت طول وماجيتش اهنا ياريت .... ياحليلي حمدي قتلوه واهو انا بنلحقه ... }

    <><><>


    *وبعد ساعتين من البحث المتواصل وسيارات المسلفرة مالية المكان وحواليه ... لم يجدوا شيئآ
    عوني - هنقر باهي اللي جيت
    إلياس - من بكري وانا اندور لين راسي داخ من جرايرك
    مصعب - ديما بعمايلك ياعوني ديما
    عوني - يستر الله كما الكابو يدير فيا حاجة
    إلياس - انت الغالط ..... اهو يتصل ... انعم ..
    الكابو - شن صار
    إلياس - لينا ساعتين اندوروا وماحصلنهاش
    الكابو - مشكلة يالهنقر مشكلة .... عوني الزفت هدا كله منه .... شده وكلبشه وجيبهولي اهنا عارفه ايليل الليل وحيهرب مني مش بعيد هوا اللي دايرها
    إلياس - تم
    إلياس - تم تم ....سلام
    عوني - شن قال
    *غمز إلياس ل مصعب ... وشد عوني وفك منه سلاحه
    عوني - تي خيرنا يالهنقر شن فيه ...
    *ماردش عليه الياس وضربه ع راسه.
    عوني ل جماعته - شن تتفرج انتا وياه
    *كيف بيقدموا تلفتلهم الياس
    وقالهم - التريس فيكم ايقدم بس ...
    *واحد منهم اتنتور ماعجباش الكلام وكيف بيجبد سلاحه ...خدي سلاحه إلياس بسرعة وخفة وعطاه رصاصتين وراء بعض واحد ف الكتف اليمين والتانية ف رجل اليسار
    ....

    *خدي عوني لسيارة حطه من الخلف وركب هوا وجماعته ومشي بيه للكابو *
    <><><>

    حسن الملقب ب الكابو - مشكلة يا ضاوي .... كيف شنطة زي هادي يخنبها حمدي الكلب .....انا مش فاهم كيف طلع بيها من اهنا كيييف ؟ مقر زي هدا امصوقر ويطلع ومايحس بيه حد😬
    ضاوي - وانت لاش مخليها اهنا رفعتها لحوشك ياراجل
    حسن - ماحسبتش هكي بيصير ..
    ضاوي - به غير خلينا ف موضوعنا... اليوم ماخطفنا حد راه
    حسن - راسي مايفكرش... نستنى لياس ايجي بش نعرف شن صار بالك شدوا البنت ...
    ضاوي - قاعد عالشنطة انتا ...
    حسن - ماك مش عارف شن فيها
    ضاوي - عموما كملت اجتماعك مع الروس
    حسن - كملت من بكري ...مجتمع معاهم ومانسمعش فيهم شن يقولوا
    إلياس - اساويكم
    حسن - هاه اي اخبار يالياس
    إلياس - مافيش اي اخبار ... مالقينهاش البنت ...جبتلك هالعوني بس
    * ناض حسن من كرسيه وهجم ع عوني وشده من رقبته بيخنقه وقاله - كله منك الله لا يربحك ديما امفشلني
    عوني - اااا.. ممش مني يالكابو
    حسن - شاك فيك خليت حمدي يتسلل ويخنبها وبعدين قتلته وخديتها منه شاك فييييك
    عوني - و.... و.... والله لا خنقتني احيه
    حسن - وشاك فيك ف هلبا حاجات تانية
    ضاويي - راك تقتله ياحسن
    حسن - نقتله ونشرب من دمه شرب
    الياس - غير اصبر يالافندي حسن

    #طبعا هوا مش افندي ... بس الكل هكي ايقوله افندي حسن ... اما ضاوي فهو اخ حسن#
    *طلقه حسن وطلع سلاحه وصوب ع راس عوني وقال - وين الشنطة ياعوني
    عوني - والله ماعندي ياافندي
    الياس - كان مش عندك عند مني ...
    ضاويي - واحتمال حتى قصة البنت كدبة
    حسن - للمرة الاخيرة وين الشنطة ياعوني
    عوني - مش عن...
    *وقبل مايكمل كلمته طلق حسن رصاصة ف فخد عوني *
    عوني - اييي احييييه تي مش عندي /##*&$
    حسن - واتسب ياخامر .... حتقعد هكي محبوس ف الدار لين يتصفى دمك واتموت ....
    عوني - بالله عليك لا
    حسن - مسعوووووووددددد
    دد مسعوووووددددد
    مسعود - نعم نعم
    مسعود - خود عوني الكلب احبسه ف دار ف الريفودجو ... وخليك برا ... كانه بيتكلم طلعه واسعفه ... كان ماباش يتكلم خليه يتصفى وايموت فاهم
    مسعود - فاهم ....

    *قعمز حسن وواسى شعره الطويل ... وقعمز الياس قبالته *
    ضاوي - الياس ... فيه دكتور لازم ينخطف اليوم ...
    إلياس - وانا مالي مانخطفش عادتا ديما شغلي حاجات تانية غير الخطف
    ضاوي - انت مداير حاجات اكبر من الخطف ... تقتل وماتبيش تخطف ! غريبة هادي
    إلياس - ماهو عادتا عوني هوا اللي يطلع لحاجة زي هادي
    حسن - وعوني طلع كلب وشفت شن صار قدامك الغرض
    إلياس - اوكي تمام منو اللي يبي يخطف
    ضاوي - كلموني جماعة الحوتة وقالولي اخطفهونا ...
    الياس - جماعة الحوتة قادرهم يخطفوا بروحهم امكانياتهم معقولة
    حسن - للخطف فن ومش كل حد يتقنه .... وطالما طلبوا مننا نفدولهم مهمة خلاص المهم عندنا الفلوس
    إلياس - باهي اهم حاجة مايطلعش كمين
    حسن - لالا ماعتقدش...
    ضاوي - زعما قداش بيطلبوا فيه
    حسن - جماعة الحوتة هادي اكيدة مش اقل من مليون

    #لوزة- وظيفة مافيا الكابو الخطف و الابتزاز ... غسيل اموال ... صفقات اسلحة .... #
    ضاوي - حلووو
    حسن - لكن انا راسي مش معااااي زيد دورها الشنطة ياالياس
    الياس - اطمن اطمن حندورها ... كملي به شن اسمه ووين مكانه وامتى بتخطفوه ووين مكان تسليم المخطوف للخاطف
    ضاوي - اسمه عوض حسنين بروفيسور باطنة عنده ايام يجي فيها ليادة الكريستال ...كيف بتخطفه امتى بتخطفه وين بتخطفه هادي حاجة عليك انتا ...
    ضاوي - اوكي ... على فكرة جماعة اللي معاي يبو زيادة ف المرتب
    حسن - مانيش زايد حد سكتهم الفترة اهياه ... لين نشوف الروس شن يقولوا ف موضوع الشنطة
    إلياس - ايه من هما الروس
    حسن.ضاوي - وانت لاش تسئل
    إلياس - خيركم انخلعتوا سؤال هكي عفوي
    حسن بصوت عالي - ماتسئلشش !
    ضاوي بنبرة غضب - لان مش من ضمن صلاحياتك تعرف
    حسن - حاطينلك جماعة تحتك وسيارات واسلحة وعاطينك فيلا
    ضاوي - لكن اسئلة زي هادي
    حسن - مافيش داعي منها

    *واهنا اتغايض إلياس وسكر قبضة يده وقرن حواجبه ... لكن ركز تحت الطاولة لقي مهدي نحى طرف الجاكيت بشوية و بيشد سلاحه*
    (مانحبش حد ايكلمني بالنبرة هادي ... معليش شد روحك يالياس معليش ....)
    إلياس - ههههه اوكي اوكي سامحونا معش نسئلوا ...
    * رخي يده مهدي ورجع حط ايديه عالطاولة ...
    إلياس - خلاص حنعرف جدول عمله عوض حسنين وحنخطفه بالكثير بين اليوم وغدوة
    ضاوي - اوكين ... وبعد الخطف حنعطيك باقي التفاصيل لمن تسلمه وتقبض فلوس كاش
    إلياس - اوك تم ....
    حسن - جماعة القراند ساحنيلي كبدي ...
    ضاوي - خيرهم
    حسن - حطيت عيني ع عيلة امليرة سبقوني ليهم وخطفوا ولدهم
    ضاوي - انقولك ياحسن معش تتكلم انت شي
    حسن - جت ف هدرزة ....
    إلياس - هي نستاذنكم خلي نمشي نزيد اندور عالبنت والشنطة ...
    حسن - باهي اوكب نعتمد عليك ...
    إلياس - اوك ..سلام .....

    <><><>
    (راسي وجعني من البكي ... اااخ ياربي شن هاليوم هدا ... لازم اندير حل ... المفروض من اول مايرجع اهنا نقتله لكن ياريتني انحصل مرشة والا حاجة نطعنها بيه حتى خدش بسيط يلهى فيه مابين انا طلعت وهربت )
    *تلفتت يمين يسار ادور على شئ ولقت حديدة طويلة ودائرية *
    (به حتى هادي ادير راي ... حنلبد وراء الباب ولما ايجي هالمعفن ويفتح الباب حانضربه بيها ع راسه ... يارب كون معاي)

    <><><>
    مصعب - ها شنو توا
    إلياس - انا ماشي لمصحة الكريستال لحقني بسيارتك انت ووليد واصرف باقي الجماعة ... خليهم يروحوا
    مصعب - اوكي ...

    <><><>
    ضاوي - شن زعما يحصلها
    حسن - انا المفروض خليت لياس اهنا من الاول ... لاش مخلي عوني
    ضاوي - ماتوقعتاش عوني يلعب بديله
    حسن - انا غببي مفروض قتلته من لما دار الفالطة الاخيرة
    ضاوي - المفروض ...
    حسن - اخخ الروس بيزيدوا يوسعوا منطمة الخطف
    ضاوي - كيف صار
    حسن - بيوسعوا نشاطهم ع حد قولهم ...
    ضاوي - يعني مخططهم بيمتد لزعزعت الامن بين المواطنين
    حسن - بزبط بيخلوه موضوع اشبه بفتنة بين العيلات يخطفوا شخص ... ويتصلوا بعيلته وعلى اساس جاره دارها ... او حد قريبه وبهكي يصير الهبك بينهم ...
    ضاوي - اهاااا
    حسن - لكن مازال الموضوع قاعد قيد الدراسة هل بينفذوه فعلا او لا مش عارف ..

    <><><
    الياس - خليكم اهنا ... شوي وراجع
    مصعب - وين ماشي
    الياس - ماشي بنسئل
    مصعب - كان بتسئل عليه وبعدين نخطفوه بالك يحفظوا ملامحك
    إلياس - وااااك حايطين بيا غير الغبو تي كيف بيعرفوا وهيا مصحة وهلبا ناس بيجو يحجزوا
    مصعب - ماه كانك حجزت بعدين ماجيتش ايشكو فيك
    إلياس يأشر ع راسه - 👈 اهنا فيه مخ ..
    واشر ع راس مصعب وقال- 👈واهنا فيه زبالة
    مصعب - به به برا خلاص اهو
    سكتنا يامخيخ

    *خش الياس للمصحة ووقف عالريسبشن
    ريس - تفضل
    الياس - نبي نحجز عند دكتور باطنة كويس بمن تنصحيني
    ريسبشن - فيه دكتورين كويسين
    الياس - مني
    ريسبشن - ابراهيم المصيف و عوض حسنين
    الياس - اها باهي وخيتي عنده براهيم اليوم ؟؟
    ريسبشن - لا والله اليوم فيه عوض يبس
    إلياس - من ساعة كم لكم
    ريس - من 5 م ل 8 مساء
    إلياس - به بنحجز لخوي عنده
    ريس - الاسم
    إلياس - رأفت البوني ...

    *خلص الريسبشن وخدي الواصل وطلع .... *
    إلياس - تشبح فيه اللي خاش توا

    مصعب - ايه
    إلياس - هوا هدا اللي بنخطفوه بعدين .... الساعة 7:45 اتكونوا اهنا انت والجماعة بسيارات التندرا ...
    مصعب - تم
    إلياس - تتأخر دقيقة ياويلك ...
    مصعب - اححح قلنا تم ...
    إلياس - خلاص وجهك من اهنا انت وياه ...
    ..الو ... ها رأفت ... عندك موعد العشية تو نبعثلك البيانات ف رسالة ايه اخطم عليا خود الواصل متعك ... سلام ...
    (ساعة 5 توا خلي ناخد حاجة من المطعم ونروح ياغيبتك ياعيشة كنتي اطيبيلي .... كان تندري ع بنتها اللي عندي مش عارفة شن ادير ) ...

    *مشي إلياس يتريض ف صالة لرفع الاثقال وهدرز شوي مع الشباب وطلع ... خطم عالمطعم خدي ماكلة ورجع للفيلا ....
    (زعما نعطيها تاكل هالمتطفلة والا نخليها لين تموت من جوعها ونفتك منها .... هيا الماكلة هلبا خلي نعطيها تاكل وبعدين نقرر كيف بنتصرف معاها )

    *واهنا خدي إلياس الماكلة ومشي بيها لدار اللي فيها مي ... طلع مفاتيحه وبيفتح الباب ... ومي واقفة استعداد وراء الباب ... وبمجرد ماخش قامت يديها مي بالحديد بش بتهبد بيها إلياس .......



    يتبع.......

    جميع حقوق محفوظة للمؤلفة لوزة التابعه لصفحة روايات لوزة الليبية
    لمتابعة صفحة المؤلفة علي الفيس بوك:  من هنا
    ,
    @مرسلة بواسطة
    كاتب ومحرر اخبار اعمل في موقع روايات كوريه متنوعه .

    إرسال تعليق