رواية مهمات سرية الجزء الأول الفصل ال12

رواية مهمات سرية الجزء الأول الفصل ال12

    رواية مهمات سرية الجزء الأول الفصل ال12


    رواية مهمات سرية الفصل ال12 الجزء الأول


    رواية باللهجة: الليبية
    رواية من روايات صفحة روايات لوزة ليبيه.

    هيا بنا سوياً لمتابعة الفصل.

    (حنطلع سلاحاتي الاتنين بسرعة ... وحنعطي رصاصة ف راس حسن والثانية ف راس ضاوي ... واكيد حتكون موتتي على يد وسام قريبهم ماكنتش نتمنى ايصير هكي بس مافيش حل الا هكي .... لكن انا مش قاتل ... كيف اندير ... نتقبل الوضع ونبصم ... بمجرد بصمتي او بصمت محمد مشت للمختبر يضيع كل شي .... مي .... مي ... علاش نردد ف اسمها ... وعلاش لقطة متع امس ف الليل اتجي قدام عيني ... ان شاء الله طلعها علي من الفيلا يارب ... شن ذنبها مسكينة لو انشدت حينفذ حسن مخططه اللي قال عليه امبكري استغفر الله .... يارب نستودعك مي وامها ... )
    وماقطعش حبل افكاره الا لما ضاوي اتكلم وقال - الياس دورك ..
    هز راسه الياس و اتقدم ووقف قدام طاولة اللي وراها حسن ووسام فتحله وسام صفحة جديدة وكتبله اسمه ومدله الحبر ..

    <><>
    هيثم - هاك اه عليوة ...
    علي - هات ...اممم ياناري ليسو وجعني الدعوة كيف واقف قدامهم .... سامحني صحيبي

    كيف بيحط الياس صوابعه ف الحبر ...حس ان الدنيا مشوشة قدامه ... سكر عيونه بقوة وفتحهم وزادت الرؤية اتشوشت .... وطاح الياس طول وعرض

    قبل ساعة الا ربع 😃 راكم تتلخبطوا ركزوا *

    علي - قالي طلع عيشة وبنتها من الفيلا ... كيف الراي مش هامني عيشة وبنتها المهم صاحبي
    هيثم - غير اصبر ... انت اخر مرة لما بعتك البوس اتراقب الكابو كان طلع اتقوله اتحرك الهدف
    علي - ايه به
    هيثم - نقصد انت شايفه المكان شنو كيف شكله
    علي - مبني يتكون من دور واحد
    هيثم - امممم عندي خطتين ... وان شاء الله تنجح ...
    علي - شن هيا
    هيثم - نتسللوا لمقر الكابو ... و نبخوا بخاخ الاغماء ف مكان تواجدهم يامن السطح يامن جيهة الباب ياعالمكيف البراني المهم يشموه ووقت يشموه ويتخمدوا نديروا راي ل للبوس ...
    علي - نخاف نفشلوا
    هيثم - هيا صارت صارت يافيها يافي البيس
    علي - صح متاكد لو العكس الياس ماكنش حيخلينا حتى لو على قطع رقبته
    هيثم - بزبط بدليل انه اقحم نفسه ف مشكلة زي هادي ع خاطر رامي
    علي - اوك معناها نحتاجوا بصمات مشمعة
    #بصمات مشمعة الاسم الحقيقي ليهم مانزبطاش ولكن هي زي القوانتيات للأصابع فقط شفافاات لدرجة لا توصف ... يستعملوا فيهم الاستخبارات الاجنبية بصفة عامة ف مهمامهم السرية او اذا كان فيه عميل بيتسلل لمكان ما #
    علي - غير ان شاء الله مزال عندنا منهم .... نحتاجوا زوز ماتنساش
    هيثم - وشن دخل محمد ف الموضوع
    علي - هذا ضاوي يخطر عليه اللي مايخطر عالشيطان اتوقع يقوله تعال ابصم
    هيثم - اوك
    علي - اهو لقيت واحدة .... ان شاء الله انحصل واحدة تانية ... اهو حصلت ....
    هيثم - هي خديت كل مايلزم
    علي - تمام .. اصبررر نسيت الكمامات ياراجل
    هيثم - اي صح ...
    *ولما وصلوا لمقر الكابو لقوا واحد عالبوابة ...فاطروا انهم ينقزوا من السور هما الزوز ... ويلبدوا بين الشجر لين وصلول للمقر .... شنكلوا الخطاف على سطح البناية واتسلق هيثم .... اما علي قعد تحت يستنى ويراقب ...
    هيثم عبر بلوتوث - فيه روشن تهوية عالسطح حظنا مليح ياعليوة.... ... يتهيئلي لياس معاهم
    علي - هوا او لا ماتتهيأليش !
    هيثم - مش عارف تقريبا هادي كندرته .... اركب اركب ياعلي خير مايشوفوك لوطة
    علي - اوك راكب هي .........
    منور ياهيثم والله طلع عقلك ايفكر مية مية
    هيثم - احم احم ....
    علي - بخيتلهم
    هيثم - يس والياس كيف ادروخ وطاح
    علي - تره ...امممم حلو حلو كلهم رقدوا
    هيثم - شنو ننزلوا من تحت والا انخشوا من الباب والا نخشوا من فتحت التهوية
    علي - اكيد بننزلوا للباب فتحة التهوية ماتسدناش
    هيثم - اوك ...
    *شكلوا الخطاف تاني ولبسوا قوانتي ونزلوا واتسللوا لغرفة اللي فيها حسن .....
    علي - لبس محمد بصمات وانا تو نلبسهم ل الياس
    هيثم - اوك
    علي - يعنجد راسك بش هكي بيشكوا ف الياس هوا اللي دارها
    هيثم - علاش يعني الدار معبية اشخاص
    علي - كان تلاحظ بس كلهم يديهم بالحبار الا الياس ومحمد غبارتك بطببها زدت عميتها
    هيثم - غير اصبر بس خلي نلبس صوابع اليد اليسار وتو انفكر
    علي - راك تمزقهم ياراجل
    هيثم - خلاص كملت .... تره مدلي الخطاط
    علي - اها هدا ...خود هي
    هيثم - وينه منهم حسن
    علي - اهو اللي شعره طويل
    خدي ورقة هيثم وكتب بالخطاط عالورقة >> هالمرة ماقتلتكش يالكابو انما خوفتك بس اهو خشيت لعقر دارك ونومتكم كلكم وماحدش منعني ... المرة الجاية نمسح جد عمه المقر متاعك ...
    *ولصق الورقة ع صدر حسن بلصقة الشريط ..... وسل حبل من اللبسة متعه قسمه ع زوز ودار قرينات ل حسن
    علي - هههههههههههههه راسك خطير انت
    هيثم - هههههه شوف منظره شوف
    علي - هيا خلي نطلعوا فيسع خير مايجي حد ...
    هيثم - اوكي هي ... استنى استنى ...
    علي - شنو
    هيثم - بنمشط بالك نسافر اليومين جايات
    علي - باهي هيا فيسع
    هيثم - اوووف مبلغ محترم ...
    علي - تي هيا ياهيثم
    هيثم - هي هي

    *طلعوا هما الزوز وتسللوا من وراء الشخص اللي ف البوابة وغموله وجهه وبخوله البخاخ وتمت مهمتهم بنجاح وروحوا لصالة .... بعد حوالي تلات ساعات نوم بدوا يفيقوا بالواحد مدروخين واللي يفيق يضحك ع حسن .... لين فاق حسن بضحكة عالية من واحد من الشباب تلفت لقي خوه راقد والياس مرمي عالوطا وبحداه مصعب
    حسن - شن صاير اهنا .... على شن تتبسم انت وياه
    *لمح قرينات عالجنب نحى الخيوط ووقف وخبط عالطاولة .... مع التخبيطة الياس فاق وشد راسه المدروخ ....
    حسن - من السخيف اللي دار هكي من
    فاق ضاوي ويغمض ف عيوته ويفتح - شن صار ياحسن كنا راقدين والا كيف
    *شاف لحاله حسن ولقي ورقة ملصقة ع صدره ... جبدها وقراها وانصدم ومدها لضاوي ....
    الياس - شن صاير يالكابو راسي انحس فيه رزييين
    حسن - اللي هوا كان اهنا ياهنقر
    *ضاوي شاف ل الياس وقال - من تتوقع ياهنقر
    الياس - وين نندري اخر شي انتبهتله ان لفت الدنيا بيا وطحت
    حسن - من اتسلل عندي هكي منووووو .... وخانب درج الفلوس منووو
    وسام فاق - اه شنو دور منو توا ... شن كتت راقد انا ؟
    حسن - كلنا كنا راقدين شخص حقير اتسلل اهنا واحنا راقدين وطاتبلي ورقة قالي المرة الجاية حنمسحه هالمكان
    ضاوي - هوا يااما حق يااما تمويه
    حسن - تمويه ف شنو
    ضاوي - تمويه بش جماعة واحد فينا يتلاعب بالبصمات
    *مع كلام ضاوي زبط ان علي اتسلل فقال - اهم شي الاب توب قاعد ...
    حسن - ايه قاعد ... لالا ماعتقدش ياضاوي الموضوع اكبر من بصمات ... اللي دار هكي شخص هدفه اكبر من لاب توب
    وسام - هيا سقدوني تعال اللي مابصمش يبصم خلي انلحق عالمختبر بش نقارن هالبصمات الحرف ....باهي اللي ماقتلوناش واحنا راقدين
    ضاوي - الياس واللي معاه مابصموش
    الياس - اي هي ....
    * ضاوي يراقب ف الياس وايفكر
    (لو انه شاف لباطن يديه معناها بيتاكد من حاجة .... وراك وراك يالهنقر )
    *لاحظ الياس نظرات ضاوي ليه من تحت لتحت .... فاتقدم عالطاولة
    (ان شاء الله درت حل ياعلي ... من غير مانشوف لصوابعي حنوتق فيك ياصاحبي .... )
    *بصم الياس ..... وبصم وراه محمد ف ورقة تانية ..... جمع الاوراق وسام وطلع .... وطلعوا كل الموجودين ف الدار ....
    حسن - وتوا بنبربشوا الاب توب ع روااااق
    الياس - اي حتى انا من بكري نستنى ف هالحظة

    خش مصعب فجأة - كابو يالكابو
    حسن - خيرك
    مصعب - فيه اشتباك ف الشارع
    حسن - نوضوا نوضوا خلي نروحوا ماعنديش خلوق نشتبك معاهم بكل
    الياس - والاب توب
    حسن - غدوة الصبح ارجع انت وصاحبك على الاقل اتكون هدت الامور
    الياس - اوك سلام ... هيا محمد
    محمد - هي

    <><><>

    {اخخخخ يامهند ... قداش ماخاطري نشوفك .... استحشت نشوف لعيونك الزرق وشعرك الاصفر ... استحشت ايام الجامعة .... اه اه اه في يوم وليلة وليت على ذمة ذيب ... انعزي نفسي في قلبي اللي ايحب والا شن اندير اه اه اه.. حب مهند فات على كل التفكير صبرني ياربي }

    <><><>
    زينة - ياسين
    ياسين -هاه
    زينة - انت لما تطلع ف الليل وين تمشي
    ياسين - وين بنمشي يعني .. نعكسوا انا والاولاد
    زينة - متاكد
    ياسين - ايه علاش تسالي نتي
    زينة - هكي لاني عارفة انك عندك مواضيع مش تمام ادير فيها
    ياسين - مواضيع شنو
    زينة - مواضيع مش ليك خنبة وعصابة وبتخنبوا الراس متعكم
    ياسين - وانتي منين تعرفي هدا كله
    زينة - تلفونك ايبردي ... يتصل بروحه فتحت الخط وسمعتك تدوي مع صحابك
    ياسين - تعرفي اتقولي حاجة لامي والله انفرغ فيك الكلاشن كله واهو قتلك
    زينة - اتفرغ عينك وتمشي مشيتك واتعدل خير مانقول لخوالك
    ياسين - جربي انتي مامظل الا قاتلك تحسابيني غير بنخاف
    زينة -مستغربه كيف وليت هكي هذا كله لانه اللي اتخاف منهم معادش اهناك لا بوك ولا خوك
    ياسين - ضمي فمك خير ماانوضلك مانخافش منه خوك بري دوريه كان لقيتيه عقاب واحد جيفة خلانا ومشي
    زينة - امعش اتقول عليه هكي على الاقل هوا خير منك مش خاش ف مواضيع مش ليه
    عطاها همدة ع ظهرها وقالها - مش خير مني واحد تافه حرام حتى انقول عليه خوي بري من قدامي خير مانغرز هالموس فيك
    زينة - احيييه سحيقة فيك ياسين الهم

    <><><>

    *طلع الياس ومحمد من عند الكابو ومشي دعس ل علي .... *
    علي - زعما شن صار
    هيثم - المفروض استنينا غادي ياراجل
    علي - معش اتزيدني قاعد ع اعصابي
    هيثم - حتى انا
    الياس - عليووووووة صحيبي
    علي - هااااا ليسوووو على سلامتك وخيي
    الياس - الله يسلمك ... والله انت احسن واحد في الدنيا دماغك بيرفكت
    هيثم - 😒😒😒😒😒
    علي - قبل كل شي هادي كانت خطة هيثم
    الياس - اوووووو هيثووووومة حبي
    هيثم - برا برا توا كان عليوة احسن واحد وبيرفكت مش عارف شن
    الياس - هههههه والله توقعت علي معليشي سامحني ....
    هيثم - يلا المهم على سلامتك
    الياس - الله يسلمك
    محمد - وينه رامي امالا
    علي - حطيته عالريسبشن
    محمد - اها اوكي
    الياس - احكولي كيف قدرتوا اتخشوا للمقر
    علي - هذا ياسيدي ....
    *حكي علي شن صار ل الياس *
    الياس - تاريتك مش اهوين ياهيثم مايطلع منك
    هيثم - هههههههه
    الياس - عموما صحيتوا عرضتوا نفسكم للخطر على خاطري
    هيثم - ماعندناش فيه جميل ... متاكد لو ف نفس الموقف ماكنتش حتخلينا
    علي - مزبوط
    الياس - والله حتى لو على قطع رقبتي المهم انطلعكم
    علي - اصلي يامان من يومك ...
    الياس - تسلم .... محمد شغل الجهاز وشوف شن فيه حالات خكف
    محمد - اوكين
    الياس - اليوم ان شاء الله ببنقذوا عماد ... مع ساعة 11:30 ف الليل اتكونوا اهنا
    علي - لكن عددنا شوية يالياس انا وانت وهيثم بس
    الياس - معانا رامي اربعة
    هيثم - ياغيبتك ياسعد ... كنا على الاقل خمسة
    علي - كيف الراي اربعة شوية
    الياس - نقدروهم ياعليوة بإذن واحد احد
    محمد - تبوا نطلع معاكم
    الياس - لالا نحتاجك على هالجهاز كل واحد وخدمته
    محمد - اوك Boss
    الياس بالهمس ل علي - خلي عينك ع محمد .... بعد مايكمل قيم الجهاز ف المخزن ..
    علي - ان شاء الله ...شنو نجيبلكم الغدي
    الياس - لالا مروح نصلي الظهر بالمرة ونتغدى وانقيل
    علي - اوكي يابرو
    هيثم - نتلاقوا بعدين
    الياس - سلامات

    * بعد هدرزة مطولة طلع الياس من عند علي وخطم عالمحلات ابتسم و
    خدي شوية مستلزمات وخضرة ... و... ورجع للحوش شاف اموره صلى واتغدى ومي داسة روحها ف الدار ماتبيش تقابله ... ركب قيل الياس .... وقعد راقد لين فجاة فاق .... شاف تلفونه لقاها للساعة سبعة قبل صلاة العشي ...
    ( ايااااح رقدت هلبا باين عليا )

    <><><>
    ابتشام - انا قررت ياهنادي
    هنادي - ها شن قررتي
    ابتسام - خلاص غدوة بنقول ل رامي اني مانبيكش
    هنادي - هه زي كل مرة بعدين ماتقوليش
    ابتسام - لالا حنقول هالمرة
    هنادي - باهي كويس ....

    <><><>
    طلع الياس من داره ... لقي مي طالعة من الدار اللي بحنبه
    الياس - مي
    وقفت مي - نعم
    الياس - جبتلك معاي حاجة مش عارف هل حتعجبك او لا ..
    مي - اكيدة مش حتعجبني
    اتعصب الياس وقالها - كيف تحكمي من غير ماتشوفي !
    مي - لانها بكل بساطة منك .. واي حاجة منك ماتعجبنيش ياذيب
    سكت الياس للحظة وبعدين قالها - الحق فيا انا .. معبرك وواخدلك حاجة اتفرحك ولو شوي
    مي - ان كنت تحساب نفسك بتغريني بفلوسك وحاجاتك بش اتفرحني و انجيك فأنت غلطان ... ناقصني غير مجرم و...
    الياس شدها من مرفقها وخششها لداره وسكر الباب بالمفتاح ... بربش ف القجر وطلع سنسال وجي من وراها ولبسهولها ...
    *داعب ب انامله على رقبتها ... انكمشت قليلا بكتفها في جيهة انامله ...
    شدها من كتافها وهوا لا يزال وراها وهمسلها ف وذنها - برغم كلامك المزعج الا اني متاكد انها حتعجبك
    مي - مش حتعجبني ...خليني ف حالي لياس
    الياس - من لقطة امس ... و انا نفكر فيك طول اليوم ... برغم انك لعبتي عليا لكن معليش .... عاؤف اني وصلت لاحساسك
    مي - اي احساس انت ماتحبنيش وانا مانحبكش فخليني لو سمحت
    الياس - مش كل المتزوجين اتزوجوا وهما ايحبوا بعض .... الحب ايجي بعد الزواج
    مي - مانتوقعش ان فيه حب حيجي بينا
    *لف يديه عليها وحطهم على خسرها وقالها - ممكن مافيش حب ... لكن فيه احساس .... الاحساس قادره ايجيب الحب
    مي نحتله يديه وبعداته عنها وقتله - انا عكس نظريتك ... اذا كان مافيش حب فمافيش احساس ...
    *وتلفتت عليه وبتطلع من الدار فقالها - اوك كيف ماتبي بس السنسلة خليك لابستها .
    نظرتله بنظرة تهكم وفتحت الباب وطلعت وطربقت الباب ... قعد واقف للحظات ف مكانه
    (هل انا تماديت ؟؟ علاش نتصرف معاها هكي بكل حنية وصابر علي كلامها الجارح... اتبت ياالياس واعقل واركز ... بس علاش هكي خايف عليها ونفكر فيها ومهتم بيها و كل مانشوفها مشاعري تتحرك ... علاش ! )

    {بارد هلياس .... سنسلة ب اسمي ... هيا حلوة ا لحق يقال وزي سنسلة اللي جابهالي حمدي زمان ...لكن كانت حتعجبني اكثر لو انها من شخص غير هلياس... هه حنحيها و مش حناخد بخاطره وانخليها ف رقبتي ... }
    عيشة - شن اديري
    مي - بندير توست انحس ف روحي جعانة
    عيشة - ها به ...
    مي - تبي نديرلك معاي
    عيشة - لالا ماشية بنتفرج تو
    مي - اوك ...
    *نزل الياس من داره بعد مابدل وصلى اللي فاته من صلاة .... خش للمطبخ لقي مي واقفة بجنب الة التوست .... فتح التلاجة خدي بيتري صودا .... شاف عالرخام لقي السنسال محطوط .... شافله وخداه حطه ف جيبه ... نظرلها نظرة مسمومة وطلع من الحوش ...
    {خيره هدا مرة ايفنص ومرة يحن .... ربي يلطق بيه مريض نفسي حسه }
    <><>
    مشي الياس لجماعته في الصالة ... وهدرزوا واتفقوا كيف حيقتحموا المكان من اجل ان ينقذوا عماد ...
    عالساعة 11:30 طلعوا من مكانهم بعد ماجهزوا انفسهم هما الاربعة ... واتوجهوا للمكان المحدد ما ان وصلوا
    لبسوا نظرات الرؤية الليلة بسبب ان المكان ظلام دامس و نقزوا من السور واحد وراء الثاني ومشوا ورا بعض بقيادة الياس ف المقدمة اللي يشبحهم يقول هادو مية في المية مارينز .... لما وصلوا للمخزن اشرلهم الياس ✌ هيثم و رامي خشوا من الباب الخلفي👇 وانا👉 و👈علي من الباب الامامي👆 ونلتقوا ف نقطة المنتصف 👍...
    الكل اشر بهزة من راس اوكي ... واتفرقوا
    <><>
    مي - يمة ماشفتيش سنسلة اللي كانت ف المطبخ
    عيشة - لا ماريت سناسل
    مي - ياربي انا متاكدة حطيتها اهنا .... مايكون قامها الياس امبكري .! ... عليك حشمة تو يقول لوحتها ..خسارة خداها زي الهم كنت نبيه يشوف اني ماخديتش بخاطره لكن اهو خداها ..كيف قلت زي سنسلة اللي جابهالي حمدي
    عيشة - شن اتبرطمي ....
    مي - شي شي ...

    <><><>
    فتح الياس الباب الامامي المردود وخش
    الياس - عبر البلوتوث im in ...
    هيثم عبر سماعة بلوتوث - احنا مازال ... الباب مسكر حنخشوا من الروشن ...... تمام رامي خش .... خشيت حتى انا
    الياس - اوكي
    * اتقدم خطوتين الياس ووراه علي وشادين اسلحتهم ....سمع هدرزة الياس جاية من الغرفة اللي بجنب... اشر ل علي ✊ قف ف مكانك ...
    *وقف علي وراه بالتحديد ...
    حاول يسمع الياس ...فاواحد من الشباب قال - ضاوي تره مدلي الشيشة ...

    *اتجمد الياس ف مكانه بهالأسم ...
    ( ضاوي البلي ف كل مكان ...شن جيبه اهنا شن جيبه مش وقته بكل )
    وتلفت ل علي ....اشرله 👈 اطلع بننسحبوا 👣
    علي - 👎👎👎
    الياس - 😬👈👈😬
    علي - 👍👍
    وكيف بيطلعوا هوا وياه ف نفس اللحظة ..واحد من الشباب طلع عالممر هما يشوفوله وهوا يشوفلهم وصفر لجماعته ..


    يتبع...

    جميع الحقوق محفوظة للمؤلفة لوزة ليبية من صفحة روايات لوزة ليبية 

    لمتابعة صفحة المؤلفة علي الفيس بوك : من هنا
    ,
    @مرسلة بواسطة
    كاتب ومحرر اخبار اعمل في موقع روايات كوريه متنوعه .

    إرسال تعليق