رواية مهمات سرية الفصل ال15 الجزء الأول

رواية مهمات سرية الفصل ال15 الجزء الأول

    رواية مهمات سرية الفصل ال15 الجزء الأول

    رواية مهمات سرية الفصل ال15 الجزء الأول

    رواية باللهجة الليبية

    رواية من روايات لوزة ليبية

    حسن - زود معاي هنقر للمحل والباقي خليكم قدام المحل

    الياس - اوكي ..

    (استر يارب استر .... هيثم حتى هوا جي اهنا وخش لحوش رامي ... يعني حتى هوا بيمشي ف القص لا حول والاقوة الا بالله )

    حسن - هنقر زود ياراجل وين سارح

    الياس - معاك يالكابو


    *خشوا الكابو والهنقر للمحل ..

    وفي نفس اللحظة هد علي وهيثم على ضاوي في المقر ...


    حسن - السلام عليكم

    ص المحل - وعليكم السلام

    حسن - خونا عندك كميرا قدام المحل

    ص المحل - اي

    حسن - نبي الستجيلات متعها

    ص المحل - لا سامحني

    *تلفت حسن ل الياس ... طلع سلاحه الياس من خسره ووجهه لوجه صاحب المحل وقاله - ماتقولش لا ... قول حاضر .. تم ... كيف ماتبي

    ص المحل خاف وقال - وووالله فاسدة وحق ربي ... ماتشتغلش

    حسن - هنقر ...

    الياس دف صاحب المحل عالجنب وفتح شاشة العرض ... لقاها شاشة سوداء مافيش بث ...

    حسن - باهي من امتى فاسدة

    ص المحل - ليها قريب نص عام

    حسن - ماعندكش تسجيلات

    ص المحل - نمسحوا فيهم كل نهاية شهر

    حسن حاول يفتح الفترينة مابتش تنفتح ...تلفت ل صاحب المحل وقاله - هات المفتاح ...

    مده صاحب المحل وهوا عين تضحك وعين تبكي ....

    فتحه حسن و خدي تاكم عجبه ... وصاحب المحل قريب يموت حقه غالي ف حدود 800

    حسن - خلصه ياهنقر ....

    *وطلع من المحل*

    (خلشه ياهنقر )

    ص المحل - حقه 850

    فتح تيزتانه الياس وخلصه بالدولار وطلع ....

    حسن - هنقر كيف اندير قولي

    الياس - مشوعارف الحق ...

    حسن - تعال ف سيارتي سوق بيا مصعب مشي ..

    الياس - سيارتي بتقعد اهنا

    حسن - تو يجيبوهالك واحد من الشباب

    الياس - اوك ..

    حسن - الشنطة ياهنقر نموت ونعرف مكانها

    (فكني منك ان شاء الله طلع علي من غادي يارب )

    حسن - فمن انكلم انا

    الياس - حنلقوها يالكابو حنلقوها


    <><><>

    علي - عودة مبكرة لهلمكان القذر

    هيثم - مش عارف شن الغرض ورا تبديل الزي متعنا

    علي - مش عارف ماقدرتش اناقشه ... لكن اكيد حيقولنا

    هيثم - فيه زوز مقعمزين ...

    علي - ناخد اليمين وخود اليسار المبحبح

    هيثم - ديما تحشي فيا باسمان يا02

    علي - ههههه هيا زود بش نطلعوا من اهنا فيسع

    هيثم - وحيد خليك اهنا برادر ...

    وحيد - اوك


    بشوية جو من وراهم وضرب علي الشاب اللي قدامه بطرف لوحة ع راسه ... وهيثم نفس الشي الا ان السمين ماادروخش بالضربة ... شده من رقبته والسموني عطي بونية لهيثم ع بطنه ... طلع بخاخه علي وهيثم قاله - لالا ندروخ معاه ياراجل

    طلع هيثم الموس من جيبه وغرزه ف جنب السموني .... ووقف خدي نفس طويل وبخله ف وجهه

    علي - كان تشوف شكلك وهوا عالق عليك اتقول فلوس

    هيثم - 😑

    علي -هههه هيا فيسع خير مايروح الكابو ...

    هيثم - هادو زوز افتكينا منهم ... زعما وين الزوز التانين ...

    وحيد - اهم قبالتي نشبح فيهم ...

    بروا انتوا انقذوا البنت وانا تو نتصرف فيهم

    علي - اكيد

    وحيد - بكل تاكيد ...

    علي - اوك هيا هيثم ...

    *خشوا علي وهيثم يفتشوا ف الغرف لين وصلوا لمكان مكتب حسن ... خشوا يسمعوا ف صياح وعياط *

    علي - الباين اننا تأخرنا

    هيثم - حي علينا من Boss

    علي - الله غالب ننقذوا مايمكن انقاذه من هالبنت ...

    *هد علي الباب برجله ولقي ضاوي ف وضع مخل ... *

    علي - والله ماك راجل

    ضاوي - من انتو

    اتكنطى هيثم من المنظر وقال - ياساقط ياذكر

    وعلى طول هجم على ضاوي وعطاه طريحة باهية ... وطلع مسدسه كاتم الصوت وصوبه عليه

    علي - 03 ماتقلتلاش

    فعطاه هيثم عطاه رصاصتين ف رجل اليمين

    خدي علي عباية البنت وهوا مغمض عيونه وقالها - البسيها فيسع خلي نطلعك من اهنا

    وابتسام مسبوهة وتبكي ...

    هيثم - معش وقت يا02 هيا

    *طلع هيثم قدام الباب واطر علي يلبسها عبايتها*

    ضاوي - والله الا مانجي وراكم ... قسما ماني معديهالكم انتا وياه

    والراس متعكم حنوصله حنوصله ياكلاب

    وفي خلال ماعلي يلبس ف ابتسام ... بياخد ضاوي سلاحه اللي كان عاطاولة ... تلفت هيثم فجأة وقاله - خليك مكانك خير مانعطيك رصاصة ف القلب

    علي - هيا نوضي ....

    *وقفت ابتسام ... وخدوها معاهم وطلعوها دبة دبة ولما صولوا للبوابة و ركبوا سيارة ف نفس اللحظة درست سيارات الكابو*

    (علي هذا وين بيطلع تأخرت ياعلي ...ان شاء الله ماينتهبلاش الكابو )

    كابو - منو هادو

    الياس - مش عارف بالك كانوا يهدرزوا مع ضاوي

    حسن - ماقاليش ان فيه حد بيجي

    الياس - مرات صفقات من وراك

    حسن - مايديرهاش ضاوي عارفه


    *نزل حسن ووراه باقي جماعته والياس متوتر خايف من ضاوي يكون كشفه ... ... *


    <><><>


    علي - اجري يا02 اجججري

    هيثم - والله نجري ف 200

    علي - نهار اسود كما يجي ورانا

    وحيد - ووووه مصاريني يسحنوا بياني غدوة مانبيش انموت 😱

    هيثم - من جاب سيرة الموت اهو تو مطلعوا منها

    علي - وين نحطوها البنت

    وحيد - مستشفى اكيد

    علي - ت اما مستشفى اللي بنحطوها فيها

    وحيد - برا للحوادث هيثم

    هيثم - تيرو لبوسليم ياراجل

    وحيد - به كيف الراي

    علي - اهياه عيادة نحطوها ونهربوا

    هيثم - اوكي لكن انزل انتا راه

    علي - باهي ملتم ماحدش حيزبطني


    <><><>


    حسن - من خش اهنا ياهنقر .... خيرهم نادر وزاهر من ضاربهم

    الياس - من الكلب هذا اللي تجرئ يهد هكي

    حسن - شباب صبوا اميا عليهم خلي يفيقوا

    الياس - ياريتني كنت اهنا بس رانس وريتهم الهدان شن شكله

    حسن - المفروض قعدت انا اهنا وخليتك انت تمشي

    الياس - لا هكي مانطمنش عليك اتهمني حياتك يالكابو

    حسن - 😍😍☺☺😍

    الياس - لا مش زي مافهمت 😬

    حسن - اححح 😒زود خلي نشوفوا شن خنبوا مني موخرآ غير بدوا بحنبوا وخلاص

    *خش الكابو ل المكتب متعه وقال - ضاوي حسه طلع ....

    الياس - اي شوره

    ضاوي بصوت منخفض - حسن ننن

    حسن - صوت ضاوي حسه ...

    *وبمجرد طل على الدار لقي خوه متصاوب *

    حسن - ضاوي .... ضاوي ... ياهنقؤ تعاااال .... ضاوي من دار فيك هكي ... اتكلم ... ضاااوي

    ضاوي - م مش عارف لكن مهما كان اللي دارها حيدفع ثمن غالي

    الياس - لافندي ضاوي ... يامسعووووددد مسعووووود زود ياراجل قيم معاي

    حسن - اطمن ياضاوي حتكون بخير حناخد لأحسن عيادة ....

    مسعود - هيا هي

    الياس - قيم باهي ياراجل

    مسعود - اوكي ...

    حسن - معماها السيارة اللي كانت اهنا وقت جينا هيا اللي دارت هكي ف ضاوي

    الياس - نتوقع ايه ...

    حسن - برا هنقر خود الجماعة ودورها السيارة ....طلع عمها من تحت لوطا

    الياس - اوك حنلقاها اطمن ...

    <><><>

    رامي - ها شن صار ... شن صار ياعلي

    *واول حاجة دارها علي عطي بونية ل رامي ... شد خشمه رامي ومسح نقطة الدم وقال - ياسرني من الضرب والله نفسيتي صفر حسوا بيا حرام عليكم

    *نحي علي القناع اللي على وجهه وقعمز متعفلق*

    هيثم - سعد اهنا ع سلامتك ياقدر

    سعد - باهي اللي لاحظت وجودي

    هيثم - اعذرني يابرو

    علي - معليشي سعودة والله متعفلق على سلامتك برادر

    سعد - الله يسلمكم ...

    رامي - شن صااار

    هيثم - لقيناها البنت وطلعناها ...

    رامي - وشن صار ... داروا فيها حاجة

    هيثم - ايه صاحبتك ف وضع يرثى له ...

    قعمز رامي وهوا يبكي زي الولية وحاط راسه بيه يديه

    وحيد - ربي يستر عليها ان شاء الله ... اسمع برو عجبتني خدمتكم خليني معاكم

    هيثم - انا لا انحل ولا نربط استنى الBoss خداك باهي ماخداكش بتاخد فليساتك وتتسقد

    وحيد - قنعه ياهيثم شن قاعد ادير

    هيثم - يستر الله

    محمد - ها شن صار .... خيره علي سارح

    هيثم - طلعناها البنت وجعتني مسكينة ال...

    رامي - خلاااص اسككت اسكت مش متحمل نسمع ولا كلمة

    هيثم - ت شن تسكت فيا ياحمار انت الغالط ودرت البنت

    محمد - هدو هدو ياجماعة

    رامي - اخخخ اخخخ تعبان انا

    وحيد - ربي ايهدي سرك ..


    *لاد الياس هوا وجماعته شوية هون وهون واتصل ب حسن

    الياس - الو ... كابو مالقيت شي راه

    حسن - باهي به ... خلاص روح انت وتعال مع ساعة 8 بش بتمشي للمهمة زي ماقلتلك ...اهو مضعب يتصل اكيد طلع اسم العقد من الشركة

    الياس - اوكي وقولي من طلع خلي نهد عليه ... ماشي الحال سلام


    *طلع راسه الياس وشاور لجماعة ارجعوا للمقر ... وماان مشوا خدي زنقة ورجع ف طريقه لصالة علي*


    <><><>


    {باهي اللي حصلت بيرو ف هالفيلا الحرفة ... اشيه فيه حتى مذكرة صغيرونة ...خلي ناخدها ونديرها لمذكراتي ... انا التعيسة ... ابنت التعيسة عيشة .... سبحان الله امي ف شبابها كانت تعيسة وها انا مثلها ... تزوجت من رجل لم يقدرها يوما ... وكان يضربها ويذيقها اشد انواع العذاب ... خلي نكتب ع مهند افضل .... مهند استحشته هلبا نتمنى لو اتصير حاجة واتغير المسار 360 درجة ... ونصبح ف احضان مهند .. انا نكره الياس كره اعمى ومش قادرة نتقبله ولا عمري حنتقبله ... نتمنى اني نلاقي مهند ونهربوا مع بعض نهربوا زي ماكنا زمان نهربوا ..


    عيشة - زودي شوفي فيه نوبة ف الشارع

    مي - حق ... تره وريني

    عيشة - شوفيها تمنيت نشوفك بالبودري يامنجوهة ...

    مي - حتى انا تمنيت ... تمنيت مهند

    عيشة - هه😏


    <><><>


    *انهد باب الصالة الخلفي هد لين الكل انخلع وتلفتوا لقوا الياس شايط غضب .... خش وكلهم ساكتين اتقدم وشد رامي من سوريته وعطاه تلات بونيات وراء بعض .... وشده من شعره وخبطله راسه عالطاولة مرة واتنين وتلاتة

    جي علي بيشده تلفتله وفنص فيه تراجع علي

    شد الياس رامي بيديه من رقبته وبيخنقه لين عيون رامي انفتحوا عالاخير

    علي - حتقتله يالياس ....

    محمد مارضاش ف صاحبه كيف وقف وجي جيهة الياس بكل خفة عطاه ركلة برجله وهوا لازال شاد رامي وخانقه .... تراجع محمد وهوا شاد خشمه ...

    رامي - اق اقتلني اقتلني يالياس .. ر ريحني مممن عذابي

    رخاه الياس ووخر خطوتين ... طبس رامي ايكح من خنقته ...

    الياس - امخلي صورو بنت ف لابك ياحماااااار يابهيييييم حد يخلي صورة بنت ف لاب توب .... يرزيني فيك البنت اتبهدلت ف جرايرك ... فقدت اثمن واعز ماعندها وعلى خاطر شنو صورة ! .... كان سمعت صوتها بس وهيا اتصيح وانت عاجز ماكش عارف شن ادير .... امصوب عليا السلاح وايقولي قعمز وانا انشوف للباب بكل حسرة .... بنت رقيقة زي هادي متلاقي عليها شيطان زي ضاوي ..... ااخخ اخ

    *رامي ساكت حتى كلمة *

    علي - وسع بالك يالياس

    الياس - تي اما بالي اللي بنوسعه تي حتى رقمي .. رقمي متع الفرقة طلع عاطيه للبنت

    علي - نعم 😳

    هيثم - شنهووو 😳

    رامي - كيف والله ماعطيت رقمك لحد

    الياس - والله تي شفته بعيووووني وصاحبتك مخزناته LS و اسمي الياس ... شن برايك انا عطيتهولها مثلا

    رامي - وحق ربي ماعطيتهولها

    الياس - فكني تره ..

    *قعمز الياس وخدي شيشة اميا وشربها كلها وقال - ضيعتنا يارامي

    علي - اسم الشفرة ب اسمك ؟؟؟


    <><><>

    مصعب ل حسن - اهياه صورة من العقد ياافندي

    <>

    الياس ل علي - ب اسم سعد ..

    هيثم - حيه ع ام سعد حيه

    <>

    حسن - هات .... خلي نشوف ب اسم منو


    <><><>

    الياس - لما عطاني التلفون غيرت رقم الاخير بس مش متاكد هل غيرته فعلا او لا

    <><>


    حسن - عبدالعزيز خان تي هندي هذا والا اشبح منين

    مصعب - على سيرة عزيز اسمع النكتة اهياه افندي ...قالك باكستاني خش #الحدود الليبيه 😜

    سأله الليبي :شن اسمك

    قاله : عزيز خان

    قاله الليبي عليا الطلاق تكملها الشتاوه 😂😂😂

    حسن - ههه مبردك جاي اتهزقل من الشركة واتقولي طلعت الاسم نحيابه حاجة امقومة وهوا هندي.... تي واضحة انه اللي طب عليا ذكي لدرجة انه مطلع شفرة مش ب اسمه


    <><>


    علي - يستر الله وخلاص

    الياس - ع سلامتك ياسعد .. سامحني متغلل

    سعد - الله يسلمك... ولا ايهمك

    الياس - ليك وحشة والله

    سعد - ليك اكثر احبيبي

    هيثم - Boss علاش قلتلنا غيروا الزي من بكري انفكر

    الياس - لان الفرقة متعنا انقاذ ... وكان طلعنا البنت من غير مانتصلوا بالكتيبة ضاوي حيشك ف الموضوع فاقلت نغيروا الزي بالك مايشكش

    علي - المشكلة ضاوي راسه مفتوح مهما درت حيشك فيك

    الياس - لكن اليوم تأكدت ان حسن ف جيبي ... غير كان نفتك من ضاوي بس نبدى انا اللي نربط وانحل

    هيثم - والله جيت بنقتله عاللي داره ف البنت

    الياس - لا رد بالك كل شي والا الرقبة

    هيثم - اي شن بنقولك ...

    الياس - قول

    هيثم - اللي دهم معانا للمكان الكابو ... يبي يخش معانا

    الياس - شن اسمه

    هيثم - وحيد ... يعجبك ومالاخير

    الياس - ياودي كانه مش نبيه فوت الموضوع

    هيثم - لالا ذكي الولد ... ورياضي ...قاعد ف السيارة اناديهولك تشوفه

    الياس - خليه يجي غدوة الخلوق ضايقات اليوم .... وبنروح ..

    علي - اوك نتلاقوا


    *طلع الياس وهوا يفكر ف عدة امور ...لين وصل الفيلا .... درس سيارته ... وطلع منها *


    مي - واخيرا جي الدعوة ...

    وعلى اول ماخش لقي مي مقعمزة قبالته ...

    الياس - سلام عليكم ..

    مي - وعليكم السلام ... من بكري نستنى فيك

    الياس - هه غريبة على غير عادة

    مي - ماهو ف راسي اسئلة

    الياس خش للمطبخ البار وكمل كلامه - مانقعدش نعاود ف كلامي هلبا مرات

    *فتح التلاجة خدي بربيكان ... وتلفت نحى غطاء الصونية لقي مكرونة مسقية

    الياس - عيشششششةةةةة عيشششششة

    عيشة - نعم نعم شن فيه

    الياس - تعرفيني مانحبهاش المكرونة والا علاش مطيبة جد امها

    عيشة - هادي مي مش انا طيبته قتلها راهو مايحبهاش

    تلفتلها الياس وقالها - مصرة يعني تستفزيني انتي

    مي - طيبتها قبل ماامي اتروح وين نندري عليك ماتاكلش فيها

    الياس - صبرني يارب .. ديرلي نص عيشة مابين دوشت وصليت الظهر ... يوم باين من اوله

    مي - جاوبني

    تلفتلها الياس وكشخ - تي شن قتلك انا ...

    *ومشي وخلالها وركب لداره *

    عيشة - هكي باهي او تخلي فيه يلعلع علينا ... ماه طيبتي حاجة تانية وفكيتينا

    مي - يتزعبن ياكل كان بياكل تره ... خيرلك اتزينيله ف الصفرة قال نفص مش صفرة مشكلة

    عيشة - هذا غدي ياحنة مش فطور

    .... الراجل يخدم ع راسه من الصبح تبيه يشد طوله بنفص دحي بس مايجيش ...هي بري ارفعيله

    مي - نرفعله عزاه هدا اللي كان ناقص

    عيشة - بري رجليا مش قادرة نركب فوق امشي

    مي - اياح علينا عاد .... هاتي


    *ركبت مي بالصفرة .. وطقطقت عالباب ماحد رد ... خشت وفي نفس اللحظة اللي خشت فيها طلع الياس من الحمام لابس برنوس *

    الياس - اياح دايرتلي صفرة مشكلة

    مي - مش انا ظرتهالك

    الياس - عارف ندوي ع عيشة انا

    مي - الياس ...

    *مسح شعره الياس وجي قدامها حس ان فيه كارثة وراء مناداتها ليه *

    الياس - اها

    مي - سامع بفرقة الانقاذ من قبل

    انصدم الياس ورد عليها طول - لا ... شن هيا هادي ! لعبة بلايستيشن والا فيلم

    مي - فرقة تنقذ ف الناس

    الياس - وين ف ليبيا ؟؟

    مي - الياس ماديرش روحك ماتعرفش ... وماتندريش عل...

    *وبحركة سريعة اسكتها الياس بقبلة من شفايفها .... وظل مقبلها لين خدودها ولوا حمر ويديها ارتخوا .... حست ب احساس اول مرة اتحسه ... شعور مليان عاطفة اتملك احساسها لدرجة انها غمصت عيونها ....... بعد الياس شوي وحطلها وجها بين يديه ونظر ف عيونها اللي كانوا شبه ذايبات من القبلة وقالها - تتغدي معاي ؟

    استدركت نفسها مي وقرنت حواجبها وقتله - انت كيف تتجرئ ادير هكي اصلا ... كيف تاخدني على حين غرة بشكل هذا .... كيف

    الياس - انتي ف كل مرة نلقاك ف عقر داري ... حتى كنت متوضي بش بنصلي الظهر اهو ماصارش من الوضوء ... حق اتصلي انتي ؟

    مي - ماتبدلش الموضوع .... كيف تتصرف بطريقة هادي

    * قعمز الياس عالسرير وخدي حبة زيتونة رمها ف فمه وقالها - حلالي والاه والا انا غالط ... والا ماعجباتكش ب و س ت ي

    *اتغايضت مي وضربت برجلها ع الكمدينو وطلعت وطربقت الباب


    (هوووف لو اني مادرتش هكي كانت حتكتشف موضوعي ... والله مانحسابها ذكية هالبنت .. حركتلب مشاعري الدعوة .... )


    *قعدت واقفة مي ف الممر وحطة اناملها على شفايفها وعينها اليمين ادمع *

    { علاش دار هكي علاش ... انكان يحساب نفسه بيكسبني هكي فهو غلطان .... نكرهك يالياس نكرهك}


    *تغدى الياس واتوضى تاني وصلى الظهر ورقد .... وراوداته كوابيس قتل وخطف وكلمات قلبك ميت تتردد ف حلمه .... لين فاق مخلوع *


    (اعوذ بالله من الشيطان الرجيم .....استغفر الله العلي العظيم ... استغفر الله العلي العظيم ..... ساعة كم تو .... الستة ونص هوا داك مابين شفت اموري و رفعت حوايجي للمغسلة يحددوهم ونمشي للكابو )


    <><>

    هدى - ياحويلتي على بنتي ياصالح ياحووويلتي

    صالح - اااخ ااخ غير كان نعرف الكلب اللي دار فيها هكي بس

    هدى - شوفها ياصالح كيف مسبوها شوفها .... ياحليلي وخلاص بنتنا ضاعت

    صالح - قال الدكتور فترة صدمة وتو عدة ايام وترجع تتكلم ...

    هدى - وشن قالك تاني تربح ريح قلبي وقولي انها قاعدة بنت

    صالح بيبكي - لا ياهدى لا .... عذبوها هلبا ولاد الكلب

    هدى اتصيح - ياااااانهااااااري الاحررررررف ووووووه عليا ووووه بنتي ووووه اعليااااااااا

    صالح - نقصي صوتك ... نقصي صوتك قاعدين ف العيادة ناس تشوفنا ....

    <><><>


    عدنان - اسعد الله مسائكم مستمعينا الكرام

    قصي - اينما كنتم وتواجدتم

    #عدنان بطل رواية مكالمة واردة ... اللي مش قاريها عادي مايتلخبطش يعتبرهم مسميات وخلاص ... عدمان مقدم برنامج عالراديو #

    عدنان - في برنامجكم الحميل مكالمة واردة

    قصي - همسات ومشاكل

    عدنان - معاكم انا عدنان الكوتي

    قصي - وقصي التنجالي

    عدنان - اممم مافيش اتصالات الباين اعطينا همسة ياقصي ..

    قصي - هههه شن تبي نوعها غلا رياف فراق خونة عالعين

    عدنان - اعطيني عالرياف

    قصي - ههههههه ناس مرايفة شد عندك هي ... كان اريافك كيف اريافي .... تمشي حافي ... عالجمر الوالع والطافي

    عدنان - ياودي صح لسانك

    قصي - تسلم

    عدنان - عندي مكالمة يامحمد ؟؟ حولها هي .... ونقولوا الو

    شاب - ايوه ..

    عدنان - ايوه معك ... من معاي


    #بكااااء#

    عدنان - وحد الله ياراجل وخود نفس ... قولي شن مشكلتك

    شاب - انا مشكلتي كبيرة ....

    عدنان - به شن اسمك

    شاب - سميني الكارثة ....

    عدنان - ربي مايجيب كوارث .. تفضل يالكارثة شن مشكلتك

    شاب - انا ضريت اعز الناس ليا ... تسببت بالمشاكل للي حواليا ... كل الناس تكرهني ...

    عدنان - من ضريت

    الكارثة - ضريت اللي انحبها ... بسببي صارتلها هلبا حاجات مش كويسة .... وضريت اعز رفاقة عندي ... خليته ايعاني بسببي وحط رقبته عالموت على خاطري .... والشباب التانيين ... حتى هما مشوا على خاطري بش بيديروا حاجات

    عدنان - انا والله مافهمت بالتحديد شن لب المشكلة بس ممكن لانك تحكي بشكل مبهم ...

    الكارثة - مانقدرش نحكي بشكل واضح ...

    عدنان - تبي تخلي رقمك تحت عالهواء والا تبيني انجيك ونحلوا مشكلتك ... عادي ماعنديش مشكلة ...

    الكارثة - لالا عندي رقمك حنكلمك بعدين .... توا صاحبي خاش عليا انتظار متاكد انه كان يسمع ف الراديو ...

    عدنان - اوكي كلمني يالكارثة ....

    قصي - وجعني باين عليه متورط

    عدنان - اي والله ربي ايهدي سره .... انتهت حلقتنا لليوم كان معكم عدنان الكوتي وقصي الدنجالي


    <><>>


    الياس - انت فاش اتفكر متصل ب الاذاعة واتكلم فيهم اه

    رامي - نبي نشكي ومش عارف لمن بنشكي

    الياس - ماتشكيش تسكت وتنطمر ف مكانك .... وصلت عند الكابو ... ماشي الحال سلام

    * خبط حسن ع سيارة الياس وقال - سبحان الله شوف الصدفة وصلنا مع بعض

    الياس - ههههه واحلى صدفة

    حسن - 😍

    الياس - 😬..

    حسن - قولي يالياس ... اما صالة تدرب فيها وشن تاكل بالتحديد بش هكي جسمك مشحوط وعضلات

    الياس - خليك من الصالة والعضلات ... انت خمملي كيف بناخدوا صفقة اليوم بس وانا خليلي الجسم المشحوط هههه

    حسن - اي هي انزل انزل نخشوا للمكتب

    الياس - شن حال خوك

    حسن - حيعيش ...

    الياس - باهي مليح ...

    حسن - جاني تلفون استنى .... ايوه اوكي توا والاه به به تم ...سلام ... وتي روحك ... المكان كدا كدا ... شاحنة كبيرة ... خود معاك من تبي

    الياس - اوك

    حسن - وبعد ماتروح تعالالي اهنا ... نبيك ضروري .... فيه مهمة سرية حتى ضاوي ماقلتلاش عليها

    الياس - مهمة شنو ... متشوق نعرف

    حسن - مانقدرش انقولك توا...

    الياس - اوكي ... طالع توا ناخد الشحنة

    *مشي الياس وجماعته للمكان المحدد ..

    الياس ل مصعب - ماتوقعتش ان فيه 14.5

    مصعب - كيف الراي

    الياس - اعطيني كاتم الصوت ...

    مصعب - زعما نقدروهم ياهنقر

    الياس - نقدروهك ... مصعب خود اربعة نفار وامشي من اليمين ... وعلى اشارتي اطلق عليهم ... وليد انت من اليسار خود خمسة نفار معاك .... وانا والباقي من القدمة ...


    *وبعد معركة طاحنة اتمكن الياس من انه ياخد الشحنة ويرجع بيها لمقر الكابو ... ودخلها ف القراج ...

    حسن - صحة ليك ياهنقر ... قلتها انا مايقدرها الا الهنقر ... خود ..

    الياس - الفضول قاتلني ... عالمهمة السرية

    حسن - اها ... غدوة واحد من الروس بيدير اجتماع مع اشخاص تانيين...

    (حلووووو من امتى نستنى فيها اللحظة هادي)

    الياس - به والمطلوب

    حسن - نبيك تمشي وتتنكر في لبسة عسكرية ...نبيك تزرعلي اجهزة التنسط هادي عندهم داخل ....

    الياس - اوك ساهلة هادي

    حسن - خلاص غدوة تعال اهنا تلقى البدلة واتية واجهزة التنسط واتية

    الياس - كيف اجهزة تنسط الحجم الصغير والا الكبير

    حسن - صغير بحجم حبة الحمص ... نحيله اللصقة ولصقه ف اي مكان ...

    الياس - اوك

    حسن - المهم سرية ماتقول لحد ... وتوقيتها عالساعة 8 في الليل ....

    تقدر اتروح توا وترتاح ... غدوة ورانا يوم طويل

    الياس - اوك تم ياقلم 👍


    *طلع الياس وروح للفيلا ... ومانت الساعة 1 ليلا .... خش وقعمز عالكرسي وقام رجليه عالطاولة وحط يديه وراء راسه وغمض عيونه واسترخى ايفكر *

    (واخيرا بنشوف واحد من الروس ... ونشوفه مع من متعاون ... وبهكي بالك الموضوع يسهل شوي )

    حس بحاجة مضللة عليه وهوا مغمض عيونه .... فتحهم لقي مي ...

    الياس - اهلا ...شن مسهرك لتو

    مي - ماجانيش نوم

    الياس ب ابتسامة صفرا - تبي نلعبوا عريس وعروسة 😉

    مي - مبرررردك 😱 راسي دخن دخننننمم نبي اجابة انت مع الفرقة اول لا ...

    *نزل رجليه الياس بعدت مي واشرتله وقتله - رد بالك ادير زي امبكري

    الياس - ههههه شن صار امبكري ؟ صارت حاجة

    مي - هيا قولي نبي نعرف انت سفاح والا لا

    *شدها من يدها وجبدها ليه من شدة القوة جت ف حجره بتقاوم وتنوض حط راسه ع رقبتها وحست انفاسه ملتهبة ... تلفتتله والتقت عينها ف عينه .... دفاته ووقفت وقتله - وحق ربي نكرهك ... مازال اديرلي هكي نقتلك

    الياس - هههه اقتليني عادي ... على الاقل نموت على يدين ناعامات خير مانموت ضا.... ماعلينا تعشيتي ؟؟

    مي - نبي نفهم بس من انت ....

    *وقف الياس وعطاها بظهر وماشي ف طريقه ... لحقاته مي وتضرب فيه على ظهره وتبكي وقف الياس وتلفتلها لقاها تبكي ولازالت تضرب فيه على صدره ... شدلها يديها وقالها - اهدي ....اهدي

    مي - انت واحد اناني ذيب نرجسي مغرور ... اضن ان بحركاتك تقدر تملكني ووتملكني ...

    الياس - اهدي

    مي - اضن ان اي شي ايجي فبالك ايكون ليك

    الياس بعصبية - تي اهدددي

    *سكتت مي وبعدين قتله - به جاوبني ... من انت ارجوك من اتكون جاوبني ....انت سفاح والا ججمع الفرقة جاوبني ....

    *فلتت مي من قبضته وحست روحها منهارة تبكي وتسترجع ف شريط من لما خطفها .... وشادة راسها وتبكي ..وجعاته كيف تبكي مي فا انحنى عليها وقالها - حا انقولك اللي تبي تعرفيه ...

    مي - به قول

    الياس - مش اليوم ... غدوة

    مي - الساعة كم

    الياس - الساعة 11 في اليل ..

    مي شبحت لعيونه وقتله - نعتبره موعد

    الياس - اوكي ... اعتبريه موعد .. احنا تعارفنا ماكنش بشكل المزبوط ... حنتعرفوا غدوة بس ديري عشي قنين اه مش اطيبي مكرونة امسقية

    مي - تمام ... وعد انك حتجي ومش حتتهرب بطريقة ثانية

    الياس - وعد ...

    مي - اوكي ...

    الياس - نوضي تو ارقدي وارتاحي

    مي - اوك تصبح ع خير


    *ركبوا هما الاتنين ف الدروج وكل واحد منهم خش لداره وبدون مايلتفتوا لبعض .... ورقدوا هما الاتنين ويفكروا ف بعض ..وفي موعد غدوة كيف حيكون


    <><><>

    رامي - استاذ عدنان

    عدنان - ايوه من معاي

    رامي - انا الكارثة متع امبكري

    عدنان - الوقت متاخر ياولدي

    رامي - اي حق سامحني ... نكلمك غدوة الصبح ؟

    عدنان - اي ان شاء الله .... سلامات .... تي وين لتوا ياخالد تخلي فيا نستنى فيك

    خالد #ولده# - كنت معكس شوية

    نهدرز

    عدناان - مع منو ؟؟؟

    خالد - هكي مع الشباب... قلتلك سمعت بيها الفرقة

    عدنان - ايه متع الانقاذ خيرها

    خالد - نبي نخش معاهم

    عدنان - كنت مع صلاح انت؟؟؟؟

    خالد - ايه كيف عرفت

    عدنان - ياويله مني قلتله انا معش تقرب جيهتي وهيلتي وخليني فحالي

    خالد - خيرك عليه مهما كان هذا جدي

    عدنان - لا جدك ولا واحدة تره

    خالد - بجديات نبي نكون معاهم

    عدنان - وصلاح وين يعرفهم اصلا ... نقولك فكني تره سكره الموضوع

    خالد - بجديات نبي نمشي ... حنكلم جدي يحاول يدخلني بينهم

    عدنان - فهمني كيف يعرفهم

    خالد - قالي نعرفهم ... وماقاليش اكثر من هكي

    <><><

    *صبح الصبح وفاق الياس ... كله نشاط وحيوية شاف اموره ...

    و يادوب خدي قهوة وطلع... وعدى اليوم روتيني قضاه عند الكابو ... الى ان جاء الليل ... وبيمشي لمهمة حسن .. ولبس الزي تبعه ومشي للمهمته السرية

    خش للفندق ... ولقي الجماعة ف الحجرة تستنى .... خش وصبح عليهم ولابس نظارات طبعا ماحدش يعرفه يحسابوه معاهم حفظ وجوهم واحد واحد .... زرع اجهزة التنسط ف اغلل الاماكن ... ووقت هوا بيطلع تلقى هوا واللفعة هوا خاش والياس طالع ... اتخيلوها اللقطة بالبطئ زي الافلام

    (شن يدير اللفعة اهنا شن ايدير ؟ )

    طلع الياس من الفندق ودعس ركب سيارته وطفش .... ومشي للكابو وقاله ع كل شي ....واتسنط مع حسن على كل شي واستفاد هلبا من التسنيطة....

    وتت مي نفسها لبست لبسة قنينة ووتت العشاء وحطاته عالطاولة ف الجنان وتشوف لساعة .... شاف لساعة الياس ولقاها العشرة ونص فقال - خلي بنمشي انا نتلاقوا غدوة

    حسن - اوك

    وطلع من عند حسن مشي مسافة لقي شاب ملوح عالطريق . درس سيارته ونزل ... حاول اينوض الشاب فاق مخلوع ...وشاد كلمة واحدة وين خالي

    الياس - هدي بالك شن صار

    شاب - كنت رافع خالي للعيادة .. اعترضوا طريقي سيارة نزلوني ضربوني وخطفوا خالي مع سيارتي

    الياس - شن اسمك انت ومن وين

    شاب - سفيان

    #سفيان بطل رواية غضب عاشق😉#

    الياس - به نوض نوض معاي

    سفيان - لالا بندور خالي

    الياس - غير زود معاي وان شاء الله حنلقوه

    سفيان - به به اوكي ركبوا السيارة هما الزوز ... مشي مسافة بسيطة اعترضت طريقهم سيارات ...

    الياس ل سفيان - خليك ف سيارة بالك جماعة نعرفهم

    سفيان - اوك ...

    *وبمجرد نزل الياس خبطوه ع راسه بمرتكة ... نزل سفيان وبيضرب برغم اوجاعه وضرباتواللي ف جسمه دفوه بعيييد واتكركب بعيد من كثر ماانه جسمه مضروب .... شد راسه الياس ومدروخ ويقاوم يبي يطلع سلاحه من خسره وفباله مي انها تستنى فيه ...

    مي تشوف لساعتها ولقتها حداش الا خمسة وحاسة ان الياس بيخلف بوعده... وحاول تاني انه يوصل لسلاحه ومش قادر ... زادوه خبطة ثانية وحطوه ف السيارة وفت طاشو بيه وقعد سفيان فاتح فمه معش فهم شي

    من خطف الياس ؟ وكيف حيتصرف سفيان ؟ ؟ وشن موقف مي اللي تستنى فيه وواخدة منه وعد انه حيقدملها تفسيرات .... وكيف عرف صلاح القيافة بموضوع الياس وجماعته ؟ وشن صار في زينة اللي اليوم تقدموا عيلة فيصل ليها ...

    وهلبا هلبا تساؤلات واجابتها عندي اكيد انتظروني ف الجزء الثاني من مسلسل الدراما والاكشن والعاطفي والاجتماعي مهمات سرية 😘 Loza👑


    النهاية  

    جميع الحقوق محفوظة للمؤلفة لوزة ليبية من صفحة روايات لوزة ليبية

    لمتابعة صفحة المؤلفة علي الفيس بوك : من هنا
    ,
    @مرسلة بواسطة
    كاتب ومحرر اخبار اعمل في موقع روايات كوريه متنوعه .

    إرسال تعليق