رواية مهمات سرية الفصل ال13 الجزء الأول

رواية مهمات سرية الفصل ال13 الجزء الأول

    رواية مهمات سرية الفصل ال13 الجزء الأول


    رواية مهمات سرية الفصل 13 الجزء الأول


    رواية باللهجة: الليبية

    رواية من روايات صفحة روايات باللهجة الليبية

    هيا بنا لمتابعة الفصل ال13 معاً

    شر ل علي ✊ قف ف مكانك ...

    *وقف علي وراه بالتحديد ...

    حاول يسمع الياس ...فاواحد من الشباب قال - ضاوي تره مدلي الشيشة ...


    *اتجمد الياس ف مكانه بهالأسم ...

    ( ضاوي البلي ف كل مكان ...شن جيبه اهنا شن جيبه مش وقته بكل )

    وتلفت ل علي ....اشرله 👈 اطلع بننسحبوا 👣

    علي - 👎👎👎

    الياس - 😬👈👈😬

    علي - 👍👍

    وكيف بيطلعوا هوا وياه ف نفس اللحظة واحد من الشباب طلع عالممر هما يشوفوله وهوا يشوفلهم وصفر لجماعته ..

    *ضرب الياس الشاب بحاشية سلاحه ع خشم اللي قدامه .... الشاب شد خشمه ووخر ... ثم بركلة من رجله طيح سلاح الياس .... جي واحد ل علي خش من وراه ... كيف بيطلق الرصاص ... شدله كلاشنه وبدوا هما الزوز يتعاندوا عليه من حياخده من التاني ...

    وقف الياس قدام الشاب ... فتح راحة يده وضربه على رقبته .... انخنق الشبوب شد رقبته ووخر ... طلعوا جماعته شادين سلاح ... وبخفة تامة ... طلع مسدسين الياس ووجهم لوجوه الشابين ... وهوا متوتر خايف ان ضاوي يطلع ف اي لحظة ...

    هيثم عبر بلوتوث - مافي حد من الخلف ...

    الياس - اهنا

    الشاب - نزل سلاحك ....

    الياس - نزل انت

    واخيرا اتمكن علي من انه ياخد سلاحه ... وبسرعة ضرب رصاصتين ف رجلين الشاب ... ووجه سلاحه جيهة اللي مقابلة

    الشاب - ماتقوليش انتو فرقة الشياطين

    الياس - هوا ماسمناش هكي لكن كان تناسبك التسمية فايه احنا

    جوا هيثم ورامي من خلف الشابين

    الياس - وتوا انتو هكي اتحاصرتوا ... نزل سلاحك

    *نزلوا الشابين سلاحتهم *

    الياس - وين الراس متعكمو

    الشاب - انا

    الياس - وشن اسمك

    الشاب - ضاوي

    ارتاح الياس بعض الشئ ... وكمل جملته - على ركبتك انت وياه .... فيسع

    ضاوي - اوكي اوكي

    الياس - نبي نعرف من وراكم وتتبعوا من بالتحديد ومن امركم بالخطف

    ضاوي - حد ...

    الياس - منو قتلك

    ضاوي - #$$@^& احنا نخطفوا بروحنا

    الياس ضربه بونية وقاله - معش اتسب جاوب ع قد السؤال

    ضاوي - ماحد امرنا نخطفوا و اللي وراك ايكون ولد عمي

    الياس - قداش ليك ف الجو هدا

    ضاوي - هادي تاني مرة بس ماتخلوش من يسترزق ال@#/

    الياس - اربطوهم اربطوا ..


    *ربطوهم عالسريع وقعد رامي وهيثم بجنبهم ومشي الياس و علي يدوروا ف عماد لين لقوه ف دار من الديار مربوط ووجه كله منفوخ ...طلعوه ومشي بيه هيثم للمستشفى واتصلوا بالكتيبة زي كل مرة بش اتجي تاخد الخاطفيت .... روح الياس للحوش وخش ولقي مي مقعمزة تتفرج عالتلفزيون ... قعمز بحداها واتنهد حس انه ف دوامة كبيرة بين المافيات وانه كل مايقول هالمرة حنلقى اللي خطفوا بوي يصيرله احباط انهم يطلعوا مش هما ... حس بضيقة ف خاطره حيال هالموضوع

    ... انتبهتله مي ومسحت دموعها عالسريع

    الياس - تبكي ؟

    مي - لا

    وغلبتها دمعتها ونزلت ...لما لمح دمعتها حس ان هوا سبب نوعا ما وجعاته مي حسها حزينة ..قرب منها شوي ومسحلها دمعتها بطرف صبعه وقالها - خيرك ... شن صاير

    تجاهلت كلامه وقتله - مروح بكري اليوم على غير عادة

    الياس - هوا داك 12:30

    مي - اوكي ...

    الياس - تركي هذا

    مي - ايه ... انحب نتفرج بروحي خليني معليشي المسلسل شاعري ومش لذيب زيك

    قعد يشبحلها لعدة ثواني وهيا متجاهلاته وتشبح لتلفزيون ناداها - مي

    مي - نعم

    الياس - ممكن تهدي طباعك الحادة شوية ......

    *طلع دخان من الباكو وولعه وخدي منه شفطة وكمل كلامه -

    تشبحي فيا ساكت واغلب الاحيان مانردش على كلامك .... و في كل مرة تتكلمي فيها انشد ف اعصابي قدر المستطاع ... وانتي عارفة نوعي عصبي .... كله كله بش معش انكشخ عليك و نزيدك هم على همك وتقعدي تبكي في تركينة من التراكين او تحاولي تهربي زي كل مرة ......

    مي - انت جبرتني على اني نولي هكي ويزلي كلامي قاسي وطباع حادة

    الياس - انتي انجبرتي على هيك وضع .... وانا بروحي مجبر على هيك وضع لكن بنتعايش مع الوضع فتعايشي مع الوضع زي ماانا مداير .... او اعتبريني خوك وبلاش كل ماتشوفيني موشحات بكلامك زي كل مرة

    *مي خنقتها العبرة وقتله - انا مجروحة لياس افهمني ... مش قادرة ننسى انك خربتلي حياتي ... وسلبتني كل شي حلو فيها

    الياس بتعصب - حتى انتي خربتيلي حياتي مي .. كان تلاحظي عايش بروحي ...وماعنديش على من انخاف ... قعدت ف عز شغلي خايف عليك .. خايف من انهم يوصلوك ...

    *نظرتله نظرة تهكم باردة *

    تغاضى الياس عن نظرتها وقالها - صدقيني لو وصلوك مش حيديروا فيك خير ... الشنطة اللي عطهالك حمدي خطيرة واكثر مما تتصوري

    مي - باهي بما انك مجرم ... وتشتغل معاهم ... علاش انت مش زيهم ... المفروض ان يهمك الشنطة وبس ومفروض من لما حصلتها قتلتني ...شايف القتل ف البلاد زي صباح الخير وانت سفاح مش جديدة عليك تقتل ... شن بيجبرك تتزوج بنت ماتعرفهاش فقط من اجل ان جماعتك معش يوصلولي ؟؟ او ان امري ايهمك لهدرجة

    *سكتت مي وحست انه باندفاعها بالكلام اتوصلت لإستنتاج كان غايب عنها وكملت كلامها بعد عدة لحظات - فيه ان ف موضوعك ...

    شافلها الياس بنظرة سريعة وابتسامة خفيفة حس انها ذكية وغطائه حينكشف ووقف وقالها - تصبحي على خير يامي 😊

    مي - استنى انت مني ... جاوبني ... ؟؟

    الياس - ماعنديش اجابة يامي ...

    مي - قولي انا تحليلي صح او لا ...

    *مشي الياس خطوتين ... وقفت مي وجت جري اعترضت طريقفه جت قدامه وقتله - جاوبني من اتكون انت مجرم او لا ؟

    نظرلها ف عيونها وكرر - سبق وقلتلك ماعنديش اجابة ... نخليك اتابعي مسلسلك

    شافت مي ليده لقتها تنزف

    مي - يدك تنزف

    الياس - مش مشكلة تو يلتأم الجرح ... كملي مسلسك ...


    خلاها وركب ف الدروج وهيا تنظرله واتبع فيه بعيونها .... على رغم قسوته حست في صوته نبرة حنية

    (هذا منو نبي نفهم انا .... لو انه قاتل راهو قتلني وقتي ... او سلمني للي ايدور فيا .... معقولة ايكون شخص كويس ؟؟ معقولة انه مش مجرم ؟؟ او انه مجبور يخدم هالخدمة معاهم !!!!! لازم يقدملي تفسيرات بصراحة قريب يطلعلي برج من راسي )


    *ومن تفكيرها مالقت نفسها الا قدام دار الياس ... والباب كان مردود ... بيتت عليه لقاته كيف طالع من الحمام مسح وجهه وطرافه وطرح الصلاية*


    (لالالا بجديات مش معقولة اهناك قاتل سفاح ايصلي ؟؟؟؟ استغفر الله ياربي هوا انا انصلي وانبطل .... فيه وراك قصة يالياس وانا لازم نعرفها ... )

    مع كلمتها الاخير تلفتت وحكت يدها على ذقنها سارحة .... انفتح الباب بكل قوة وجبدها داخل سكر الباب وسند يده عالباب

    الياس - لمحتك وانا انصلي ... شن جابك لعندي ؟

    مي لأول مرة تركز ف تفاصيل جسمه عضلات بارزة جسم مشحوط وكأنه منحوث نحث ... ريحة برفان حلوة ... استدركت نفسها وجاوباته - ج جيت نبيك ااا

    الياس حسها تنظر لعضلاته فحركلها عضلتين من صدره ورقص حواجبه ضحكت مي ولأول مرة الياس يشوف ضحكتها ابتسم معاها وعاود الكرة

    مي - ههههههههه ياسر منظرهم مضحك هههههههه خلاص بالله عليك هههههههه بطل عااااد ههههه

    الياس - سلم ضحكتها ياربي

    مي - هههه سلمك ... عموما جيت نبي اجابة

    الياس - ماعنديش اجابة ....

    وانحنى عليها شوي وهو مازال مسند يده عالباب يبي يطبع قبلة على خدوها ... طبست وهربت منه وغافلاته وفتحت الباب وقتله - بما ان ماعندكش اجابة تصبح على خير الياس 😊

    الياس - وانت من اهله مي 😊


    *طلعت وسكرت وراها الباب وابتسمت لمنظر عضلاته وخشت لدار اللي بجنب داره *


    اتكى الياس عالسرير وظل ايفكر ...


    (طلعت ذكية مي ... ماحسبتش حساب هالموضوع .... حتقعد اتزن عليا وتبي تعرف .... يستر الله وخلاص ... )

    فكر الياس وخداه النوم الي ثاني يوم الصبح عالساعة 10 ... جي تلفون ل الياس .... قام تلفونه ورد - ايواه

    حسن - تي وينك

    الياس - راقد يالكابو

    حسن - نوض فيسع وجيبلي صاحبك معاك

    الياس - صاحبي ليا تلاتة ايام نرفع فيه عندك ونروح بيه

    حسن - غير جيبه جيبه تو نعمرله جيبه

    الياس - ههههههه باهي ياكابو شوية نشوف اموري ونجيك

    حسن - اوكيز


    <><><>


    علي - يسعد صباحك روميو

    رامي - وصباحك عليوة

    علي - شن الامور

    رامي - اهو كساد فديت من قعدتي ف الصالة

    علي - معليش لين يتصرف الياس ف موضوعك وبعدين ساهل ... واضح عليك مرهق شن مش راقد

    رامي - لا مش راقد ... قعدت طول الليل نتمرن

    علي - مش باهي تجهد روحك هكي ...

    رامي - مضايق ياعلي

    علي - وسع بالك ... فضفض شن مضايقك

    رامي - على خاطر الاب توب وعلى خاطر استحشت امي وعمامي مايخلوش فيا نشوفها

    علي - لا حول ولا قوة الا بالله ... كلمها وخليها تطلعلك حتى قدام الحوش ...

    رامي - مايخلونيش قداش من مرة نمشي ويلزوا فيا ... هيا بنت عمهم وبوها وامها متوفيين ... عمامي خلولها حوش خوهم اللي هوا بوي

    علي - معليش اصبر وخلاص لين ربي ايدير طريق

    رامي - وزيد فوق من هكي البنت اللي نبيها كل مانفاتحها ف موضوع الزواج انحس فيها تتهرب مني ...

    علي - علاش شن قالتلك

    رامي - هيا ماقالت شي لكن كل مرة حاجة .... مرة بوي بيمشي للحج ومرة امي مريضة ومرة عرس اختي ومرة خوي نزاد عليه ولد ومش فاضيين قصدي

    علي - بالك حق

    رامي - باهي معقولة بين هالمناسبة والمناسبة مافيش فضوى نتقدم نخطب يعني

    علي - والله ماعارف شن انقولك الح


    <><><>

    زينة - قالي بنتقدم بعد يومين ... يعني عالخميس

    هنادي - باهي كويس

    ابتسام - ربي ايتتمم على خير...

    زينة - ان شاء الله سلمكم

    ابتسام - خلي نتصل ب رامي ونقوله

    هنادي -اي هي ورينا

    زينة - قعمزززي ماتنوضيش خليك بحدانا

    هنادي - ايه لانك كان مشيتي ف تركينة بروحك حتقوليله انحبك زي كل مره

    ابتسام - اوك اوك اهو نتصل


    <><><>


    رامي - مخنوق الحق ...كل اللي نبيه هالبنت ونسكن انا وياها براحة وتفاهم







    علي - ان شاء الله ربي ايفرج اصبر عليها وان شاء الله ربي يجمع بينكم عالخير

    رامي - ان شاء الله يارب ههه اهي تتصل على دعوتك سبحان الله

    علي - هههه باهي بالك هالمرة تقولك تعال اتقدك ..ظدوليك مني انا نمشي نخطبلك انا ومرتي

    رامي - اصلي عارفك ماتقصرش

    علي - هي خود راحتك خلي نمشي نشيك عالالات

    رامي - اوك ... صباحو ورد

    ابتسام - صباح النور

    رامي - وينك اليومين اللي فاتوا مادورتيش

    ابتسام - كنت مشغولة شوي

    رامي - ف شنو

    ابتسام - هكي عندي شوي حاجات... رامي بنقولك حاجة

    رامي - عارفك شن بتقولي

    ابتسام - انا ...

    رامي - ايه

    ابتسام - انا... معش نقدر نستمر معاك

    رامي -انحبك

    *قالوها مع بعض ..... وانصدم رامي وقالها - كيف شن الكلام هذا

    ابتسام - فاتحت امي في الموضوع وهيا مش موافقة .... قتلي كملي قرايتك واختي تبيك لولدها

    رامي - من جدك تتكلمي

    ابتسام - ايه ايه سامحني بجد رامي وبالله عليك معش تتصل بيا وادير مشاكل واحراجات ليا وليك ...باي باي بابا جي ...

    رامي - استني ..... #@/^#&# سكرت عليا معقولة هكي ! كييييف ...


    هنادي - علاش سكرتي

    ابتسام - وجعني الولد حسيت بغصة ف قلبي لما قلتله

    زينة - معليشي من توا خير ماتستمري معاه وتضحكي عليه

    ابتسام - حنمسح رقمه وكل رسايله من عندي ... حنمسح كل الموجود ف الفايبر والفيس

    هنادي - اي خير ماتحنيله ....

    <><><>

    علي - خيرك اتصيح

    رامي - اب اب اب اب

    علي - هدي خلي نفهمك

    رامي - كيف انهدي ... ابتسام ابتسام فاتتني ياعلي ....

    علي - معقولة ؟

    رامي - شكي كان صح ... هيا ماتبينيش على خاطر انا متبني ...

    علي - والله امت شبيب زي الورد مافيش منك غير هيا ماعرفتش قيمتك

    رامي - مقهووووور ياعلي مقهووور


    <><><>

    عيشة - صباح الخير

    لياس - صباح الخيرات

    عيشة - نجيبلك قهوة او

    الياس - لالا طالع مستعجل حناخد من الطريق

    عيشة - به اسمع ...بنمشي للمصرف انا شوي تانية خلي الباب مفتوح

    الياس - مش لازم مصارف كم تبي ونعطيك

    عيشة - لالا نبي فلوسي بنصدق على المرحومة امي

    الياس - باهي حتى هادو فلوسك اتعاب الشهر اللي فات ... هاك شدي

    عيشة - عارفاتك ماتبيش تخلي باب الفيلا مفتوح ... اعطيني المفتاح

    الياس - لالا مانخليشي مفتوح ... البسي عبايتك وشاربتك وهيا اطلعي بش بنسطر الباب

    عيشة - اللطف وقت بنروح وين بنقعد

    الياس - مش معطل وقت تروحي تلقيني اهنا .... هيا سقديني وراي خدمة

    عيشة - به به هي ستني شوي


    <><><>

    مصعب - سمعت يالافندي

    حسن - شنو

    مصعب - امس الفرقة كبسوا مفرخ خاطفين

    ضاوي - ومفرخ لاش خاشين ف هالمخاشيش

    حسن - عالفلوس اكيدة ...

    مصعب - شن رايكم انديروا كمين لفرقة الشياطين

    ضاوي - فوته الموضوع مش ناقصين دواش راس باهي اللي فكونا من سوهم

    حسن - ربي يسعدهم ويبعدهم هههه

    لكن ياضاوي قاعد نسحن ع متع امس من هدا اللي هد عليا هكي

    مصعب - ههههههه

    حسن - نوض ياكلب نوض نوض من اهنا

    مصعب - اوكي هي ...

    ضاوي - المشكلة مش مخلي اثر والا اسم

    حسن - غلطتي اني خليت الشباب اهنا ف الدار ... مفروض اللي بصم طلع كان هذا ماسترجاش يدير هكي ويتسلل عندي

    ضاوي - مش عارف عندي احساس ان هنقر وراها واحساسي مايخيبش

    حسن - قلتلك السبب انت ماتحباش ياضاوي وكل مشكلة ادكها فيه

    ضاوي - اوك نشوفوا اخرتها لوين ياحسن

    الياس - السلام عليكم

    حسن - وعليكم السلام ... زود فيسع كرسيك واتي يامحمد

    محمد - اي هي

    حسن - امفكر نشغلك عندي

    محمد - الحق مش ديما قاعد ف طرابلس يادوب شوية ونركب لجبل

    حسن - جبالي انتا

    محمد - اي

    حسن - باهي بجودة ... زود زود قعمز

    محمد - اي هي

    حسن - مدله الاب يالياس اهو ف الخزنة ....

    الياس - مسكرة اكيد

    حسن - لالا مفتوحة ...

    الياس - اوك ...

    *وقف قدام الخزنة وفتحها وشاف فيها حاجات فلوس ... اوارق ... فلاشات ... سديات ... وصندوق امسكر*

    ضاوي - غير وين سرحت بس.. قالك جيب لاب مش اتأمل ف الموجودات

    الياس - ايه بنجبد الاب توب علق ف حاشية الخزنة

    ضاوي - اها قلتلي ...


    <><><>


    ابتسام - لنقنه الهواء اليوم ايرد الروح

    زينة - جو مش عادي اتقول ربيع

    هنادي - مش خاطري نحضر اليوم

    ابتسام - ولا انا

    زينة - حتى انا زودو نمشوا لمكانا المعتاد جنب كفيتيريا وناخدو كريب ونسكافية

    ابتسام - خلونا اهنا

    هنادي - اي غير نوضي

    ابتسام - باهي لكن مفلسة خلصوا عليا

    زينة - اوكي تو نخلص انا

    ابتسام - اوك هي ..


    <><><>


    (هيا يامحمد هيا امسح كل شي يارب يمشي كل شي على خير يارب ...)

    حسن - اها شن صار

    محمد - اهو قاعد نسترجع ف البينات

    حسن - فيه هلبا والا شنو

    محمد - مش معروف لين ايكمل

    (ايواه هكي تمام استرجع بينات C كلها .... معقولة يارامي تخلي حاجات زي هادي اهنا مفروض مله ف هارد ديسك خارجي ..... وين برنامج للمسح وين ... اهو .... تمام ابدء المسح النهائي .... حيه عليا ضاوي الشياطين جاي جيهتي .... استر يارب .... استر يارب ..... استر .... ايووواه تمام )

    *وقف ضاوي ورا محمد وقاله - ها شنو

    محمد - للأسف c فاضي ...

    ضاوي - ابدى ف D اغلب الناس اتخزم ف الحاجات عالD

    محمد - اوك ...

    *جبد كرسي ضاوي وقعمز بحدى محمد ... والياس يشوفله ويتحسر

    (هالبلوة هدا شن نوضه تو هي .... ان شاء الله محمد ينقذ الموقف ويمسح كل شي يارب ... استر علينا )


    ضاوي - هوا هدا برنامج الاستعادة او

    محمد - ايه ....

    (بما انه بحداي خلي نعاود نسترجع الC ونقوله فاضي بالك تمشي عليه)

    ضاوي ركز ف الشاشة وقاله - علاش بديره ل C تاني ... بش قلت بدير D

    محمد ارتبك وقاله - والله راسي مش معاي معليشي... واكل سندوتش كبدة مفلفلة ونحس ف معدتي تلعب

    ضاوي - اها اوكي

    *استرجع محمد بيانات اللي عالD ... وخش على طول لبرنامج المسح النهائي .... استاكى البرنامج واطر انه يسكره ويفتح من جديد ... طلعتله نافذة الواجهة البرنامج بالبونت العريض Deliting

    ضاوي - بتمسح ؟؟؟؟

    محمد - اه لالاا شن بنمسح هادي غير انفتح البرنامج بالغلط

    ضاوي - اوك استرجعت البيانات

    محمد - ايه

    ضاوي - فك الهارد ديسك متاعك واتيسر ....

    محمد - اا ..

    الياس - هيا يامحمد خلاص قالك فك الهارد ديسك تم فكه

    محمد - اوكي

    حسن - تره وريني شن لقيت

    ضاوي - تعال قعمز ... الياس وصل صاحبك وخود باقي اليوم اجازة

    الياس - اوك ... هي السلام عليكم

    ضاوي - سكر الباب وراك

    الياس - اوك

    *طلع الياس ومحمد وجهه مايتفسرش ... بعد ماسكر الباب بيتكلم محمد اشرله الياس اسكت مش اهنا .... مشوا لين وصلوا لسيارة

    الياس - شن صار

    محمد - مسحت ال C ووقت جيت ل D وبنمسحه جي ضاوي وقعمز جنبي

    *اتكنطى الياس وضرب عالستيرسو مرة واتنين وتلانة مع كلمات مش مفهومة *

    محمد - والله حاولت قريب حتى كشفت روحي حاي بنماطله

    الياس - باهي اللي ماماطلتاش شفته بيطلع سلاحه من خسره لهسبب قلتلك اسمع الكلام

    محمد - حيه علينا رامي كيف بنتصرفوا ...

    الياس - مانيش عارف .... شن فيه ف الاب توب عالD

    محمد - يطلعوا مربعات صغيرات لين نخش عليهم بش يبانو يتهيألي صور وهكي

    الياس - ربي يهديك يارامي .... مصور معاه انت

    محمد - لا مانحبش التصاوير

    الياس - باهي سترني ربي كان هذا راهو شدوني انا وياك ... خلي نمشوا ل علي توا وبعدين ساهل

    محمد - اوكي ..

    <><><>

    حسن - تي شن هدا كلهم صور طبيعة .... ويم الصورة هادي ف غريان حسها

    ضاوي - ايه ... غرياني معناها

    حسن - لكن مش ضروري يكون عايش ف غريان مرات عايش اهنا

    ضاوي - اي اهو فيدسو بالك نلقوا منه راس خيط

    حسن - تره ..... هدا فيديو قطاطيس ...

    ضاوي - خلي انمشي ف الصور الا مايكون فيه حاجة ..... اهلاااا شوف الصورة اهياه شوف

    حسن - واخيرا حصلنا راس خيط


    <><><>


    علي - لا ماتقولهاش ياراجل

    الياس - زي مانقولك تو ...

    رامي - ضعت رسمي معناها انا ... منين بنلقها ياربي منين والا منين ... حياتي ولت جحيم ...

    الياس بنبرة تعصب - هذا اللي مايسمعش الكلام يارامي

    رامي - خليني نمشيله الكابو ونسلم نفسب

    الياس - تي شن شادلي نسلم نفسي ... تحسابه بيقتلك بسهولة هه يحطلك جميع انواع العذاب ... لين تتمنى الموت تمني

    محمد - الحل ياجماعة الخير

    علي - مافيش حلول ...

    محمد - اذكر يارامي فيه حاجة مهمة ف D

    رامي - معش ندكر رسمي ... اللي نعرفه انه صور متع زرادي وهكي ملف صور طبيعة

    الياس - ان شاء الله ايكون زي ماتقول

    علي - تي باهي كان جتنا ف طبيعة

    رامي - مش متاكد وكش مرتاح الحق

    <><><>

    حسن - هادي اكيدة واحدة من عيلته

    ضاوي - ممكن وممكن لا ....

    حسن - لاوم نبعت حد يسألها من صاحب هالاب توب

    ضاوي - لا ياغزيل ... ان سألنها حتنكر ... لكن لو خطفناها حتخاف وتقول كل شي ...

    حسن - لكن وين بنعرفوا طريقها بش نسئلوها والا حتى نخطفوها

    ضاوي - ركز ف خلفية الصورة متعها .... تلاحظ انه معشب وفيه كفيتيرا .... ووين احنا البنات ايقعمزوا في معشب وكفتيريا

    حسن - الا اذا كانت جامعة ياضاوي

    ضاوي - بالزبط

    حسن - هيا كاجامعة من نظامها واضح انها جامعة لوزة لكن ... ضاوي - عارف نحتاج بس نعرف ف اي كلية الكفتيريا هادي

    حسن - اصبر ... كبرها الصورة ... بين جيهة الكفيتيرية بس

    ضاوي - اوكي ...

    حسن - مصعب ...يامصععععب

    ضاوي - تي بنمشي انا شخصيا مش حنبعته راه

    حسن - باهي اوكي غير خلي نبيه يعرفلي اي كفتيريا .... مصعبببب

    مصعب - نعم يالافندي

    حسن - زود اهنا .... حط معاميك ف لاب وقولي هادي الكفيتيرة وين

    مصعب - هادي .... وين وين وين ياصعوبة وييين ... اهااا كلية العلوم جامعة لوزة اسمها كفتيرية المكسرات الذيذة

    حسن - اوك خلاص برا وسكر الباب

    مصعب - اوك ...

    حسن - شن بدير تو

    ضاوي - حنمشي ونقعمز قدام الكفيتيريا لين تخطم او تجي هالبنت .... وانت خليك برا ... حنخطفوها انا وياك وبس بدون بلبلة وبدون اي معاونة

    حسن - تمام ... بس علاش ماخليتش الياس يمشي

    ضاوي - ليا وقت معش طلعت عمل ميداني ... وبيني وبينك البنت عجبتني طرف طيار 😉

    حسن - ههههههههه كلب من يومك غير بش تعطينا فيها حصة

    ضاوي - اكيد يابرادر ... هي نوض

    حسن - هي


    <><><><>





    الياس - راسي دخن ياجماعة دخخخن

    علي - احرف منك ...

    الياس - انحس ف روحي عاجز ... المشكلة ضاوي الكلب وزعني ياعلي ... مايبينيش نعرف شن بيصير او شن فيه ف الصور ...

    علي - ضاوي عقله هذل مش عارف منين جايبه .... قريب نمشي نقتله

    الياس - خنايسي درجة اولى ربي ومافيش حل بنقعمزوا ونستنوا يستر الله وخلاص

    علي - هو الستار ياصحيبي


    <><><>


    حسن - الو .. ها شنو خشيت

    ضاوي - ايه وصلتلها الكلية قاعد اندور عالكفتيرية

    حسن - اوكين ... كان حظنا اليوم انحصلوها

    ضاوي - وكان مش حظنا انجو كل يوم

    حسن - عادي يابرو شن ورانا ...

    ضاوي - هي سكر سكر تو وقت نلقاها الكفتيرية نتصل بيك

    حسن - اوك ...

    *دور ضاوي الكفيتيريا لين لقاها وقعمز ... كل مرة يشوف لطاولة ويركز ويشوف لصورة ... لين لقاها قعد يشوفلها ويركز فيها ... وفورا اتصل ب خوه


    ضاوي - لقيتها يالكابو

    حسن - مليح بكل

    ضاوي - خليك ف مكانك

    حسن - قاعد وين ماخليتني

    ضاوي - اوك .... خليك مركز عالصورة من اول ماتطلع


    بعد ساعة ونص بالتحديد ...

    هنادي - ابتسام سووومة

    تلفتت ابتسام ولقت هنادي - ها هنادي

    هنادي - هاك مدكرتك من بكري نجري ف جرتك ونادي

    ابتسام - باهي اتصلتي

    هنادي - ماعنديش رصيد ... هاك مدكرتك

    ابتسام - اوكي صحيتي يلا نتلاقو غدوة

    هنادي - اوكي ... بتاخدي افيكو

    ابتسام - بنمشي لمحل توا وبعدين بنروح يلا سلام

    هنادي - سلام


    ضاوي - هي وراها

    حسن - خلعتني كنت مركز عليها لدرجة مالاحظتش جيت..... هي وبن بنحاصروها ؟

    ضاوي - اصبر الا ماتخش لزنقة ..

    *ظل وراها ضاوي وحسن الى ان خشت لزنقة وبتمشي للمحل .... نزل ضاوي وحسن وقفوا قدامها وبسلاحاتهم

    ابتسام - ش ش شنو فيه

    ضاوي - سلامتك ياعسل

    *شدها من يدها صيحت ابتسام .... ضربها حسن ع راسها ادروخت وحطوها ف السيارة من الخلف وركبوا وسكروا البيبان وهربوا بيها

    شن بيصير ف ابتسام ؟؟ وهل حتتعرف على لاب توب رامي ؟؟ وبرضوا رقم الياس مخزن في تلفون ابتسام من لما عجبها الرقم 😱

    يتبع 👊


    جميع الحقوق محفوظة للمؤلفة لوزة ليبية من صفحة روايات لوزة ليبية 

    لمتابعة صفحة المؤلفة علي الفيس بوك : من هنا
    ,
    @مرسلة بواسطة
    كاتب ومحرر اخبار اعمل في موقع روايات كوريه متنوعه .

    إرسال تعليق